Dum la Sovetunia periodo la Baltiaj Esperanto-Tagoj (BET) por la esperantistoj de USSR anstataŭis la Universalajn Kongresojn de Esperanto, kiujn sovetunianoj preskaŭ ne povis partopreni. Komence la aranĝoj nomiĝis Ĉebaltaj Esperantistaj Tendaroj (ĈET), poste Baltiaj Esperanto-Tendaroj (BET) kaj fine Baltiaj Esperanto-Tagoj (BET). La plej unua ĈET okazis la 1-14an de aŭgusto 1959 en Baltezers (Latvio) kun nur 48 partoprenantoj. Ekde tiam ĈET/BET estis okazigata laŭvice en Latvio, Estonio kaj Litovio.
BEToj ankaŭ iusence anstataŭis Baltiajn Esperanto-asociojn, kiujn ne eblis fondi en Sovetunio, kaj servis kiel organiza kaj kunlabora forumo por esperantistoj de la tiutempaj Baltiaj respublikoj de Sovetunio.
BEToj ne okazis en 1973 kaj dum 1979-1982, ĉar tiutempaj Sovetuniaj instancoj ne permesis organizi ilin. En 1992 en Litovio BET ne okazis, ĉar tiujare Litoviaj esperantistoj gastigis la 65an kongreson de SAT, tamen ĉi tiu kongreso enhavis ĉiujn ĉefajn programerojn de BEToj, kaj eblas konstati, ke la tradicio ne estis rompita. Pro la koronvirusa pandemio BET-56, planita por Latvio, ne povis okazi en 2020 kaj 2021, kaj ĝi okazis en julio 2022 en la Litovia havenurbo Klajpedo.
Necesas mencii, ke el BEToj evoluis ankaŭ la famaj SEJToj (Sovetiaj Esperantistaj Junularaj Tendaroj). SEJToj komencis sian vivon en Litovio – en 1967 BET-9 okazis en Vilno, kaj samtempe junuloj okazigis en la Litovia urbeto Kaltanėnai la unuan junularan tendaron, kiu ricevis la titolon SEJT-9. BET tre rapide kreskis al tutsovetia aranĝo, kaj post la sendependiĝo de la tri Baltiaj landoj ĝi iĝis internacia kongreso, kiun partoprenas esperantistoj el pluraj Eŭropaj landoj.
Ĉi-sube estas la tabelo de BEToj, preparita de Petras Čeliauskas. Ĝi antaŭ kelkaj jaroj aperis en Litova Stelo, kiun Čeliauskas redaktis, kaj nun ĝi reaperas en ĝisdatigita formo.
En la postsovetunia periodo la plej amasaj estis tiuj BEToj, kiuj okazis en Litovio. Nur unu fojon (BET-46 en 2010) BET en Litovio havis malpli ol 200 partoprenantojn. Tiu tendenco estas facile klarigebla — la Esperanto-movado en Litovio estas pli amasa kaj pli vigla ol en Latvio kaj Estonio.
En la novaĵretejo La Ondo de Esperanto aperis ciklo de artikoloj pri la Litoviaj BEToj ekde ĈET-3 en Molėtai (1961) ĝis BET-56 en Klajpedo (2022).
Povilas Jegorovas
| Numero | Jaro | Loko | Lando | Partoprenantoj |
| ĈET-1 | 1959 | Baltezers | Latvio | 48 |
| ĈET-2 | 1960 | Kääriku | Estonio | 107 |
| ĈET-3 | 1961 | Molėtai | Litovio | 204 |
| ĈET-4 | 1962 | Drabeši | Latvio | 238 |
| BET-5 | 1963 | Värska | Estonio | 288 |
| BET-6 | 1964 | Veisiejai | Litovio | 153 |
| BET-7 | 1965 | Saulaine | Latvio | 171 |
| BET-8 | 1966 | Pärnu | Estonio | 117 |
| BET-9 | 1967 | Vilnius | Litovio | 337 |
| BET-10 | 1968 | Ruba | Latvio | 194 |
| BET-11 | 1969 | Viljandi | Estonio | 400 |
| BET-12 | 1970 | Kretinga | Litovio | 316 |
| BET-13 | 1971 | Smiltene | Latvio | 189 |
| BET-14 | 1972 | Häädemeeste | Estonio | 170 |
| BET-15 | 1974 | Rīga | Latvio | 102 |
| BET-16 | 1975 | Helme | Estonio | 222 |
| BET-17 | 1976 | Viekšniai | Litovio | 241 |
| BET-18 | 1977 | Rēzekne | Latvio | 223 |
| BET-19 | 1978 | Kehra | Estonio | 174 |
| BET-20 | 1983 | Noreikiškės | Litovio | 358 |
| BET-21 | 1984 | Kuldīga | Latvio | 299 |
| BET-22 | 1985 | Kose | Estonio | 450 |
| BET-23 | 1986 | Smalininkai | Litovio | 472 |
| BET-24 | 1987 | Saulaine | Latvio | 406 |
| BET-25 | 1988 | Tallinn | Estonio | 350 |
| BET-26 | 1989 | Noreikiškės | Litovio | 608 |
| BEK-27 | 1990 | Jelgava | Latvio | 435 |
| BET-28 | 1991 | Tartu | Estonio | 422 |
| SAT-65 | 1992 | Noreikiškės | Litovio | 452 |
| BET-29 | 1993 | Priekuli | Latvio | 50 |
| BET-30 | 1994 | Pärnu | Estonio | 100 |
| BET-31 | 1995 | Girionys | Litovio | 203 |
| BET-32 | 1996 | Jūrmala | Latvio | 208 |
| BET-33 | 1997 | Haapsalu | Estonio | 162 |
| BET-34 | 1998 | Veisiejai | Litovio | 253 |
| BET-35 | 1999 | Liepāja | Latvio | 163 |
| BET-36 | 2000 | Tallinn | Estonio | 201 |
| BET-37 | 2001 | Noreikiškės | Litovio | 303 |
| BET-38 | 2002 | Rīga | Latvio | 182 |
| BET-39 | 2003 | Tartu | Estonio | 76 |
| BET-40 | 2004 | Birštonas | Litovio | 257 |
| BET-41 | 2005 | Rīga | Latvio | 150 |
| BET-42 | 2006 | Kuresaare | Estonio | 137 |
| BET-43 | 2007 | Šiauliai | Litovio | 322 |
| BET-44 | 2008 | Ventspils | Latvio | 151 |
| BET-45 | 2009 | Paikuse | Estonio | 121 |
| BET-46 | 2010 | Visaginas | Litovio | 185 |
| BET-47 | 2011 | Malpils | Latvio | 115 |
| BET-48 | 2012 | Pala | Estonio | 44 |
| BET-49 | 2013 | Utena | Litovio | 216 |
| BET-50 | 2014 | Jūrmala | Latvio | 172 |
| BET-51 | 2015 | Tallinn | Estonio | 74 |
| BET-52 | 2016 | Birštonas | Litovio | 334 |
| BET-53 | 2017 | Liepāja | Latvio | 203 |
| BET-54 | 2018 | Pärnu | Estonio | 70 |
| BET-55 | 2019 | Panevėžys | Litovio | 450 |
| BET-56 | 2022 | Klaipėda | Litovio | 263 |
| BET-57 | 2023 | Ventspils | Latvio | 117 |
| BET-58 | 2024 | Tartu | Estonio | – |
| BET-59 | 2025 | Kaunas | Litovio | – |
Legu ankaŭ
Vytautas Šilas: Aspiranto kaj Esperanto
Pliaj informoj pri BET-59 kaj pri BEToj ĝenerale estas legeblaj en la speciala rubriko de nia retejo.
Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2021/08/bet-11
“La Ondo” en Telegramo: t.me/esperanto_news
Klaku la supran bildon por vidi la abonmanierojn.
