Dum la jaro 2017, anoncita de Unesko kiel Zamenhof-Jaro, en Pollando oni festas ankaŭ la Jaron de Vistulo. Pro la eventoj, ni anoncas internacian konkurson por versaĵoj en la internacia lingvo Esperanto je la temo Ĉe la rivero Vistulo.
Pollando, kiun trafluas la granda, pitoreska rivero Vistulo, estas larĝe konata de esperantistoj el la tuta mondo kaj ofte estas nomata “la lando ĉe Vistulo”. La rivero dum jarcentoj estis grava komerctrako kaj danke al tio kreskis ĉe ĝi riĉaj, belaj urboj kiel Krakovo, Varsovio, Toruń, Gdańsk. La rivero daŭre influas la vivon de la tuta lando. Ĉe Vistulo naskiĝis Esperanto. Loĝis tie, agis kaj laboris multaj eminentaj poloj. En la ĉevistulaj urboj okazis Esperanto-kongresoj kaj multaj aliaj Esperanto-aranĝoj. De la polaj montoj ĝis la Balta Maro ravas kaj allogas turistojn tre diversaj regionoj kun pitoreska naturo kaj elementoj de la tradicia pola kulturo.
Ni atendas versaĵojn priskribantaj viajn impresojn,rimarkojn, rememorojn pri homoj, lokoj kaj okazintaĵoj en nia “ĉevistula lando”.
Regularo de la konkurso
– En la konkurso povas partopreni ĉiuj esperantistoj, sendepende de la aĝo kaj loĝloko;
– Ĉiu aŭtoro powas sendi 1-3 versaĵojn, mem verkitaj kaj ĝis nun nenie publikigitaj;
– La fina tempo por sendi la tekstojn estas la 30a de septembro 2017;
– Senditajn versaĵojn pritaksos speciala ĵurio;
– Laŭreatoj ricevos premiojn kaj distingojn;
– Elektitaj konkursaĵoj povos esti publikigitaj en la Esperanto revuoj
– La tekstojn por la konkurso, kun la nomo kaj adreso de aŭtoro, oni povas sendi per la tradicia poŝto aŭ elektronikforme al Teresa Nemere poŝte (str. Moniuszki 33/4, PL 87-100 Toruń) aŭ rete teresa.nemere@op.pl
Finalo
La festa finalo de la konkurso okazos sabate, la 9an de decembro 2017, je la 12a horo en la Junulara Kulturdomo en Toruń, strato Przedzamcze 11/15,
Ni esperas, ke dum la Zamenhof-Jaro esperantistoj kontribuos ankaŭ al nia landa festado, rememoriganta la belecon kaj valoron de Vistulo – “la reĝino de polaj riveroj” Bonvolu partopreni en la konkurso kaj informi pri ĝi viajn geamikojn.
Pola Esperanto Asocio
Junulara Kulturdomo en Toruń
Redakcio de Pola Esperantisto
