La 2-5an de novembro 2023 en Fortalezo (Brazilo) samtempe okazos kvar kongresoj: 10a Tutamerika Kongreso de Esperanto, 57a Brazila Kongreso de Esperanto, 41a Brazila Esperantista Junulara Kongreso, 8a Cearaa Kongreso de Esperanto. La kongresa temo estas “Homaj rajtoj, solidareco kaj memdetermino de popoloj”.
Fortalezo (ĉ. 2,7 milionoj da loĝantoj) estas la ĉefurbo de la brazila subŝtato Cearao, troviĝanta en la nordorienta marbordo de Brazilo. Ĝi estas konata pro la blankaj sablaj plaĝoj, tropika klimato kaj riĉa kulturo. La urbo ofertas multajn opciojn por amuzaĵoj, kiuj inkluzivas vivajn muzikaĵojn, regionajn kuirartojn, merkato de artefaraĵoj kaj ekscita noktovivon. En Fortalezo jam okazis du gravaj Esperanto-kongresoj: la 87a Universala Kongreso de Esperanto (2002) kaj la 70a Internacia Junulara Kongreso de TEJO (2014)
Laŭ Vikipedio “La Tut-Amerika Kongreso de Esperanto (TAKE) komenciĝis kiel neregula renkontiĝo de amerikaj esperantistoj, kaj ekde la tria, ĝi okazas ĉiun trian jaron, kunvokita de la Amerika Komisiono de UEA, kaj organizita de la Loka Kongresa Komitato (LKK)”.
Ĝis nun TAKE okazis naŭfoje:
1. 1978. Marilio, Brazilo. 420 partoprenintoj el 11 landoj.
2. 1980. San Luis, Argentino.
3. 1996. San-Joseo, Kostariko. 50 aliĝintoj el 17 landoj, la kongresa temo: “Tut-Amerika Agado”.
4. 1999. Bogoto, Kolombio. 76 aliĝintoj el 22 landoj, la kongresa temo: “Esperanto kaj la Tria Jarmilo”.
5. 2001. Meksikurbo, Meksiko. 169 aliĝintoj el 29 landoj, la kongresa temo: “Ameriko: Unu Kontinento, Diversaj Historioj”.
6. 2004. Havano, Kubo. 178 partoprenintoj el 19 landoj, la kongresa temo: “Kia Esperanto-movado por Ameriko?”
7. 2008. Montrealo, Kanado. 222 aliĝintoj el 24 landoj, la kongresa temo: “Ekosistemoj, lingvoj, kulturoj : diverseco por daŭripova evoluigo en la Amerikoj”.
8. 2011. San-Paŭlo, Brazilo. Ĉ. 400 partoprenintoj, la kongresa temo: “Procezo de regiona integriĝo en la Amerika kontinento, la rolo de Esperanto”.
9. 2018. Havano, Kubo; 232 partoprenintoj el 20 landoj; la kongresa temo: “Lingvoj kaj kulturoj: edukado por daŭripova evoluo en la Amerikoj”.
Pliaj informoj kaj la aliĝilo estas en la kongresa retejo https://esperanto.org.br/kongreso/
La red.
Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2023/03/ameriko-2
Alklaku la supran bildon por vidi la abonmanierojn.
