Dankon, Ondo, pro tio, ke vi reprenis la artikolon de Duncan Charters pri la labor-plano de UEA (https://sezonoj.ru/2024/05/uea-95).
Mia ĝenerala ideo estas, ke, se oni ne havas ion konkretan por fari, oni povas tre longe debati pri la unuopaj vortumoj. Mi mem preferus alian pli mallongan version, kiun mi prezentas ĉi-sube, sed samtempe mi diras, ke ĝenerale la plano estas akceptebla kun kelkaj modifoj, sed tio ne estas la ĉefa problemo. La ĉefa fakto estas, ke ĝi aperis post longa atendado kaj nun oni ĉesu paroli pri ĝi kaj ekiru al apliko.
Ĉiuokaze jen la versio, kiun mi mem preferas, sed ĝi estas samvalora kiel aliaj versioj:
MISIO
Konsciigi la publikon kaj decido-farantojn pri la logiko kaj valoro de Esperanto kiel instrumento de edukado al kunlaborema mondo, celanta problem-solvadon per justa kaj efika komunikado.
NIAJ STRATEGIAJ KOLONOJ – IRIK
1. Informado kaj komunikado
– Organizi sub la gvido de estrarano de UEA pri informado laborgrupojn kun grupestroj kaj membroj dediĉitaj al la antaŭenigo de la diversaj flankoj de informado: retejo esperanto.net; utiligo de eventoj kiel kongresoj por diskonigi Esperanton (gvidilo, trejnado); amaskomunikiloj (trejnado por kontaktoj kaj intervjuoj, preparo de materialoj);
– Sociaj retoj (oportuneco de agado, komunikado); respondoj al kritikoj kaj misprezentoj (help-dokumento, reaga teamo); kontaktoj al opinigvidantoj (politikistoj, ĵurnalistoj, edukistoj); konstanta fluo de bultenoj aŭ gazetaraj komunikoj kiuj celu eksterajn informfontojn, ne nur la internajn de UEA.
2. Rilatoj kun la ekstera mondo
– Daŭrigi subtenon de oficejoj kaj agado ĉe UN, Unesko kaj aliaj internaciaj organizaĵoj.
– Subteni CED kaj ESF en la daŭra organizado de konferencoj, simpozioj, seminarioj kiuj helpas al niaj partneroj atentigi pri lingvaj rajtoj, lingva diskriminacio, solvoj por komunikaj problemoj.
– Kuraĝigi esperantistojn al aktiva engaĝiĝo kun lokaj asocioj havantaj mondan perspektivon.
– Organiziĝi kaj prepariĝi por peti agnoskon de Esperanto (Esperanto-Tago, asembleoj de UN, Unesko, kaj iliaj neregistaraj organizaĵoj [NROj], parlamentoj).
– Diskonigi kaj kuraĝigi al partopreno esperantistajn kaj interesantajn esploristojn en konferencoj, eldonprojektoj.
3. Instruado
– Kunlabori kun ILEI por helpi realigi ĝiajn celojn rilate instruadon de Esperanto en la lernejoj.
– Subteni la laboron de edukado.net kaj la KER-ekzamenoj por kvalifiki instruistojn.
– Kuraĝigi al subvencipetado por helpi lernejojn kaj edukajn instancojn atingi siajn celojn uzante Esperanton kiel instrumenton por transnacia interkompreniĝo.
– Subteni projektojn kiel la 30 Oraj Horoj kaj la Multlingva Akcelilo por progresi al organizitaj internaciaj eksperimentoj pri la valoro de Esperanto kiel eduka instrumento, faciliganta lingvolernadon kaj transkulturan interkomprenon inter samaĝaj lernejanoj.
4. Kunlaborado
Ni faciligu kunlaboradon inter esperantistoj per la jenaj rimedoj:
– Modernigita retejo por aŭtomatigi administrajn kaj financajn procedurojn, faciligi servojn al la membroj per provizo de necesaj kontaktoj, materialoj, mendiloj, aliĝiloj, membreco-renovigoj.
– Trijara Almanako reta kaj presita por kunigi ĉiujn necesajn informojn pri la Asocio, ĝiaj Landaj Asocioj kaj reprezentantoj, kunlaborantaj partneroj, agadraportoj, estontaj planoj.
– Doni pli da subteno al Landaj Asocioj kaj kuraĝigi al pli da interasocia kunagado.
– Krei komisionojn portempajn kaj longdaŭrajn por atingi difinitajn celojn.
– Atentigadi pri la neceso kunlaborigi malsamcelajn individuojn por realigi komunajn projektojn.
PLANOJ
Nun ni bezonas eklabori laŭ la plano aperigita de Duncan aŭ laŭ mia plano, kaj por fari tion ni bezonas havi kvar unupaĝajn subplanojn pri la unuopaj punktoj.
Informado. Tio prezentas grandajn problemojn, ĉar de la fino de la pasinta jarcento UEA ĉesis okupiĝi pri informado, ne la membroj, kiuj en siaj urboj daŭre produktis Esperanto-stratojn, sed la centraj fortaj povoj, kaj do nun repreni la aferon estos aparte malfacile. Oni povus re-ek-iri de www.esperanto.net, kiu devis esti la juvelo en ĉi tiu kampo kaj povus ankoraŭ esti kun iom da polurado. La gvido devus esti “Se homoj ne lernas Esperanton, ĉio cetera estas senutila”.
Rilatoj. Tio prezentas malpli da problemoj, laŭ mi, kaj ni devus peti la reprezentantojn ĉe UN kaj Unesko kaj ESF kaj CED redakti tiun unupaĝan planon.
Instruado. Ankoraŭ pli facile. Ĉar UEA transdonis instruadon al ILEI, ni simple petu ILEI-n produkti tiun unupaĝan planon, sen revoj sed kun konkrete atingeblaj celoj.
Kunlaborado. Tio estas tre malfacila. Sub tiu vorto kaŝiĝas la reorganizo de la Centra Oficejo de UEA en la nuna reta mondo. Iam la Centra Oficejo de UEA estis unu el la bazaj elementoj de la Esperanto-Movado. Gi faris ĉion, sciis ĉion, respondis al ĉiuj petoj el ĉiuj anguloj de la mondo kaj ne havis komputilojn. Ĝi faris tion per homoj kaj homa inteligento. Nun tio ne plu eblas, ĉar oni devas uzi komputilojn kaj artefaritan inteligenton. Sed eĉ la artefarita inteligento atentus la ordonon: “La Esperanto-movado estas unu kaj UEA estas ĝia centro”, se iu donus ĝin. Post tio oni povas reorganizi la oficejon rete kaj malcentre kun oficistoj unu en Kanado kaj unu en Japanujo, sed kunordigataj de reta superĝenerala direktoro. Eliri el tiu kaĉo ne estos facila, sed la estraro varbu la konsilojn de la konsilemaj komitatanoj kaj ne igu la komisionanojn foriri pro laciĝo.
LABOROJ
Atendinte dum kvin jaroj ĉi tiun paĝon, nun estus donkiĥote plenumi la laboron en unu jaro, sed ni komencu por lasi al la posta estraro kadron jam ekfunkciintan.
Mi mem pretas redakti la subplanon por informado kunlabore kun ĉiuj interesigantoj kaj mi pretas funkcii kiel sekretario de Duncan por kolekti la konsilojn kaj la helpojn por pluredakti la subplanojn kaj por trovi laborantojn pri ili.
Kaj jen la vera mesaĝo de ĉi tiu artikolo: se vi pensas, ke vi povas esti taŭgaj kandidatoj por la venonta estraro de UEA, kontaktu min. UEA bezonas kuraĝulojn, kiuj konsentas pri la misio kaj pretas labori por ĝi.
Kontaktu min ankaŭ se vi pensas, ke vi ŝatus kunlabori en unu el la kreotaj labor-grupoj pri la kvar punktoj.
Renato Corsetti
renato.corsetti@gmail.com
Legu ankaŭ:
Duncan Charters: Strategia laborplanado – ĉu resumebla?
https://sezonoj.ru/2024/05/uea-95/
Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2024/06/corsetti-4
“La Ondo” en Telegramo: t.me/esperanto_news
Alklaku la supran bildon por vidi la abonmanierojn.
