Eŭropo kaj principoj

Vide el Bruselo

Siria familio fuĝanta al Eŭropo (Foto de EK)

Unu plian fojon gvidantoj de la landoj de la Eŭropa Unio (EU) renkontiĝis en Bruselo por diskuti la problemon de migrantoj. La 15an de oktobro ili aprobis novan agadplanon, per kiu ili esperas ĉesigi la alfluon de migrantoj al Eŭropo. Ĉi-foje la agadplano enhavas la promeson doni ĉ. tri miliardojn da eŭroj al Turkio por helpi haltigi rifuĝantojn ekster la limoj de EU. EU ankaŭ certigos pli facilan vojaĝadon por turkiaj ŝtatanoj ene de la Ŝengenaj ŝtatoj – Eŭropaj landoj sen internaj limoj. Ankaŭ estos pli da mono kaj homoj por la limprotekta agentejo Frontex.

La agadplano ne estas neta, kaj atendos ĝin malfacilegaj diskutoj en decembro, interalie, pro tio, ke EU nun parolas pri pli energia negocado de la Turkia membreco en EU. Sed en la plano ne estas rekta promeso, ke Turkio povos aliĝi al EU.

Kompreneble, la premo reagi al la migranto-alfluo estas granda por la Eŭropaj ĉefoj. Oni supozas, ke ĉi-jare preskaŭ 600 mil migrantoj atingis la Eŭropan Union. Kvankam 70% el ili vojaĝas de Turkio al Grekio, oni devas konstati, ke Turkio ĝis nun akceptis jam ĉirkaŭ du milionojn da rifuĝintoj – multe pli ol Eŭropo. Multaj el tiuj, kiuj trovis rifuĝon en Turkio, ne volis resti en ĉi tiu lando kaj daŭrigis sian vojaĝon norden: ĉefe al Aŭstrio, Germanio kaj Svedio. Multaj sirianoj plendas, ke ili estas mistraktataj en Turkio.

La Siria krizo okazas en la tempo, kiam la registaro de Turkio – cetere, antaŭ la voĉdonado en la lando – montras sin malpli respektema al la rajtoj de sia propra kurda minoritato kaj de aliaj Turkiaj minoritatoj. Multaj homoj en Turkio timas la kreskantan potencon de la registaro kaj ties perfortemon en la konflikto kun kurdoj.

Prezidanto de la Eŭropa Konsilio Donald Tusk sentas nur “singardan optimismon” rilate al la interkonsento kun Turkio. Tamen lia “singarda optimismo” ŝajne ne rilatas al la manko de demokratiaj principoj malantaŭ la interkonsento. Sed ĉu Turkio faros tion, kion Eŭropo volas?

Intertempe, pli ol 3000 homoj mortis vojaĝante al EU. Ĝuste je la tago de la Brusela pintkunveno bulgaraj limgardistoj mortpafis la unuan homon ĉe la landlimo. Ĉi tiu viro el Afganistano estas unu el granda grupo da homoj, kiuj provas eniri Bulgarion. Kvin membroj de unu familio dronis en la maro inter Turkio kaj Grekio…

Dum la gravaj diskutoj en Bruselo oni evidente pli kaj pli forgesas la devon helpi rifuĝintojn.

Dafydd ab Iago

Ĉi tiu artikolo saperis en la novembra kajero de La Ondo de Esperanto (2015).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2015, №11.
Rete: La Balta Ondo http://sezonoj.ru/2015/10/bruselo-25

Pri La redakcio

Aleksander Korĵenkov, la redaktanto de ĉi tiu retejo
Tiu ĉi enskribo estis afiŝita en Vide el Bruselo kaj ricevis la etikedo(j)n , , , , , . Legosigni la fiksligilon.

3 Responses to Eŭropo kaj principoj

  1. Hontinda estas, ke la eŭropanj dum tri jaroj nenion faris kontraŭ la kaŭzo de la fuĝo. Najbaraj landoj de sirio akceptis milionojn da rifiĝantoj sen sufiĉa helpo. Oni ne parolis pri homaraneco, se ili estas devigataj vivi en tendoj sen sufiĉe da nutraĵo, sanservo kaj klerigado (jordanio) aŭ estas ekspluatada kiel malmultekostaj laboruloj (turkio).
    La Eŭropanoj rifuzis (kiel kutime) negoci kun “la diktatoro” pri ĉeso de la enlanda batalo kaj liveris armilojn al la grupoj, de kiuj oni esperis, ke ili venkos.
    Ĉi tio hipokrita politiko estas la vera kialo de la nuna problemo.
    Oni povas lamenti pri la rifuĝintoj, sed la situacio estas “membakita”
    La mono, kiun oni nun investas en bariloj, gardistoj kaj la enlanda traktado de tiuj, kiuj tamen sukcesas pasi, estas pli efike uzebla per rekta subteno en la koncerna regiono.

  2. Tjeri diras:

    …500 milionoj da eŭropaj loĝantoj… kompreneble

  3. Tjeri diras:

    Registaroj de 500 milionoj de eŭropaj loĝantaroj disputas pri kiel ne akcepti kelkmilojn da rifuĝintoj fuĝantajn bombadon… kia nekredebla fikonduto! kia hontinda manko de homaraneco!

Respondi