Ĉi-jare en la tritaga lingvotrejnado por komencantaj kaj komencintaj esperantistoj partoprenis 31 personoj el 13 urboj de Ruslando kaj esperantisto el Korea Respubliko Kim Youngung (Heroo), vojaĝinta tra la vintra Ruslando per la Transsiberia fervojo. La januaran lernosesion organizis interurba teamo, gvidata de Raja Kudrjavceva el Jekaterinburgo.

La trejnado celis aktivigi lingvokonojn de Esperanto-parolantoj kaj evoluigi iliajn bazajn lingvokapablojn. En la leciontabelo estis gramatikaj, leksikaj, paroligaj lecionoj, rolludoj, kvizoj kaj konkursoj, klerigaj kaj distraj vesperaj aranĝoj. Entute okazis po 15 diverstemaj lecionoj en la grupoj A- kaj B-nivelaj (konforme al la KER-sistemo), kiujn gvidis esperantistoj, posedantaj instruajn spertojn en la regiona, landa kaj internacia skaloj.

La organizantoj dediĉis multan atenton ne nur al la aktivigo kaj perfektigo de lingvokonoj, sed ankaŭ al la evoluigo de diversaj lingvokapabloj: aŭda kompreno, parolkapabloj (interagoj kaj kontinua formo), skribaj kaj kreaj kapabloj, legokompreno. Ĉion ĉi respegulas la varia temaro de lecionoj.

Pluraj kursanoj estas jam sufiĉe malnovaj esperantistoj, kiuj pro diversaj kaŭzoj ne tre aktive uzas Esperanton, sed ili deziris ĝui la vere paroligan kaj lernigan atmosferon de lingvaj okupoj, trovantaj kontinuon en vesperaj programoj, kiel ekzemple la “Amika vespero” aŭ “Novjarfesto” – gajaj, festaj, amuzaj kaj distraj. Tial la aliĝintaj gekursanoj diversaĝis: de grizharaj okdekjaruloj ĝis la 13-jaraĝaj lernejanoj.

El la prezentitaj raportoj kaj videoj menciindas la 45-minuta filmo de Kirill Noviĉenko el Sankt-Peterburgo pri la 100a UK en Lillo, lia kleriga prelego “Esperanto estas ne nur lingvo”, kvizo pri la revuo Kontakto kaj interesega rakonto de la gasto el Koreio Esperanto kiel ilo de mondvojaĝo.

Ĉiuj partoprenintoj de la vintra lernejo alte aprezis la efektivigitan programon

Vladimir Opletajev

Ĉi tiu artikolo aperis en la februara kajero de La Ondo de Esperanto (2016).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2016, №2.
Rete: La Balta Ondo http://sezonoj.ru/2016/01/jekaterinburgo

Viktor Kudrjavcev (1957–2014)

diplomita inĝeniero, esperantisto ekde 1976, aktivulo de la Esperanto-movado en Uralo, aŭtoro de multaj priesperantaj artikoloj, gvidanto de koresponda Esperanto-kurso, komitatano (1988–91, 1998–2001) kaj prezidanto (1999–2001) de la Urala Esperantista Societo, fondinto kaj redaktoro de la revuo Komencanto.

Ni funebras kaj kondolencas.

Halina Gorecka
Aleksander Korjenkov

“Ametistoj” – unu el la grupoj formitaj en la junulara tendaro OrSEJT-19, okazinta antaŭ 36 jaroj, en aŭgusto 1977 ĉe la bordo de la Urala lago Turgojak. Staras la dua de maldestre Aleksander Korĵenkov, sidas plej dekstre Jevgenij Perevertajlo.

En la populara socia reto Vkontakte ĵus aperis albumo kun pli ol sesdek fotoj, faritaj en Sovetuniaj esperantistaj renkontiĝoj dum 1977-1980, interalie en la someraj junularaj tendaroj OrSEJT-19 (Uralo) kaj OrSEJT-20 (Siberio), kaj en kelkaj renkontiĝoj volga-uralaj REVU.

Sur la fotoj estas rekoneblaj pluraj esperantistaj aktivuloj, plejparte el Uralo, interalie, Aleksander Korĵenkov (kiu elektis, skanis, prilaboris kaj enretigis la fotojn), Vladimir Izosimov, Vladimir Opletajev, Viktor Zaĥarov, Aleksandr Kalaŝnikov, Nadeĵda Ŝeveljova (Panova), Diljara Mametova (Gadirova), Viktor Sapoĵnikov, Viktor Kudrjavcev, Andrej Peĉonkin, Halina Gorecka, Viktor Kloĉkov, Boris Kolker, Aleksej Aleksandrov, Gafur Gazizi, Aleksandr Ŝarov, Jevgenij Perevertajlo, Jevgenij Tartyŝev, Aleksandr Jelizarov…

Ĉiuj dezirantoj povas spekti la fotojn kaj legi subkribojn kaj komentojn. La membroj de la reto Vkontakte povas marki sin kaj aliajn personojn sur la fotoj kaj komenti ilin. Nun en la ruslingva grupo Эсперанто en Vkontakte estas 11 mil 158 membroj.

La adreso de la albumo:
http://vk.com/album5849838_21699800

Ĉe represo bonvolu indiki la fonton:
La Balta Ondo: http://sezonoj.ru/2013/04/fotoj