Post la katastrofe erarplena Jarlibro 2017, pretigita de volontulino, UEA komisiis la redaktadon de Jarlibro 2018 al Paŭlo Fischer-Kotowski, kiu redaktis ĝin antaŭ du jaroj, ankoraŭ kiel oficisto en Roterdamo. Li sukcese plenumis la taskon ankaŭ en Varsovio, kaj la nuna Jarlibro revenis al la iama digna nivelo, kio gravas, ĉar ĝi probable estas la lasta ero en la pli ol centjara serio.
Ĉi-jara Jarlibro enhavas 1296 adresojn de la divers-kategoriaj delegitoj de UEA en 100 landoj. Unuavide, tio ŝajnas granda nombro, tamen la Delegita Reto malkreskas: antaŭ 25 jaroj, sojle de la interreta epoko, funkciis 2272 delegitoj, preskaŭ duoble pli ol nun.
La supro de la landlisto apenaŭ ŝanĝiĝis. Same kiel en 1993 plej multaj delegitoj de UEA loĝas en Brazilo, sed ilia nombro nun estas nur duono de tiu antaŭ 25 jaroj.
| 2018 | 1993 | ||
| Brazilo | 142 | Brazilo | 284 |
| Germanio | 113 | Germanio | 206 |
| Francio | 84 | Francio | 190 |
| Japanio | 60 | Usono | 119 |
| Usono | 56 | Japanio | 105 |
| Ĉinio | 39 | Italio | 102 |
| Italio | 39 | Britio | 101 |
| Hungario | 32 | Nederlando | 79 |
| Nederlando | 29 | Svedio | 78 |
| Ruslando | 28 | Hungario | 62 |
Kvankam preskaŭ en ĉiu lando la delegitoj malmultiĝas, en la teritorio de eksUSSR ĝi restis preskaŭ la sama: 86 delegitoj en 1993 (Ruslando 38, Ukrainio 15, Latvio 12, Estonio 8, Belorusio kaj Litovio po 4, Uzbekistano 2, Azerbajĝano, Kartvelio, Taĝikistano po 1) kaj 82 delegitoj nun (Ruslando 28, Ukrainio 20, Estonio 9, Latvio 8, Litovio 5, Armenio 4, Kazaĥstano 3, Belarusio 2, Kartvelio 1, Taĝikistano 1, Uzbekistano 1). Atentindas minus dek en Ruslando kaj plus kvin en Ukrainio.
Same kiel antaŭ kvarona jarcento Brazilo tenas la unuan lokon ankaŭ en la listo de la urboj kun delegitoj (la ĉefdelegitoj ne estas enkalkulitaj); tamen antaŭ 25 jaroj en la tri listosupraj urboj estis ĝuste 100 delegitoj, kaj nun en la tri plej delegitozaj urboj estas nur 34 delegitoj, kaj la amazonan urbegon Manauso, en kiu iam loĝis pli ol 50 delegitoj, en la nuna Delegita Reto reprezentas nur tri esperantistoj.
| 2018 | 1993 | ||
| Rio-de-Ĵanejro (Brazilo) | 12 | Manauso (Brazilo) | 52 |
| San-Paŭlo (Brazilo) | 12 | Rio-de-Ĵaneiro | 24 |
| Brazilio (Brazilo) | 10 | San-Paŭlo | 24 |
| Havano (Kubo) | 10 | Budapeŝto (Hungario) | 21 |
| Multano (Pakistano) | 10 | Brazilio | 17 |
| Tokio (Japanio) | 10 | Tokio | 14 |
| Tehrano (Irano) | 9 | Seulo (Koreio) | 14 |
| Hanojo (Vjetnamio) | 8 | Sofio (Bulgario) | 12 |
| Katmanduo (Nepalo) | 8 | Lomeo (Togolando) | 10 |
| Berlino, Budapeŝto, Seulo | 7 | Tehrano | 10 |
Estas interese, ke en la unua urbonaŭo estas neniu urbo de Eŭropo, Berlino kaj Budapeŝto dividas kun Seulo la dekan lokon.
Ĉar pro la nuna reformado de UEA en la estonteco la Jarlibro apenaŭ aperos libroforme, mi verŝajne ne plu havos fonton por mia statistikado, kiun mi faris de tempo al tempo: komence en Ruslanda Esperantisto, kaj poste en La Ondo de Esperanto.
Aleksander Korĵenkov
Ĉi tiu artikolo aperis en la oktobra numero de La Ondo de Esperanto (2018).
Ĉe represo aŭ citado bonvolu nepre indiki la fonton:
Papere: La Ondo de Esperanto, 2018, №10.
Rete: La Balta Ondo https://sezonoj.ru/2018/11/jarlibro
Klaku la supran bildeton por vidi la abon-manierojn
Jen majstra helpo. Se la estraro kaj laboristaro de UEA konsistus el profesiuloj kiel Paweł Fischer-Kotowski, alie status la afero.
La kontrolo, menciita de James, faligis la nombron de delegitoj en Manaus el 52 en 1993 al 12 en 1994 kaj nuraj 3 en 1995.
Bonvulu atenti, ke la ĉefurbo de Brazilo esta Braziljo, ne Brazilio, kiel aperis en la teksto.
La afero pri delegitaro en Manaŭso estis artefarita aranĝo, kiel oni povas supozi. En la posta jaro UEA mem kontrolis kaj konstatis, ke loka delegito delegitigis eĉ simpatiantojn kaj lernantojn. Tio estis sekve korektita, post nelonge.