Krome, ŝi volas “belajn ekzemplojn kaj bonajn agojn por Esperanto kaj per Esperanto”. Aliflanke, Jolanta atentigas, “ke la homoj ne komprenu la devizon malĝuste. Ĝi absolute ne estas malrespekto al nia flago”, – deklaras Jolanta.

De la flanko de Heroldo la devizo estos uzata por stimuli konkretajn agojn flanke de ĉiuj Esperanto-asocioj. Heroldo planas raporti pri la agado de la Esperanto-asocioj tra la mondo, kun la helpo de ĉiuj aktivuloj, kiuj iel partoprenos iu ajn agadon por festi la Zamenhof-jaron.

La mastrumantoj de la lokaj, fakaj kaj landaj Esperanto-asocioj povas kontakti la redakcion de Heroldo por prezenti siajn planojn kaj agojn per unu el la jenaj manieroj

– ligilo ĉe Heroldo, baldaŭ anoncota;
– per Facebook-komunikilo
– per la retadreso redakcio@heroldodeesperanato.com

Fabrício Valle

Ekde la jarŝanĝo unu el la plej popularaj internaciaj Esperanto-gazetoj, La Ondo de Esperanto, ne plu aperas en papera formo, sed nur elektronike. Post la apero de la plene elektronika januara kajero de La Ondo la redakcio de Libera Folio petis al Aleksander Korĵenkov, kiu dum 25 jaroj redaktas La Ondon, rakonti, kial la papera eldono ne plu aperos.

La intervjuo, kiu aperis la 9an de januaro, estas legebla en Libera Folio
http://www.liberafolio.org/2017/01/09/la-ondo-de-esperanto-forlasos-paperon/

La januara provnumero de La Ondo de Esperanto (“pdf” kaj “ePub”) estas libere elŝutebla en la retejo de La Ondo / Sezonoj
http://esperanto-ondo.ru/Libroj/Libroj.php

Klaku la supran bildon por vidi la abonmanierojn

Post la somera anonco pri la transiro de La Ondo al elektronika eldonado atingis nin multaj opinioj, iujn el ili vi povis legi en nia gazeto. La reagoj variis laŭ la legantoj. Jam ĉirkaŭ 30% de nia abonantaro en la lastaj jaroj elektas la elektronikan version, kaj ili plu abonas ĝin sendepende de la papera eldono. En la alia poluso estas dekoj da ŝatantoj de paperaj presaĵoj, kiuj preferas legi ilin kaj ne interesiĝas pri bitgazetoj kaj bitlibroj. Inter ĉi tiuj polusoj estas pli ol duono de la abonantoj, kiuj ĝis nun, malgraŭ scioj pri la elektronika versio, preferis aboni la tradician.

Speciale por ĉi tiu granda grupo ni publikigis la januaran numeron en la reto tute senpage, por ke oni vidu, ke bitgazeto, malgraŭ la neeblo palpi kaj flari ĝin, havas objektivajn avantaĝojn. Ni listigu almenaŭ kelkajn.

1. Bitgazeto estas rapida pro nebezono de presado, faldado, tranĉado, transportado al poŝto, poŝta sendado kaj liverado surloka.
2. Bitgazeto estas malpli kosta pro la menciita manko de la presado kaj ekspedo. Finfine, kiel skribas unu el niaj legantoj, ni ĉesu riĉigi la poŝton per abonkotizoj de esperantistoj.
3. Bitgazeto ebligas aperigi longajn tekstojn (vidu la seppaĝan artikolon de Humphrey Tonkin), kiuj antaŭe tropezigus papergazeton.
4. Bitgazeto estas lokŝpara, ĝi ne bezonas fizikan lokon sur breto; ĝi ankaŭ estas pli ekologia kaj do arbarprotekta.

La listo daŭrigeblas (ekzemple, nin agrable surprizis, ke ni ne devas trostreĉi la okulojn, ja nia legilo ebligas per unu klavopremo pligrandigi la literojn), sed ni haltu. Ni komprenas, ke biteldonaĵoj neniam plene forpuŝos la paperajn – pensu pri mirinde belaj albumoj kaj aliaj majstroverkoj de presarto, sed paperaj informiloj de etaj komunumoj jam malaperas; ili plu malaperos, kaj ni, esperantistoj, kuraĝe frontu la defiojn de l’ nuntempo.

Tri kromrimarkoj. Unue, ni skribas nenion pri la legado de bitgazeto, ĉar, se vi uzas komputilon vi verŝajne jam legis pdf-eldonaĵojn, kaj por la uzantoj de librolegiloj kaj saĝtelefonoj ne estas problemo legi ePubajn bitlibrojn. Due, ni rezistis la tenton kaj elektis plu fari la gazeton klasike, nigro-sur-blanke, sen tro da koloraj fonoj kaj ekzotaj tiparoj – ja plej gravas la oportuneco de la legado. Trie, la nuna turnopunkto estas oportuna momento por fari kelkajn ŝanĝojn enhavajn. Ekzemple, vi ne plu trovos en La Ondo de Esperanto monatan kalendaron, komentariojn de niaj kolumnistoj kaj la rubrikon Nia Trezoro. Ni ja atentos jubileojn, movadajn problemojn kaj publikigos klerigajn tekstojn, sed ne nepre ĉiunumere.

Viaj opinioj pri la unua “nova” Ondo kaj viaj ideoj pri la estonteco estas atendataj – ni faras la gazeton ne por ni, sed por vi, kaj do ĉiuj viaj reagoj estos atente legataj. Ni scivolas ankaŭ pri la opinioj de tiuj (ekzemple, duolinganoj), kiuj ĝis nun neniam legis la paperan Ondon, kaj konatiĝas kun nia gazeto tra ĝia elektronika versio.

Bonan Novan Jaron kun la nova Ondo!

Halina Gorecka
Aleksander Korĵenkov

Ĉi tiu teksto aperis en la januara kajero de La Ondo de Esperanto (2017).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2017, №1.
Rete: La Balta Ondo http://sezonoj.ru/2017/01/ondo-17

Klaku la supran bildon por vidi la abonmanierojn

La 65-paĝa kolorplena januara Ondo (2017) estas nun libere elŝutebla en la kiosko de Sezonoj:
http://esperanto-ondo.ru/Libroj/Libroj.php

En la kiosko oni povas elŝuti ankaŭ 15 senpagajn librojn (kaj tri numerojn de La Ondo) kaj aĉeti 2 librojn (fragmente elŝuteblaj kiel provlibroj). Tie estas legeblaj ankaŭ klarigoj pri legado de bitlibroj laŭ la normoj “pdf” kaj “ePub”.

La Ondo de Esperanto (11 numeroj + literatura suplemento) estas abonebla kontraŭ nur 15 eŭroj ĉe niaj perantoj, UEA-konto, kaj per PayPal/bankkartoj ĉe
http://esperanto-ondo.ru/Lo-abon.htm

Vian opinion pri la nova Ondo vi povas skribi ĉi sube en “Komentu”.

La red.

Tial UEA nun invitas kandidatiĝojn por transpreni la redaktadon de la revuo ekde numero 2017:4. Tio signifas eklabori jam komence de marto 2017. La sukcesa kandidato ricevos kontrakton por finredakti la jarkolekton 2017; decido pri renovigo/plilongigo estos farita en oktobro 2017. La redaktan laboron la redaktoro faros ĉefe en sia loĝloko. Tamen, estus avantaĝo se la sukcesa kandidato povus pasigi parton de marto en la Centra Oficejo por pli funde konatiĝi kun la atendoj kaj informfluo ligitaj al tiu laboro.

Kandidatoj devas havi tre bonan lingvan nivelon (KER-nivelo C1), ĵurnalisman aŭ redaktan sperton, pruvitan kapablon por memstara laboro same kiel por rapida kaj fidinda komunikado kun kunlaborantoj, kaj bonan konon de la Esperanto-movado. La Estraro serĉas personon, kiu aktive kontribuos al la efektivigo de la Strategia Laborplano de UEA, kiu estas iniciatema kaj kreema, kaj kiu interesiĝas pri plej diversaj aspektoj de la movado. La redaktopolitiko de la revuo estas proksime ligita al la mastrumado de informoj en la retejoj de UEA, kaj la redaktoro do samtempe estos ano de teamo por la renovigo de tiuj retejoj.

Por kandidatiĝi, oni sendu al la Ĝenerala Direktoro de UEA (direktoro@co.uea.org) elektronikan dokumentaron kun jena enhavo:

— sinprezenta letero, inkluzive de la motivoj por kandidatiĝi;
— vivresumo (persona, eduka, profesia, movada);
— mallonga eseo pri la potenciala kontribuo de la revuo al la efektivigo de la Strategia Laborplano, kaj pri la movada rolo de la revuo en la interreta epoko;
— nomoj kaj kontaktinformoj de tri rekomendantoj (ne nepre esperantistoj), kiuj konas la kandidaton profesie kaj/aŭ movade;
— laŭplaĉe, aliaj dokumentoj kiuj atestas la redaktajn aŭ movadajn kapablojn de la kandidato.

Surbaze de tiuj dokumentoj – kiuj atingu la Centran Oficejon ĝis la 15a de januaro 2017 – oni elektos unu aŭ pliajn kandidatojn por telefona intervjuo.

Fonto: Gazetara Komuniko de UEA, 2016, №658.

La movada sekcio Eventoj enhavas pli ol dudek artikolojn pri kongresoj, festivaloj kaj aliaj esperantistaj renkontiĝoj, interalie, pri la 8a Azia Kongreso de Esperanto en Ĉinio, pri la tradicia festivalo ARKONES en Poznano, pri la renkontiĝo de E-verkistoj kaj tradukistoj en Kroatio, pri la MontKabana Renkontiĝo en Italio kaj pri multaj aliaj. La legantoj povas ekscii pri kelkaj Esperanto-projektoj, realigitaj ĉi-aŭtune, ekzemple: novdezajnita retejo Esperanto.net, aĉeto de loĝejo por UEA-volontuloj en Roterdamo, sukcesa monkolekto por Amikumu k. a.

En Tribuno kvin legantoj de La Ondo esprimas siajn opiniojn pri ĝia transformiĝo al bitgazeto, kaj la argentina aktivulo Lucas Cerante rakontas pri la nova kurso de Esperanto por hispanlingvanoj en la populara lingvoinstrua retejo Duolingo. En la lingva sekcio la siberia akademiano Sergio Pokrovskij prezentas sian opinion pri la mita “Akademia decido de la 1921a jaro”, kiun pluraj esperantistoj interpretas kvazaŭ Akademian rekomendon por anstataŭigo de la litero “ĥ” per “k”, kio ne estas vera.

Halina Gorecka en la ciklo Urboj de Ruslando prezentas la kuracurbon Jessentuki kaj atentigas ne nur pri la historio kaj sanatorioj de ĉi tiu kaŭkaza kuracurbo, sed ankaŭ pri la loka ZEO – hotelo Espero, historie ligita kun la vilao Espero de la ruslanda Esperanto-pioniro kaj generalo Nikolaj Reŝetin.

Tradicie riĉa estas la kultura sekcio, kies amplekso – pli granda ol kutime – ebligis aperigi novan Esperanto-tradukon de La Korvo de Edgar Allan Poe; ĉi tiun poemon, kiun multaj taksas la plej bela poemo en la mondliteraturo, tradukis Alen Kris. Giorgio Silfer en sia artikolo rakontas pri kamiŝibajo, japana migranta paperteatra ĝenro, kaj pri tri siaj originalaj kamiŝibajoj en Esperanto. Wolfgang Kirschstein komentas la decidon de la Sveda Akademio, asigninta al la usona kantisto kaj poeto Bob Dylan ĉi-jaran nobelpremio pri literaturo. Halina Gorecka recenzas la rememor-libron de la mult-talenta ruslanda sciencisto David Armand, kiu estis ankaŭ entuziasma esperantisto. En la kultura sekcio estas ankaŭ artikoletoj pri kulturnovaĵoj en Esperantujo.

En la jarfina Ondo, kompreneble, enestas kalendaro de jubileoj, festoj kaj memordatoj por decembro, nekrologa rubriko, multaj unufrazaj movaderoj en la rubriko Koncize, pluraj fotoj, kaj la listo de perantoj, kiuj pretas akcepti abonkotizojn por la sekva jaro, kiam La Ondo estos eldonata nur kiel bitgazeto laŭ la normoj “pdf” kaj “ePub”.

La Ondo de Esperanto en 2017 aperos ĉiumonate (krom aŭgusto) kun senpaga literatura suplemento jarfine. Ĝi estas abonebla kontraŭ 15 eŭroj por la tuta jaro ĉe landaj perantoj, UEA-konto, kaj per la internacia monpaga sistemo PayPal.

Klaku la supran bildon por aboni per diversaj manieroj

La Sociala Grupo Lexus posedos, eldonos kaj administros la gazeton Heroldo de Esperanto ekde Novjartago 2017. La kunlaborantoj pri la enhavo bonvolu sendi siajn artikolojn kaj fotojn al la nova eldonejo. Ekde 15 decembro 2016 la nuna redakcio ne plu respondos al mesaĝoj, sed aŭtomate plusendos ilin al la nova.

La nunaj perantoj bonvolu kontakti www.heroldodeesperanto.com kiel eble plej baldaŭ, se ili estas interesataj daŭrigi la peradon. En tiu sama retejo la abonantoj trovas informon pri la maniero reaboni.

http://www.esperantio.net/index.php?id=2979

La antaŭlasta numero de la epoko de LF-koop (1997-2016) estas finredaktata kaj akurate atingos la legantojn ĉi-monate. La lasta numero estos retrospektivo pri la historio de Esperantio dum la lastaj dudek jaroj. Ĝi atingos la abonantojn komence de januaro.

Kooperativo de Literatura Foiro profunde dankas ĉiujn kiuj helpis al “Heroldo de Esperanto” dum la lastaj du jardekoj, kaj esperas ke ankaŭ la nova eldonejo meritos ilian subtenon.

Fonto: HeKo 625 5-B, 5 dec 16

http://www.esperantio.net/index.php?id=3028

Unuflanke LF-koop liveras al la aĉetinto kaj nova eldononto (Sociala Grupo Lexus) gazeton tute akuratan. Aliflanke, sur malbonaj akvoj navigas la tri monataj periodaĵoj kontraŭ kiuj la nova Heroldo eventuale konkurencus.

Jen Esperanto, kiun UEA-gvidantoj difinas la ĉefa movada revuo terure malfruas kaj vekas kritikojn pri enhavo kaj grafiko (de Osmo Buller tiel objektivajn kiel senkompatajn). Jen La Ondo de Esperanto faligas la herson sur sian paperan eldonon: ekde 2017 ĝi aperos nur virtuale. Jen Monato” baraktas pro la subita perdo de la ĉefredaktoro, la malfacile anstataŭebla Paul Gubbins.

Aldoniĝas, kiel pozitiva faktoro, la ĝisnuna manko de rabiaj kaj blufaj atakoj fare de s-ro Gian Carlo Fighiera (eksigita de LF-koop en 1998): sub lia premo, jam dum dek ok jaroj Itala Esperanto-Federacio ne peras la gazeton. Ankaŭ trankvilas la reta skandalgazeto el Svedio: ĝi eĉ intervjuis tuj la aĉetinton (sed neniam serĉis kontakton kun LF-koop).

Tial ke decembro estas monato pli mallonga ol la ceteraj (ekde la 20a oni eniras la julan feriperiodon), s-roj Fabr�o Valle kaj Paulo Lima (bedaŭrinde lastatempe malsana) havas ankoraŭ ses semajnojn por la definitiva lanĉo de la unua numero en 2017, la 2268a en la baldaŭ centjara historio de Heroldo.

Fonto: HeKo 621 5-B

http://www.esperantio.net/index.php?id=2991

La gazeto ne plu estos trisemajna, sed monata. Ĝi enhavos dudek paĝojn anstataŭ kvar, sed en formato A4 anstataŭ A3. Tial ke la kovrilo kaj la dorskovrilo ne enhavos artikolojn, kaj ĉiu paĝo enhavos malpli ol duonon de la nunaj, tio egalos al cento da nunaj paĝoj, anstataŭ sepdeko. Pro ĉi tiu kresko ankaŭ la abontarifoj altiĝos.

Papera versio: 20 paĝoj (parte koloraj), inkluzive de du 4-paĝaj kajeroj, nome Lingvio (lingvoj) kaj Spegulo (arto kaj kulturo).
Provabono por 4 numeroj: 26 eŭroj
Abono por 12 numeroj: 59 eŭroj

Reta versio ĝisdatita ĉiutage (ĉiutage novaj informoj/artikoloj). La legantaro/abonantaro havos socian reton je sia dispono (registriĝo estos libera por ĉiuj, abonantoj kaj neabonantoj):
Provabono por 4 monatoj: 13 eŭroj
Abono por 12 monatoj: 29 eŭroj
Abono por 24 monatoj: 58 eŭroj

Fonto: HeKo 620 2-B

Materialo por la oktobra revuo estas en aktiva kolektado kaj pretigo, la septembra proksimas al presejo. Pliaj artikoloj ege bonvenas! Dezirindas ne nur stratosfere viziaj temoj – ni volas ekscii, kio okazas inter averaĝaj esperantistoj en kluboj, aranĝoj kaj iniciatoj. Eluzu la revuon por konigi viajn ideojn, agojn kaj projektojn!

Fonto: Estrara Komuniko EKO 2016-29, sendita el Budapeŝto la 19an de oktobro 2016