Same kiel ĉiujare, en la fokuso de la septembra eldono de La Ondo de Esperanto (2023, №317), aperinta antaŭ dek tagoj sur 141 paĝoj, estas la “Kongresa Sezono”, kiu daŭras en Esperantujo ekde junio ĝis septembro. La ĉefa evento de ĉi-jara “Kongresa Sezono” estis la 108a Universala Kongreso de Esperanto, okazinta en Torino de la 29a de julio ĝis la 5a de aŭgusto – al ĝi estas dediĉita la 13-paĝa sekcio “Temo” kun pluraj tekstoj, inkluzive de la ĉefartikolo de Jukka Pietiläinen. La Torinan UKon montras ankaŭ fotoj de John Huang, inkluzive de lia kovropaĝa foto farita en la kongresa koncerto de Ĵomart kaj Nataŝa.
Sekvas ampleksa sekcio “Eventoj” (37 paĝoj), en kiu oni povas legi artikolojn pri la 79a Internacia Junulara Kongreso de TEJO kaj la 56a kongreso de ILEI, okazintaj samtempe en la apudmara Lignano Sabbiadoro, pri la 51a Internacia Infana Kongreseto apud Torino. Krome, en la septembra Ondo legeblas artikoloj pri la 72a kongreso de KELI en Bjalistoko, 57aj Baltiaj Esperanto-Tagoj en Ventspils, 37a Arkones en Poznano, Rusiaj Esperanto-Tagoj en Kazano, kaj pri multaj aliaj esperantistaj kongresoj, renkontiĝoj kaj staĝoj, ankaŭ pri tiuj, kiujn gastigis la Esperanto-centroj en Greziljono, Kvinpetalo kaj Ĉaŭdefono. Sed ne nur kunvenoj: legu artikolojn pri la nombro de esperantistoj en Hungario, pri ekspozicioj en Brazilo kaj Kroatio, pri la lanĉo de la kanalo “Esperanto-novaĵoj” en Telegramo, pri granda subvencio ricevita de UEA, pri (ĉu provizora?) eksiĝo de REU el UEA kaj pri aliaj Esperanto-okazintaĵoj kaj okazontaĵoj.
En la sekcio “Tribuno” estas legeblaj, interalie, analizo de la nuna situacio kaj perspektivoj de Esperanto en Kroatio, artikolo pri lanĉo de Esperanta aŭdgvidilo en la Viena Esperantomuzeo, kampanjoj por subteni partoprenon de Tanzaniaj infanoj en la venont-jara infana kongreseto kaj por reaperigi kelkajn malaperintajn Esperanto-kursojn ĉe Duolingo. En “Arkivo” estas publikigita la listo de Esperantaj jubileoj kaj memordatoj por oktobro 2023, kompilita de Aleksander Korĵenkov.
La kvaran sinsekvan jaron en ĉiu numero de La Ondo de Esperanto la plej ampleksa sekcio estas “Kulturo”, en septembro ĝi plenigas 68 paĝojn. En la projekto Rusa Novelaro 2 aperis ĝia sepa parto: kvin rakontoj de Aleksej N. Tolstoj, tradukitaj de Vladimir Jurganov, Ludmila Novikova, Vladimir Vyĉegĵanin kaj Aleksander Korĵenkov, kiu ankaŭ verkis la enkondukon kaj komentojn. Al la septembra Ondo per siaj originalaj prozaĵoj kontribuis Laure Patas d’Illiers, Paulo Sérgio Viana kaj Erika Godó. En la 317a eldono de em>La Ondo aperis la dua parto de “Nuntempa hispana poezio verkata de virinoj”, en kiu Miguel Fernández rakontas pri la poetino Pilar del Pozo kaj prezentas tradukojn de ses ŝiaj poemoj, kiujn ŝi mem elektis por aperigo en La Ondo. Tri recenzoj: Wolfgang Kirschstein pri Falaflo en maco de Sten Johansson, Paulo Sérgio Viana pri Reĝo Ubuo de Alfred Jarry, kaj Paŭlo Moĵajevo pri la muzika albumo Vestiĝoj de Martin kaj la talpoj. Kvar artikoloj de Floréal Martorell montras al ni novaĵojn de Esperanta muzika kulturo. Krome enestas novaĵoj pri Esperanta gazetaro kaj pri literaturaj konkursoj.
Al la sekcio “Mozaiko”, kiel ĉiam, kontribuis Stanislav Belov per paĝo da ŝercoj pri la komenciĝinta lerneja periodo kaj István Ertl per “Spritaj splitoj kaj preskeraroj”.
La Ondo de Esperanto aperas dumaniere: unue, kiel ĉiutage aktualigata novaĵretejo; due, kiel ampleksa trimonata almanako en kiu estas publikigataj la plej gravaj tekstoj el nia retejo kaj ankaŭ artikoloj, eseoj kaj beletraĵoj, verkitaj kaj tradukitaj speciale por la almanako, kiu konservis la nomon La Ondo de Esperanto.
La novaĵretejo estas libere legebla de ĉiu deziranto, sed la almanakon ricevas nur tiuj, kiuj abonis ĝin.
La baza abontarifo ne ŝanĝiĝas ekde 2017. Estas tri abonkategorioj:
1. Abonanto – 15 eŭroj
2. Amiko – 30 eŭroj
3. Patrono – 100 eŭroj
La nomoj de ĉiuj amikoj kaj patronoj aperas en la rubriko Donacoj de nia novaĵretejo. Pagante vian kotizon, ne forgesu pri tiuj, kiuj mem ne povas pagi, kaj donacu Amikan kotizon.
La Ondo de Esperanto estas abonebla por 2024 ĉe niaj landaj perantoj (preferinda maniero) kaj ĉe nia UEA-konto. Pri la pagmanieroj legu ĉi tie: https://esperanto-ondo.ru/Lo-abon.htm.
La sekva eldono de La Ondo de Esperanto (№318) aperos jarfine. La akceptolima dato estas la 20a de decembro.
La red.
Enhavtabelo de la septembra Ondo (2023, №317)
1 Kovropaĝa foto de John Huang
2 Bazaj informoj pri La Ondo de Esperanto
3 En ĉi tiu numero
5 Temo
6 Jukka Pietiläinen. Relative malgranda, sed bona kaj bonetosa UK en Torino
9 Rezolucio de la 108a Universala Kongreso de Esperanto
10 Amri Wandel. IKU: Maratona scienca programo kaj dramo en Torino
10 Francesco Amerio. Futbala matĉo en Torino: La verduloj gajnis 6-3
11 Aleksander Korĵenkov. Gong Xiaofeng, nova estrarano de UEA
11 Aleksander Korĵenkov. UK-108: 1319 aliĝintoj el 69 landoj
12 Tri novaj Honoraj Membroj kaj nova Honora Prezidanto de UEA
14 Premio Deguĉi 2023 al Miora Raveloharison
15 12 diplomoj de UEA aljuĝitaj en Torino
17 Aliĝu al la unua UK en Afriko
18 Eventoj
19 Liba Gabalda. ILEI kaj TEJO kongresis samloke kaj samtempe
20 La Estraro de TEJO por 2023-2024
21 Legolas. Junulara kongreso apud plaĝo
22 Daniele Pesce. Infana kongreseto sporta kaj natura
23 Ulrich Matthias. Latvia BET superis ĉiujn atendojn
24 Aleksander Korĵenkov. BET-57: 117 aliĝintoj el 22 landoj
25 Russ Williams. La 37a Arkones, denove plaĉa
27 Pavel Polnický. Bjalistoko: Dialogo inter religioj
28 Gražina Opulskienė. La unua aŭtuna kunflugo apud Kaŭno
30 Ludmila Novikova. RET en la ĉefurbo de Tatarstano
31 Decidoj de la 32a Konferenco de REU
33 Ĉu UEA perdas sian ruslandan asocion?
33 Irina Gonĉarova. Kalejdoskopo de lingvoj en Odincovo
35 Bert Schumann. Riĉa somero en la Esperanta kastelo
36 Verda naturisma semajno vide de kvin progresantoj
39 Benoît Ente. Mergiĝa sesio en Lillo antaŭ Torino
40 Patrick Lagrange. Staĝo pri astronomio en Kvinpetalo
40 Edmond Ludwig. Deĵorado en la lorena vilaĝo de la libroj
41 Ursula Niesert, Alois Eder. Libroj – Turoj – Cikonioj
43 Zdenka Polašek. Esperantistoj de Bjelovar al sia urbo
45 Du civitaj renkontiĝoj
45 Aranka Laslo. Renkontiĝo en Serbio
46 Rio-de-Ĵaneiro: Esperanto en la librobienalo
46 Enketilo pri la Esperanto-movado kaj UEA
47 UEA ricevis subvencion per la programo Erasmus+
47 Esperanto-kurso por hispanparolantoj en 2023
48 Aleksander Korĵenkov. Esperanto-novaĵoj en Telegramo
49 Szilvási László. Censo en Hungario: 4 mil 216 sciantoj de Esperanto
49 Aleksander Korĵenkov. Komento: 87-oble pli ol en Ruslando
50 Kunorganizu kun TEJO la IJK-n 2025 en via lando
51 La 4a Virtuala Kongreso de Esperanto
51 Ĉu vi volas trapasi Esperanto-ekzamenon rete en 2024?
52 La 14a JES okazos en Strokow
53 Lu Wunsch-Rolshofen. Komune festi la Novan jaron: Denove en Wiesbaden
54 Halina Gorecka, Aleksander Korĵenkov. Imre Ferenczy forpasis
54 Halina Gorecka, Aleksander Korĵenkov. Augusto Casquero forpasis
55 Tribuno
56 Subtenu infanojn en Tanzanio iri al la Infankongreseto
57 Ankica Jagnjić. Situacio kaj perspektivoj de Esperanto en Kroatio
58 Deklaracio kaj rezolucio de 96a kongreso de SAT
60 Bernhard Tuider. Aŭdgvidilo por la Viena Esperantomuzeo
62 Mesaĝo de UEA okaze de la Internacia Tago de Paco
62 Mesaĝo de UEA okaze de la Internacia Tradukada Tago
63 Por la reaperigo de la Esperanto-kursoj ĉe Duolingo
64 Arkivo
65 Aleksander Korĵenkov. Jubileoj kaj memordatoj en oktobro 2023
67 Kulturo
68 Aleksander Korĵenkov. La ruĝa grafo
70 Aleksej N. Tolstoj. La morto de la familio Nalymov. La inkmakulo. Nataŝa. Manjo. La kunloĝanto. (Tradukis Vladimir Jurganov, Aleksander Korĵenkov, Ludmila Novikova, Vladimir Vyĉegĵanin)
105 Laure Patas d’Illiers. Kunmarŝi
110 Paulo Sérgio Viana. Formiketo
113 Erika Godó. La kaŝita ŝtuparo
114 Miguel Fernández. Nuntempa hispana poezio verkata de virinoj (2)
121 Wolfgang Kirschstein. Iomete malsamaj, sed ne tre (Recenzo: Johansson S. Falaflo en maco)
122 Paulo Sérgio Viana. Reĝo Ubuo (Recenzo: Jarry A. Reĝo Ubuo)
123 Paŭlo Moĵajevo. La albumo antaŭvideble fortika, eĉ se malgranda (Recenzo: Martin kaj la talpoj. Vestiĝoj)
125 Floréal Martorell. Nuda: Nova bitalbumeto de Kjara
126 Floréal Martorell. Primitiva: La unua bitalbumo de YASS
127 Floréal Martorell. Armel Amiot: Nova muzikvideo, baldaŭ nova albumeto
127 Floréal Martorell. Sen timo: La 9a albumo de Kajto
128 La Juna Vivo en la reto
129 Halina Gorecka. Beletra Almanako, 2023, №46
130 Literatura Foiro, 2023, №324
131 Karina Oliveira: Nova redaktoro de Kontakto
132 Rezulto de la Belartaj Konkursoj de UEA en 2023
134 La gajnintoj de la dua Interkultura Novelo-Konkurso
135 Mozaiko
136 Stanislav Belov. Septembro, la eklerna monato
137 István Ertl. Spritaj splitoj kaj preskeraroj
138 Perantoj de La Ondo de Esperanto
139 Reklamoj
Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2023/10/ondo-117
“La Ondo” en Telegramo: t.me/esperanto_news
Alklaku la supran bildon por vidi la abonmanierojn.
