En 2016 ni prognozis deficiton de ĉ. 40.000 eŭroj, kiu fariĝis reale 48.000 eŭroj (la detaloj troviĝas en la financaj raportoj pretigitaj por la kunveno en Seulo). Tio donas ĝeneralan indikon pri longdaŭra malekvilibro inter kostoj kaj rimedoj en la nuntempa funkciado de UEA.
En 2017 ni proponis redukti la deficiton ĝis ĉ. 10.000 eŭroj. Tiu plano tamen dependis i.a. de nia sukceso trovi novajn monfontojn, precipe en la formo de subvencioj kiuj kovrus administrajn kaj aliajn kostojn listigitajn en la Spezokonto, aŭ kiuj helpus nin kreskigi niajn enspezojn. Kvankam ni faris iom da progreso tiurilate, tiuj enspezoj ankoraŭ ne atingis la celitan nivelon, kaj kontraŭpezas kelkaj negativaj evoluoj, inkluzive de kongreso en Seulo kiu estis malpli granda ol antaŭvidite, membrara malkresko, kaj daŭra falo en la enspezoj pro niaj investoj (rubriko “Rento”). La ĉefa ŝparo estis ĉe Oficistaro, pro longdaŭra malsano de unu oficisto, por kiu ni ricevas partan kompenson de la sanasekuro.
Resume, jen la ĉefaj antaŭvideblaj diferencoj rilate al la buĝeto:
Kostoj
Salajroj:22.000 EUR
Revuo:5.000 EUR
Jarlibro:2.000 EUR
Sume: 29.000 EUR malpli ol buĝetite.
Rimedoj
Kotizoj:20.000 EUR
Libroservo:2.000 EUR
Subvencioj:70.000 EUR
Volontula:2.000 EUR
Rento:17.000 EUR
UK:15.000 EUR
Sume: 126.000 EUR malpli ol buĝetite.
Laŭ tio eblas taksi, ke la fina jara deficito povus esti inter 90.000 – 110.000 eŭroj, prenante en konsideron la necertecon de la evoluo en la lastaj monatoj de la jaro kaj la kontribuon de aliaj rubrikoj al la fina rezulto.
El tio evidentas i.a. la urĝeco de la renovigoj, kiujn nia Estraro laboras por enkonduki kunlabore kun la Ĝenerala Direktoro kaj la Centra Oficejo. Ni devas allogi pli da membroj el la novaj generacioj, kaj pli efike mastrumi kaj teni ilin. Ni devas uzi la laborfortojn de la movado por gajni pli da mono el nemovadaj fontoj. Ni devas efikigi niajn bazajn servojn kaj administradon por fari ilin malpli kostaj kaj pli glate funkciantaj, kaj allogi pli da homoj al niaj kongresoj. Ni devas investi en novaj servoj, kiel Amikumu, kiuj respondas al la nuntempaj deziroj kaj bezonoj de esperantistoj. Ĉi tiuj ŝanĝoj estas ja survoje, eĉ se ili ankoraŭ ne sufiĉe progresis por pozitive influi la financojn en la nuna jaro. En nia reprilaborita buĝetpropono por la venonta jaro oni komencos vidi iliajn sekvojn.
Mark Fettes
Martin Schäffer
Laŭ yahoo-grupo komitato-de-uea
Ĝi estas artikolo el la oktobra numero de La Ondo de Esperanto (2017).
Ĉe represo bonvolu nepre indiki la fonton:
Papere: La Ondo de Esperanto, 2017, №10.
Rete: La Balta Ondo https://sezonoj.ru/2017/09/uea-30
Klaku la supran bildeton por vidi la abonmanierojn
