La 6an de majo 2024 estis enretigita por publika legado la demonstra versio (demoversio) de la marta (printempa, laŭ la nordhemisfera vidpunkto) eldono de La Ondo de Esperanto. La 41-paĝa demoversio (pdf) enhavas plurajn tekstojn kaj tekstokomencojn el la riĉenhava kaj ampleksa 132-paĝa 319a numero de La Ondo de Esperanto, publikigita antaŭ kvin semaĵnoj.
La demoversio de la printempa Ondo estas libere elŝutebla ĉe https://esperanto-ondo.ru/Ondo/Lo-319demo.pdf.
La demoversioj de pli fruaj Ondoj estas elŝuteblaj en nia arkiva retejo. Tie estas elŝuteblaj ankaŭ kelkaj plenaj eldonoj (“pdf” kaj “epub”).
Kristo resurektis! Ni gratulas ĉiujn kristanojn kiuj, same kiel ni, hodiaŭ, la 5an de majo 2024, festas Paskon laŭ la Julia kalendaro. Okaze de la plej granda festo dum la jaro ni proponas al vi legi la rakonton La febro de Ivan Ŝmeljov, kiu aperis antaŭ unu jaro kadre de la projekto Rusa Novelaro 2 en La Ondo de Esperanto, 2023, №2 (316). Ĝin tradukis la siberia esperantisto Vladimir Jurganov.
SAT-Kongreso estas kongreso organizata ĉiujare de Sennacieca Asocio Tutmonda (https://satesperanto.org/), ĝi taŭgas kiel renkontiĝo de la anaro kaj la simpatiantoj de la organizo. La 97a SAT-Kongreso okazos en Oporto (konata ankaŭ kiel Porto), Portugalio de la 5a ĝis la 11a de aŭgusto 2024, koincide kun celebrado de 50 jariĝo de la “Revolucio de Diantoj” kiu liberigis Portugalion de la faŝisma reĝimo.
Prezento, malfermanta la oktobran (2023) numeron de Beletra Almanako, estas aŭtorita de Probal Daŝgupto. Li rakontas sian kvankam delongan (sed ree aktualan por multaj) sperton troviĝi en situacio, kiam venas, laŭ la difino de Probal, emocia anesteziĝo. Li sugestas: “Aŭskultu kun nova kompreno la vortojn “ne al glavo sangon soifanta”. Fieru pri la soifo kiun nur vi, kaj aliaj esperantistoj, kapablas soifi”.
Je la 1a de majo 2024 al la 109a Universala Kongreso de Esperanto, kiu okazos de la 3a ĝis la 10a de aŭgusto 2024 en Aruŝo (Tanzanio), aliĝis 448 personoj el 56 landoj. Dum aprilo aliĝis nur 22 novaj kongresanoj.
Coulmas, Florian. Gardantoj de lingvo. Dudek voĉoj tra la historio / Tradukis el la angla Jan P. Sandel; Antaŭparoloj de Florian Coulmas kaj Humphrey Tonkin. – Novjorko: Mondial, 2021. – 464 p.
