La 30an de aŭgusto 2017 en la aĝo 93 jaroj forpasis
Marjorie Boulton (1924–2017)
Instruistino de la anglaj lingvo kaj literaturo en lernejoj ordinaraj kaj porinstruistaj, direktorino de porvirina pedagogia kolegio Charlotte Mason College en nord-okcidenta Anglio, doktoriĝinta en Oksfordo (1976) per disertacio pri la angla romanisto Charles Reade. Ŝi verkis angle poemaron, literaturologiajn librojn, tradukis kelkajn verkojn en la anglan, sed sian famon ŝi akiris kiel la plej granda poetino kaj dramverkistino en Esperanto.
Lerninte Esperanton en 1949, ŝi jam en 1951 verkis en ĝi sian unuan poemon (Marborda ŝtono), ekde 1952 ricevis 22 premiojn kaj laŭdajn menciojn en la Belartaj Konkursoj de UEA pro poemoj, prozaĵoj kaj teatraĵoj. Ŝia unua poemaro Kontralte aperis en 1955, sekvis pliaj poemaroj, dramlibroj kaj nefikciaj libroj, interalie, biografioj de Ludoviko Zamenhof (en Esperanto kaj angle) kaj Julio Baghy. Ŝiaj verkoj estas tradikitaj en la anglan, hungaran, italan, kroatan, japanan, litovan, polan, portugalan, rumanan, slovenan, ukrainan kaj vjetnaman lingvojn. La Esperanta PEN-Centro kelkfoje proponis ŝin kiel kandidaton por la literatura Nobel-premio. Ŝia progresiga legolibro Faktoj kaj fantazioj (1984) estas unu el la plej multe venditaj libroj en la libroservo de UEA.
Marjorie Boulton estis membro de Akademio de Esperanto dum 50 jaroj ekde 1967 (la plej longtempa akademianeco inter la nunaj akademianoj). Dum pli ol 30 jaroj ŝi estis prezidanto de Rondo Kato / Esperantista Kat-Amikaro. Honora Membro de UEA (1985); laŭreato de la Esperanto-Kulturpremio de la urbo Aalen kaj FAME (1998), de la premio Deguĉi (2004) kaj de la premio de la Fondaĵo Grabowski (2014).
Ni funebras kaj kondolencas.
Halina Gorecka
Aleksander Korĵenkov
Legu pli pri Marjorie Boulton en la artikolo de Antonio Valén, publikigita kadre de la rubriko “Nia Trezoro” en La Ondo de Esperanto (2012, №11) kaj en nia novaĵretejo: https://sezonoj.ru/2012/11/217boulton/
Ĉi tiu artikolo aperis en la novaĵretejo La Ondo de Esperanto.
Ĉe represo aŭ citado bonvolu indiki la fonton:
La Ondo de Esperanto https://sezonoj.ru/2017/08/marjorie-boulton-forpasis
La Zamenhof-biografio de Marjorie Boulton estis la unua libro en Esperanto, kiun mi legis. Kvankam tio okazis antaŭ 49 jaroj, mi rememoras tiun travivaĵon, kvazaŭ ĝi okazus antaŭ nelonge. Konatiĝi per tiu libro kun la idea fono de Esperanto estis unu el la aferoj, kiuj plej kaptis min por la lingvo.
Antaŭ ol mi aperis en E–ujo, studinta sola dum naŭ jaroj, finlegis mi “Zamenhof Creator of Esperanto”. Nur el tiu ĉi iel “seka”, do facile, alloge legebla biografio, lernis mi, ke la aŭtoro de lingvo nia “mankis el la mondo” posttagmeze.