Jubileoj kaj memordatoj en oktobro 2017

Hodler1. Antaŭ 130 jaroj naskiĝis Hector Hodler (1887-1920), ĵurnalisto kaj esperantisto, kunfondinto kaj kunredaktoro (kun Edmond Privat) de Juna Esperantisto (1903), posedanto kaj redaktoro de la revuo Esperanto (1907-20); kunfondinto (1908), vicprezidanto (1908-11), direktoro (1911-19) kaj prezidanto (1919-20) de UEA; la ĉefideologo de UEA. Testamentis al UEA grandan monsumon, la revuon Esperanto kaj sian bibliotekon.

10. Antaŭ 100 jaroj naskiĝis Ralph Lindsay Harry (1917-2002), aŭstralia diplomato, direktoro de la aŭstralia sekretservo ASIS (1957-60), verkisto kaj esperantisto; prezidanto de Aŭstralia E-Asocio (1960-61, 1986-88), vicprezidanto de la jurista asocio IEAJ (1979-87). Harry tradukis en Eon kelkajn oficialajn dokumentojn de UN kaj verkis kelkajn librojn, i.a., sportajn vortarojn por la Olimpikoj en Munkeno (1972) kaj Montrealo (1976).

15. Antaŭ 80 jaroj pro partopreno en la agado de kontraŭrevolucia trockiista esperantista organizaĵo SEU estis pafekzekutita Eŭgeno Miĥalski (Евгений Иосифович Михальский, 1897-1937), bibliotekisto, instruisto kaj esperantisto, talenta poeto, aŭtoro de la poemaroj Prologo (1929), Fajro kuracas (1932) kaj Kantoj de amo kaj sopiro (1934).

16. Antaŭ 25 jaroj forpasis Antanas Poška (1903-1992), litova kaj sovetunia antropologo, arkeologo, vojaĝanto, ĵurnalisto kaj esperantisto. Poška preparis kaj realigis siajn vojaĝojn per Esperanto, parolis en Esperanto-programoj de Litovia Radio (Kaŭno), estis prezidanto de Litova Esperanto-Asocio antaŭ ties likvido en 1940. Post reveno el ekzilo en Centra Azio (1945-1958) li reaktiviĝis kaj en la 1960aj jaroj prezidis la Esperanto-klubon en Vilno.

26. Antaŭ 20 jaroj forpasis Rikardo Ŝulco (Richard Schulz, 1906-1997), gimnazia lingvoinstruisto, esperantisto, fondinto de la “Analiza Skolo”, aŭtoro kaj tradukinto de pluraj libroj, i.a.: Mein geliebtes Esperanto (1976), La perdita honoro de iu Katarino Blum’ (Heinrich Böll, 1978), Pledo por Unueca Lingvo (1985), Sur la Vojoj de la Analiza Skolo (1987) k. m. a.

27. Antaŭ 80 jaroj “pro fondo kaj gvidado de kontraŭsovetunia trockiista terorista organizo de esperantistoj kun la celo efektivigi en ĝia kadro sabotan-teroristan agadon kaj spionadon por Germanio” estis pafekzekutita Ernest Drezen (Ernests Vilhelms Drēziņš, 1892-1937), latva sovetunia terminologo, ŝtatoficisto, interlingvisto kaj esperantisto. De 1921 ĝis 1936 li gvidis la Esperanto-movadon en Sovetunio, kontraŭstaris sennaciismon de Lanti en SAT. Inter liaj verkoj elstaras Historio de la Mondolingvo (E-versio, 1931) kaj Analiza historio de Esperanto-movado (1931).

29. Antaŭ 120 jaroj naskiĝis Jakobo Ŝapiro (Jakub Szapiro, 1897-1941), pollanda juda ĵurnalisto kaj esperantisto, kunfondinto (1922) kaj prezidanto (de 1924) de Esperanto-Societo “Ludoviko Zamenhof” en Bjalistoko, aŭtoro de Babiladoj de Bonhumora Zamenhofano (1921). Mortpafita (kun multaj bjalistokaj judoj) de germanaj nazioj post la invado en Bjalistokon.

Kompilis Aleksander Korĵenkov

Ĝi estas artikolo el la oktobra numero de La Ondo de Esperanto (2017).
Ĉe represo bonvolu nepre indiki la fonton:
Papere: La Ondo de Esperanto, 2017, №10.
Rete: La Balta Ondo https://sezonoj.ru/2017/10/oktobro-3

Ondo

Klaku la supran bildeton por vidi la abonmanierojn

Pri La redakcio

Aleksander Korĵenkov, la redaktanto de ĉi tiu retejo
Tiu ĉi enskribo estis afiŝita en Esperantujo kaj ricevis la etikedo(j)n , , , , , , . Legosigni la fiksligilon.

Respondi