Lingvaj festivaloj estas ripoztagaj festoj de lingva diverseco, kie plej diversaj lingvoj sendepende de la kvanto de parolantoj estas prezentataj en la formo de kelkdek-minutaj enkondukaj lecionoj. La Peterburga lingva festivalo uzas blokojn po 50 minutoj, ĝis dek lecionoj okazas en ĉiu bloko samtempe – tiel la partoprenantoj ĉiuhore havas elekton inter kelkaj lingvoj. Ĉi-jare okazis 50 eventoj, 38 lingvoj estis prezentitaj (inter ili la albana, la armena kaj la dotrakia unuafoje), okazis kelkaj prelegoj kaj parola klubo en Esperanto.

Vjaĉeslav Ivanov prezentas Esperanton.

Fierindas, ke la formaton de la lingvaj festivaloj elpensis kaj realigis esperantistoj. En plejparto de ruslandaj urboj, kie tiaj festivaloj okazas, ilin organizas esperantistaj grupoj.

Inter la specialaĵoj de la ĉi-jara festivalo en Sankt-Peterburgo estis la superrigardaj prelegoj pri lingvaroj: la finna-ugra, la semida kaj la kaŭkazia. Okazis prelego de la psikologo Natalia Guseva pri infana ekparolo, al kiu estis invitataj gepatroj kun beboj.
Entute la ok-horan eventon vizitis ĉ. kvarcent personoj. La reeĥoj laŭ la enketiloj estas tre favoraj. Pli ol 70% planas “ekscii pli multe pri la lingvoj, prezentojn de kiuj mi vizitis en la festivalo”, 50% planas eklerni novan lingvon.

Vjaĉeslav Ivanov

Fotoj de Sergej Andrejsons

Legu ankaŭ:

Dennis Keefe: Lingvaj Festivaloj kaj merkatiko: Vojaĝo de provlecionoj al landaj televidoj
Vjaĉeslav Ivanov: Sankt-Peterburgo: Rekorde granda lingva festivalo

Ĝi estas artikolo el la junia kajero de La Ondo de Esperanto (2016).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2016, №6.
Rete: La Balta Ondo http://sezonoj.ru/2016/04/peterburgo-2

LF en Peterburgo: Prezento de Esperanto vekis grandan intereson (Foto: Sergej Andrejsons)

Preskaŭ duonmilo da vizitantoj partoprenis la 9an lingvan festivalon en Sankt-Peterburgo – normale la kvanto estis duoble malpli granda. La gastoj partoprenis la 56 festivalajn eventojn, ĉefe prezentojn de apartaj lingvoj, sed ankaŭ prelegojn pri lingvistikaj temoj.

La lingva festivalo estas koncepto de porekstera agado, kiun elpensis kaj ekuzis la usona esperantisto kaj profesia merkatisto Dennis Keefe. Esence ĝi estas aro de enkondukaj lecionoj pri dekoj da lingvoj, ili okazas en kelkaj blokoj po kelkaj prezentoj-lecionoj samtempe. Partoprenantoj elektas lingvon inter kelkaj kaj konatiĝas kun ĝi de sperta gvidanto (denaska parolanto, fakulo aŭ studanto de la lingvo).

La festivalo, okazigata en Sankt-Peterburgo fare de lokaj aktivuloj de Rusia Esperantista Unio, celas disvastigon de konscio pri la lingva diverseco en la mondo kaj Ruslando speciale, zorgigon de la publiko pri perspektivoj de malpli grandaj lingvoj, komprenon pri ebleco studi kelkajn lingvojn samtempe.

En moderna Ruslando, samkiel plurloke en la mondo, la angla iĝis sinonimo de “fremda lingvo” en mezlernejoj kaj laborlokoj. Ofte homoj ne decidiĝas eklerni alian lingvon, ĝis kiam ili “finlernos” la anglan. Nur 5% da ruslandanoj menciis en la tutlanda censo de 2010, ke ili “scias” la anglan.

Esperanto estis prezentita en ĉi-jara festivalo dufoje, la prezenton faris Vjaĉeslav Ivanov. Krom tio okazis ankaŭ aparta evento “Esperanto-klubo”, en kiu dezirantoj povis interparoli en Esperanto – la kluban programeron preparis Miĥail Kolodin. Esperanto estis multe menciita ankaŭ en la prezento de German Dudĉenko, kiu prelegis pri la esperantido Omo, iom populara en la soveta Uralo komence de la 20a jarcento.

La festivalo, kiun la 15an de marto gastigis la Nacia Esplora Universitato de Informaj Teknologioj, Mekaniko kaj Optiko (ĝuste en ĉi marto ĝi festis sian 110-jariĝon), estas malfermita al publiko; la eniro kostis neniom, plejmultis junaj partoprenantoj, sed rimarkeblis homoj de ĉiuj aĝoj. Laŭ enketado, homoj venas ĉefe pro scivolemo sen antaŭa lingvistika fono. La plej ofta kritiko estas manko de tagmanĝa paŭzo, kion la organizantoj taksas laŭdo.

Vjaĉeslav Ivanov

Ĉi tiu artikolo aperis en la aprila-maja kajero de La Ondo de Esperanto (2015).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2015, №4-5.
Rete: La Balta Ondo http://sezonoj.ru/2015/03/peterburgo/

Ĉi tie vi renkontos amikojn kaj konatojn, povos konatiĝi kun novaj interesaj homoj, povos realigi ĉiuj kreaj kapabloj kaj montros vin en variaj sferoj de scienco. “Formulo de Integreco” estas internacia tendaro, kiun partoprenas gejunuloj el Ruslando, Hispanio, Brazilio, Usono, Ĉinio, Kroatio, Francio, Rumanio kaj Kazaĥstano. Nia tendaro donas eblecon ne nur pasigi feriojn neforgeseble, sed ankaŭ evoluigi sin mem kaj siajn proprajn lingvajn kapablojn.

Sankt-Peterburgo – unu el la plej miraklaj kaj neforgeseblaj urboj de Ruslando kaj mondo invitas vin. Ĝi atendas vin! Kaj ĝi esperas, ke vi por longa tempo konservos rememorojn pri ĝi.

Detalojn vidu ĉe: http://www.formulo.org/en/ducational-multidiscipline-camp-for-children-formulo-de-integreco/

Oksana Burkina

LF en Peterburgo (Foto: Nikolaj Surovegin)

La 21an de aprilo 2013 en Sankt-Peterburgo okazis la sepa lingva festivalo, kiun organizis la lokaj aktivuloj Vjaĉeslav Ivanov kaj Sergej Andrejsons. Ĝin gastigis prestiĝa Universitato pri Informteknologio, Mekaniko kaj Optiko.

La festivalo kunvenigis ĉ. 250 lingvemulojn, kelkaj prelegantoj venis el aliaj urboj: Moskvo, Kazano kaj Velikij Novgorod. Okazis prezentoj de 37 lingvoj kaj kelkaj prelegoj pri diversaj lingvistikaj fakoj kaj problemoj. La unuan fojon en Sankt-Peterburgo estis prezentitaj la lingvoj malta, litova kaj orovaria.

Esperanto estis prezentita dufoje, la prezentojn sume ĉeestis 30 aŭskultantoj. En la kvindekminuta prezento sufiĉis spaco por la informoj pri la gramatiko, historio kaj nuntempo de la internacia lingvo, la ĉeestintoj starigis interesajn demandojn.

Speciale por la junaj vizitantoj (6–12-jaraj) okazis programero pri evoluo de skribsistemoj, en kiuj la infanoj mem provis skribi piktogramojn sur la skribtabulo kaj eĉ sur argilaj tabuletoj.

Vjaĉeslav Ivanov

Ĉi tiu artikolo aperis en la junia kajero de La Ondo de Esperanto (2013).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2013, №6.
Rete: La Balta Ondo http://sezonoj.ru/2013/05/224piter/

Tri pliaj partioj ricevis malpli ol 7% da voĉoj kaj ne reprezentiĝos en la parlamento: Jabloko (Яблоко, t. e. Pomo, 3,43%), Patriotoj de Ruslando (0,97%) kaj Prava (aŭ Dekstra) Afero (0,6%).

Unueca Ruslando, kiu ricevis iom pli da voĉoj ol sume ricevis la tri ceteraj parlamentaj partioj, havos absolutan plimulton en la Dumao, sed ĝia deputitaro grave ŝrumpis kompare kun la antaŭa konsisto, elektita en 2007. La ceteraj tri partioj gajnis pli multajn deputitajn lokojn ol antaŭe.

La rezulto de la voĉdonado forte variis en la lando. La plej grandan subtenon UR ricevis en la Kaŭkazaj kaj en Volgaj respublikoj, precipe en Ĉeĉenio, kie la subteno al la reganta partio superis 99 procentojn. La rezulto en Moskvo estas simila al la everaĝo en la tuta lando (UR 46,62%, KPRF 19,35% ktp). En Sankt-Peterburgo Justa Ruslando (23,99%) superis komunistojn (15,48%) kaj liberal-demokratojn (10,36%), kaj malgajnis nur al Unueca Ruslando (34,8%). Similan sukceson la justuloj atingis ankaŭ en Sverdlovska regiono.

Sed en iuj lokoj UR malgajnis. Ekzemple. en ĉiuj tri balot-distriktoj de Kaliningrado venkis komunistoj, tamen danke al granda subteno en la periferiaj urboj kaj vilaĝoj Unueca Ruslando venkis en la Kaliningrada regiono, kvankam malpli konvinke ol averaĝe en la lando: UR 37,07%, KPRF 25,54%, LDPR 14,1%, JR 13,26%, Jabloko 5,5%, PR 2,23%, PA 0,68%.

La definitiva rezulto estos anoncita post kelkaj tagoj, sed ĝi ŝanĝos nur la centonojn de procentoj kaj neniel influos al la divido de la deputitaj lokoj.

Post tri monatoj en Ruslando oni elektos novan prezidenton. Unueca Ruslando jam proponis kiel sian kandidaton la eksprezidenton kaj la nunan ĉefministron Vladimir Putin. Gennadij Zjuganov, la ĉefo de la komunistoj, volas esti la sola kandidato de la ĉefaj opoziciaj partioj, sed tiu ideo dume ne trovas subtenon de JR kaj LDPR.