Arkivo por la kategorio 'Aleksander Korĵenkov'

La Ondo de Esperanto: Anstataŭ epitafo

La Ondo de Esperanto

La decido pri la ĉeso de La Ondo de Esperanto, publike anoncita la 21an de septembro en la festivalo ARKONES kaj publikigita en la jubilea Ondo, kaŭzis lavangon da reagoj buŝaj kaj skribaj. Ĉiuj reagintoj (krom anonimulo en Heroldo Komunikas) esprimis sian bedaŭron pro la ĉeso, kaj plejparto komprenis la kaŭzon de la ĉeso kaj sendis al ni siajn san- kaj bondezirojn, kiujn ni dankas kaj reciprokas.

Sed neniu pretas repreni la respondecon pri La Ondo, kiu inkluzivas multe da laboro kaj malmulte da enspezo. Do, konsultinte plurajn personojn, ni kun bedaŭro devas rekonfirmi nian decidon. La decembra Ondo estas la lasta ero en la longa serio de la ĉiumonata aperritmo.

Ekde januaro ni publikigas Esperantajn novaĵojn en nia novaĵretejo, kies nomo ŝanĝiĝis: La Balta Ondo iĝis La Ondo de Esperanto. Jam ĉi-vintre moderniĝos ĝia aspekto, aperos novaj rubrikoj, estos invititaj pliaj kunlaborantoj.

Ni strebas aperigi almenaŭ unu informon ĉiutage, escepte de la periodoj, kiujn ni pasigos eksterhejme. Tiu laboro estos malpli streĉa ol la laboro pri ĉiumonata gazeto, kaj la redaktoro ne plu devos sidi ĉe la komputilo ĉiutage ekde la 9a matene ĝis la 3a nokte dum la redakta semajno. Ni intencas redukti la labortagon al nur ok horoj, el kiuj du-tri estos dediĉataj al la retejo.

Kaj nun venas novaĵo.

Ĉiusezone la plej interesaj tekstoj el nia retejo, inkluzive de ĉiuj recenzoj kaj intervjuoj, aperos kiel almanako 120-150-paĝa (laŭ la normoj “pdf” laj “ePub”), kiu krome enhavos artikolojn, eseojn kaj beletraĵojn, verkitajn speciale por la almanako, kiu konservos la nomon La Ondo de Esperanto.

La printempa almanako aperos fine de marto, la somera fine de junio, la aŭtuna en septembro, kaj la vintra je Kristnasko.

Malkiel la retejo, kiu plu estos libere legebla de ĉiu deziranto, la almanakon ricevos nur tiuj, kiuj abonos ĝin. Estas tri abonkategorioj:

1. Abonanto – 15 eŭroj
2. Amiko – 30 eŭroj
3. Patrono – 100 eŭroj

La pagoj estos akceptataj ĉe nia UEA-konto kaj per la pagosistemo PayPal. La pagomanieroj jam aperis en nia retejo http://esperanto-ondo.ru/Lo-abon.htm

La nomoj de ĉiuj amikoj kaj patronoj aperos en la retejo kaj en la almanako (krom tiuj, kiuj preferas resti anonimaj).

Ĉiu patrono ricevos diplomon de la redakcio, senpagan bitversion de ĉiu nova libro de Sezonoj kaj 50-procentan rabaton por ĉiu nova papera libro.

Se la mono, ricevota en 2020 per abonoj kaj donacoj, kovros niajn bazajn kostojn (250 eŭroj monate, aŭ tri mil eŭroj jare), ni daŭrigos la novan sistemon por pliaj du jaroj kaj fine de la trijara periodo pripensos la daŭrigendon kaj daŭrigeblon de la projekto.

Halina Gorecka
Aleksander Korĵenkov

Ĉi tiu artikolo aperis en la decembra numero de La Ondo de Esperanto (2019). La reta teksto estas iomete modifita.
Ĉe represo aŭ citado bonvolu nepre indiki la fonton:
Papere: La Ondo de Esperanto, 2019, №12.
Rete: La Ondo de Esperanto https://sezonoj.ru/2020/01/ondo-56

La Ondo de Esperanto

Klaku la supran bildeton por vidi la abon-manierojn

La lasta Ondo kiel ĉiumonata gazeto

La Ondo de EsperantoLa 30an de decembro 2019 aperis la decembra eldono de La Ondo de Esperanto. Ĉi tiu laŭvice 302a numero estas la lasta en la serio, komencita en majo 1991, sed ĝia redakcio diras ne “Adiaŭ”, sed “Ĝis revido”, ĉar La Ondo de Esperanto ekde la 1a de januaro 2020 daŭras kiel novaĵretejo, en kiu ĉiutage aperas almenaŭ unu nova teksto. Ĉiusezone la plej interesaj tekstoj el la retejo aperos kiel almanako 120-150-paĝa (“pdf” kaj “ePub”), kiu krome enhavos artikolojn, eseojn kaj beletraĵojn, verkitajn speciale por la almanako, kiu konservos la nomon La Ondo de Esperanto.

Pliajn informojn pri la nova Ondo legu en la redakcia artikolo, kiu malfermas la decembran numeron. Sekvas anonco pri elekto de Anna Löwenstein kiel Esperantisto de la Jaro 2019 kaj intervjuo kun ŝi.

Legu la tutan artikolon ‘La lasta Ondo kiel ĉiumonata gazeto’

Litova eldono de la biografia skizo pri Zamenhof

Zamenhof

Ĉar en nacilingvaj enciklopedioj kutime estas nur unufraza mencio pri “pola lingvisto Ludwik (aŭ Ludwig) Zamenhof, la aŭtoro de Esperanto”, ESF (Esperantic Studies Foundation) decidis eldoni modernan biografian skizon pri Zamenhof en kelkaj naciaj lingvoj.

Legu la tutan artikolon ‘Litova eldono de la biografia skizo pri Zamenhof’

Deutsche Welle: Ruslingve pri Esperanto

La Moskva studio de “Deutsche Welle” okaze de la 160a naskiĝdatreveno de Lazarj Markoviĉ Zamenhof meze de decembro sendis la junan ĵurnalistinon Anna Savĉuk al la Esperanto-urbo Herzberg am Harz (Malsupra Saksio, Germanio).

Legu la tutan artikolon ‘Deutsche Welle: Ruslingve pri Esperanto’

Jubileoj kaj memordatoj en januaro 2020

La Ondo de Esperanto1. Antaŭ 115 jaroj naskiĝis Isaj Dratwer (1905-1918-1985), juda bakteriologo kaj esperantisto, loĝinta en Ruslando, Pollando kaj Israelo; fondinto (1933) kaj senŝanĝa prezidanto de Varsovia Esperanto-Societo ĝis la invado de Germanio (1939), ĝenerala sekretario de PEA (1947-58), komitatano de UEA (1948-51, 1956-58, 1961-67), prezidanto de ELI (1961-67); aŭtoro de kelkaj lerniloj kaj de libro pri Lidia Zamenhof (1980), kompilinto de la kolekto Pri Internacia Lingvo dum jarcentoj (1970). — Legu pli en NDK, p. 75-76.

Legu la tutan artikolon ‘Jubileoj kaj memordatoj en januaro 2020’

Konciza biografio de Lazarj Markoviĉ Zamenhof

1859
3 (15) dec: En Bjalistoko (strato Zeljonaja 6) en la familio de Mordka (Mark Fabianoviĉ) kaj Liba Roĥla (Rozalia) Zamenhof naskiĝas ilia unua filo Lejzer (Lazarj) — Лазарь Маркович Заменгоф.
1869
Aŭgusto: Eklernas en la unua klaso de la reala gimnazio en Bjalistoko, sed post du monatoj forlasas la lernadon pro malsano.
1870
Aŭgusto: Denove eklernas en la unua klaso.
1873
Aŭgusto: Eklernas en la kvara klaso, sed la lernado daŭras nur kvar monatojn.
Decembro: La familio Zamenhof ekloĝas en Varsovio (strato Nowolipie 28).
1874
Aŭgusto: Eklernas en la kvara klaso de la Varsovia 2a vira gimnazio.
1878Zamenhof
5 (17) dec: Festado de la naskiĝo de Lingwe Uniwersala.
1879
Majo-junio: Ekzamenoj en la lasta (oka) klaso de la gimnazio.
15 (27) jun: Ricevas la abiturientan ateston kaj arĝentan medalon en la gimnazio.
Aŭgusto: Aliĝas al la medicina fakultato de la Moskva Universitato.
Septembro: Ekstudas en la Moskva Universitato.

Legu la tutan artikolon ‘Konciza biografio de Lazarj Markoviĉ Zamenhof’

Jubileoj kaj memordatoj en decembro 2019

La Ondo de Esperanto2. Antaŭ 80 jaroj naskiĝis Humphrey Tonkin (1939-1954- ), brita kaj usona filologo, prezidanto de TEJO (1969-71) kaj de UEA (1974-80, 1986-89), reprezentanto de UEA ĉe UN en Novjorko, kunfondinto kaj nuna prezidanto de ESF (1968), la unua redaktoro de Kontakto (1963-66), (ĉef)redaktoro de Language Problems and Language Planning (1984-2013), aŭtoro de Lingvo kaj popolo (2006) kaj de aliaj libr(et)oj en/pri Esperanto. Tonkin tradukis en Esperanton du librojn de Ŝekspiro (Henriko Kvina, 2003; La vintra fabelo, 2006) kaj tradukis el Esperanto en la anglan du verkojn de T. Soros (Maskerado, 2000; Modernaj Robinzonoj, 2010) kaj la verkon de U. Lins La danĝera lingvo (2016-17). Membro de Akademio de Esperanto (1983- ), membro de la Honora Patrona Komitato de UEA (1995), Honora prezidanto de TEJO (1971). – Legu pli en NDK, p. 282-285.

Legu la tutan artikolon ‘Jubileoj kaj memordatoj en decembro 2019’

Jubileoj kaj memordatoj en novembro 2019

Nia diligenta kolegaro[Ĝi estas afiŝo №2000, aperinta en La Balta Ondo ekde la ekfunkcio de ĉi tiu retejo en la 2010a jaro.]

2. Antaŭ 100 jaroj naskiĝis Fernando de Diego de la Rosa (1919-1933-2005), hispana tradukisto, redaktoro kaj esperantisto, loĝinta en Venezuelo kaj Pollando; unu el la plej elstaraj Esperanto-tradukistoj (Cigana romancaro de F. García Lorca, 1971; La inĝenia hidalgo Don Quijote de la Mancha de M. Cervantes, 1977; Boule de suif de G. Maupassant, 1982; D-ro Jekyll kaj S-ro Hyde de R. Stevenson, 1985; La familio de Pascual Duarte de C. J. Cela, 1985; Sentempa simfonio: Poem-antologio hispana, 1987; Norda odiseado kaj aliaj rakontoj de J. London, 1988; Drolaj rakontoj de H. Balzac, 1989; Cent jaroj da soleco de G. García Márquez, 1992; La oldulo kaj la maro de E. Hemingway, 1996 k.m.a.); aŭtoro de Pri Esperanta tradukarto (1979), Nuevo método de Esperanto para clases y autodidactas (1982), Pri literatura kritiko (1984), Gran Diccionario Español-Esperanto (2003). Kunaŭtoro de Literatura Manifesto ’87, laŭreato de la OSIEK-premio (1997, pro la traduko de Cent jaroj da soleco), honora membro de UEA (1993). — Legu pli en NDK, p. 70-72.

Legu la tutan artikolon ‘Jubileoj kaj memordatoj en novembro 2019’

Intervjuo kun la redaktoro de La Ondo

La Ondo de EsperantoLa 14an de oktobro, lunde, Libera Folio publikigis intervjuon kun Aleksander Korĵenkov, la redaktoro de la ĉiumonata internacia sendependa gazeto La Ondo de Esperanto, ĵus atinginta la tricentan numeron. La redakcio de Libera Folio donis al ĉi tiu intervjuo la titolon “La redaktoro de La Ondo: Ne troviĝis dezirantoj daŭrigi nian aferon”.

Legu la tutan artikolon ‘Intervjuo kun la redaktoro de La Ondo’

Jubileoj kaj memordatoj en oktobro 2019

La Ondo de Esperanto5. Antaŭ 135 jaroj naskiĝis Georges Warnier (1884-1903-1953), franca komercisto kaj esperantisto; fondinto de Librejo de Esperanto (1906) kaj Domo de Esperanto (kun E. Archdeacon, 1928), prezidanto de la landa asocio UEF (1948-50), sekretario de la 10a UK (Parizo, 1914), prezidanto de LKK de la 24a kaj 35a UK (Parizo, 1932 kaj 1950); aŭtoro de kelkaj lerniloj, ofta partoprenanto de la Esperanto-kabaredo Tri koboldoj.

Legu la tutan artikolon ‘Jubileoj kaj memordatoj en oktobro 2019’

№300: la lasta jubileo de La Ondo

La Ondo de EsperantoLa oktobra kajero de La Ondo de Esperanto, kiu aperos post kelkaj tagoj, estos jubilea – la tricenta ekde la (re)lanĉo de ĉi tiu gazeto en majo de la 1991a jaro. Sed la jubileo havos iom amaran kromguston, ĉar ĝi estos la lasta jubileo de La Ondo, kiu aperos nur ĝis la fino de la nuna jaro.

Legu la tutan artikolon ‘№300: la lasta jubileo de La Ondo’

Halina Gorecka kaj Aleksander Korĵenkov ricevis la lastan premion de OSIEK

Foto de Aleksej Korĵenkov

Organiza Societo de Internaciaj Esperanto-Konferencoj (OSIEK) ĉiujare atribuas sian premion al vivanta esperantisto pro kultura kreaĵo precipe nefikcia en Esperanto, publikigita per ia ajn perilo (libro, kasedo, bendo, mikrofilmo, K-disko…). Okaze de traduko, la premio rekompencas la esperantigon, sendepende de la naturo de la originalo.

Kadre de ĉi-jara Internacia Esperanto-Konferenco, okazinta la 13-19an de julio en Kondoros (Hungario), la ĉeestantaj membroj de OSIEK per sekreta voĉdonado atribuis la premion al Halina Gorecka kaj Aleksander Korĵenkov (Ruslando) pro ilia komuna enciklopedia verko Nia diligenta kolegaro (NDK), kuneldonita de Sezonoj kaj Litova Esperanto-Asocio en 2018.

Legu la tutan artikolon ‘Halina Gorecka kaj Aleksander Korĵenkov ricevis la lastan premion de OSIEK’

La Unua Libro

La 14an de julio 1887 (la 26an de julio, laŭ la Gregoria kalendaro) en la presejo de Ĥaim Kelter (Varsovio) aperis la 42-paĝa broŝuro Internacia lingvo. Antaŭparolo kaj plena lernolibro (por Rusoj). Ĝia aŭtoro, la 27-jara Ruslanda judo Lazarj Markoviĉ Zamenhof (Лазарь Маркович Заменгоф), kaŝis sin sub la pseŭdonimo “D-ro Esperanto”. Ĝis la jarfino aperis pola, franca kaj germana eldonoj de la verketo, kiu poste ricevis la “popolan” titolon: la Unua Libro. Sekvis eldonoj en pluraj aliaj lingvoj.
Legu la tutan artikolon ‘La Unua Libro’

Nova eldono de Baza Literatura Krestomatio

BLKBaza Literatura Krestomatio / Komp., red. Vilmos Benczik, István Ertl, Aleksander Korĵenkov, Russ Williams; Antaŭpar. Aleksander Korĵenkov; Enkond. Vilmos Benczik; Biografioj: Vilmos Benczik, Halina Gorecka, Aleksander Korĵenkov. — 4a eld., kompl. — Kaliningrado: Sezonoj; Kaunas: Litova Esperanto-Asocio, 2019. — 368 p.; 500 ekz. — 27 eŭroj.

Baza Literatura Krestomatio (BLK) estis unue eldonita antaŭ kvardek jaroj, kiel, laŭ la klarigo de ĝia redaktoro Vilmos Benczik, “literatura minimumo en la esperantista kultura komunumo”. Ĝi entenis 134 prozajn kaj poeziajn tekstojn de 59 aŭtoroj. La tri eldonoj de BLK (1979, 1982, 1986) kun pli ol 8500 presitaj ekzempleroj delonge elĉerpiĝis. Kun afabla permeso de Vilmos Benczik la eldonejo Sezonoj (Kaliningrado, Ruslando) kunlabore kun Litova Esperanto-Asocio pretigis la kvaran eldonon. Danke al aldono de pluraj verkoj, aperintaj post 1979, la nuna eldono enhavas 199 tekstojn de 82 aŭtoroj.

Legu la tutan artikolon ‘Nova eldono de Baza Literatura Krestomatio’

La junia Ondo aperis

La Ondo de EsperantoLa junian eldonon de La Ondo de Esperanto, kiu aperis antaŭ dek tagoj je la unua junia lundo, la 3an de junio, malfermas ampleksaj intervjuoj de la vicredaktoro de La Ondo Paweł Fischer-Kotowski kun la du kandidatoj por la prezidanteco de UEA: Duncan Charters kaj Fernando Maia Jr.

Legu la tutan artikolon ‘La junia Ondo aperis’

Jubileoj kaj memordatoj en junio 2019

Ondo2. Antaŭ 90 jaroj naskiĝis Sylla Chaves (1929-1946-2009), brazila juristo, pedagogo, UN-oficisto kaj esperantisto; prezidanto de Brazila Esperanto-Ligo (1978-82), membro de la Akademio de Esperanto (1986-95), honora membro de UEA (1992), aŭtoro de lerniloj kaj beletraĵoj (Animo prisma, 1959; Por pli bona mondo, 1970; Plurnacia bukedo, 1981; Karnavalo, 1981).

Legu la tutan artikolon ‘Jubileoj kaj memordatoj en junio 2019’

Jubileoj kaj memordatoj en majo 2019

La Ondo2. Antaŭ 85 jaroj naskiĝis Gersi Alfredo Bays (1934-1947- ), brazila instruisto, eldonisto kaj esperantisto, fondinto de la revuo Fonto (1980-2006) kaj de la eldonejo Fonto, aŭtoro de la romano La Profeto el Pedras (2000), membro de Akademio de Esperanto (2000-09); honora membro de UEA (2014), laŭreato de la premio de la fondaĵo Grabowski (1990) kaj de la Esperanto-Kulturpremio de Aalen kaj FAME (1996). – Legu pli en NDK, p. 29-30.

Legu la tutan artikolon ‘Jubileoj kaj memordatoj en majo 2019’

Nia libroproduktado: la 28a resumo

Lisbono 2018: En la kongresa libroservo (Foto: Anna Striganova)

Ekde sia renaskiĝo La Ondo de Esperanto ĉiujare publikigas statistikon de la libroproduktado en Esperantujo, daŭrigante la iniciaton de Vilmos Benczik, kiun li komencis en la Budapeŝta revuo Hungara Vivo. Por tiuj, kiuj unuafoje abonas La Ondon, ni ripetu kelkajn enkondukajn frazojn, kiujn prefere ne legu niaj konstantaj abonantoj.

La bazo de nia statistiko estas la rubriko “Laste aperis” en la revuo Esperanto, en kiu estas registrataj ĉiuj libroj, kiujn la libroservo de UEA ekvendis en la aktuala jaro. La jartabelojn akompanas resumaj tabeloj por la 28-jara periodo de nia statistikado (1991-2018).

Legu la tutan artikolon ‘Nia libroproduktado: la 28a resumo’

Jubileoj kaj memordatoj en aprilo 2019

La Ondo de Esperanto1. Antaŭ 75 jaroj naskiĝis Gerrit Berveling (1944-1972- ), nederlanda instruisto, remonstranta pastoro kaj esperantisto; prezidanto de la landa asocio Esperanto Nederland (2009-12), membro de la Akademio de Esperanto (1989-), prezidanto de EVA (1993-2003), la lasta redaktoro de Fonto (1993-2006); unu el plej fekundaj Esperanto-aŭtoroj (82 libroj originalaj kaj tradukitaj); laŭreato de la OSIEK-premio pro la kvinvoluma Antologio Latina (2003). — Legu pli en NDK, p. 35-36.

Legu la tutan artikolon ‘Jubileoj kaj memordatoj en aprilo 2019’

La ĉeĥa eldono de la biografia skizo pri Zamenhof

ZamenhofĈar en nacilingvaj enciklopedioj kutime estas nur unufraza mencio pri “pola lingvisto Ludwik (aŭ Ludwig) Zamenhof, la aŭtoro de Esperanto”, ESF (Esperantic Studies Foundation) decidis eldoni modernan biografian skizon pri Zamenhof en kelkaj naciaj lingvoj.

Laŭ mendo de ESF ĝin verkis la Ruslanda ĵurnalisto Aleksander Korĵenkov surbaze de sia ampleksa verko Homarano, lanĉita en julio 2009 kadre de la 94a Universala Kongreso de Esperanto en Bjalistoko (la dua, korektita kaj ampleksigita eldono aperis en 2011).

Legu la tutan artikolon ‘La ĉeĥa eldono de la biografia skizo pri Zamenhof’