La 22an de aŭgusto 2017 en Bundang (Koreio) en la aĝo 94 jaroj forpasis
Han Moo-hyup (1923–2017)
Li naskiĝis la 22an de aŭgusto 1923 en Pjongjango. Li estis emerita dustela generalo de la Korea Armeo, esperantisto ekde 1976, prezidanto (1979-1981, 1990-1994) kaj honora prezidanto (1994-) de Korea Esperanto-Asocio. Li eldonis la gazeton La Espero el Koreio (1976-1994) kaj estis LKK-prezidanto de la 79a Universala Kongreso de Esperanto en Seulo (1994).
Diplomiĝis ĉe la postdiploma lernejo de la Nacia Defenda Universitato (1957), kaj ĉe la politika kaj diplomatia fako de la universitato Dankook (1962). Ĉefdirektoro de la lerneja fondaĵo Kumoh (1975-1977); ĝenerala direktoro de la mar- kaj fajr-asekura kompanio Dongbang (1977-1981).
Li verkis la librojn Soldato kaj Respondeco (1975) kaj Administrado kaj Respondeco (1980). Korea Esperanto-Asocio eldonis la memorlibron en 2015 sub la titolo Dediĉe al Uyang Han Moo-hyup.
Dum multaj jaroj li estis mecenato de la Korea Esperanto-movado. En 1995 li estis elektita kiel Honora Membro de UEA.