Lia artikolo, ornamita de belaj fotoj, estas en la centraj paĝoj de la revuo, sed la tria-paĝa ĉefartikolo, verkita de Paveł Fischer-Kotowski, estas dediĉita al la 31a ARKONES, kiu okazis fine de septembro en Poznano. Ĉi tiun artikolon sekvas kvin paĝoj de la primovada sekcio Eventoj, kun informoj pri pluraj okazaĵoj organizitaj de esperantistoj en pluraj landoj.

En la sekcio Tribuno nia konstanta kolumnisto Dafydd ab Iago en sia ĉiumonata rubriko Vide el Bruselo rakontas pri la problemo de la rufuĝantoj, kiuj strebas veni al la Eŭropa Unio ĉefe el la Proksima Oriento kaj pri la eventuala rolo de Turkio en la solvo de la problemo. La esperantistoj el la Pollanda Triurbo (Gdansko, Gdynja kaj Sopot) proponas kompili ĝeneralan Esperanto-bibliografion. Du tekstoj venas el la grupo E-ĉe-I, tio estas Edukado-ĉe-Interreto. Peter Baláž prezentas la novan edukan retprojekton de E@I pri la Kiberia ĉikanado, kaj KuboF Hromoslav invitas al Vikipedia Tradukkonkurso.

Se vi interesiĝas pri Kenigsbergo-Kaliningrado kaj la ĉirkaŭa regiono, eble interesos vin la laŭvica, 21a parto de la ciklo Paĝoj el la historio de la Sukcena Lando, verkita de Halina Gorecka. En la sekcio Arkivo, la redaktoro de la Ondo daŭrigas prezenti la plej gravajn gvidantojn de la Esperanto-movado, nun temas pri Ernest Karloviĉ Drezen, kiu verŝajne estas la plej konata esperantisto en Sovetunio.

La plej ampleksa, tripaĝa teksto en la novembra Ondo estas beletra – temas pri la popularega novelo La diablo en la sonorilejo de Edgar Allan Poe en la Esperanto-traduko de Russ Williams. En la kultura sekcio estas presita, apud pluraj malpli longaj tekstoj ankaŭ eseo de Wolfgang Kirschstein pri Svetlana Aleksijeviĉ – ruslingva belarusa verkistino, kiu ĉi-oktobre ricevis la literaturan Nobel-premion.

En la fino de la revuo estas konkursaĵoj kaj humuro en Mozaiko kaj la rubriko Spritaj splitoj kaj preskeraroj de István Ertl, kiu ĉi-foje enmetis en ĝin ankaŭ tri mistajpojn el la oktobra kajero de La Ondo.

Kelkaj el la supre menciitaj tekstoj aperis aŭ aperos en la novaĵretejo La Balta Ondo, kaj kelkaj pliaj aperos iom-post-iom, sed en la reto aperas nur ĉ. triono da tekstoj el La Ondo de Esperanto, kaj por havi adekvatan imagon pri ĉefaj eventoj kaj diskutoj en Esperantujo, ankaŭ pri la kulturaj novaĵoj, oni devas legi la revuon mem.

La Ondo de Esperanto estas abonebla en la tradicia (papera) formo kontraŭ 42 eŭroj por la tuta jaro 2016 kaj kontraŭ 21 eŭroj por jarduono. Ni proponas rabatojn por ekssovetiaj, orient-eŭropaj, afrikaj, sud-amerikaj kaj kelkaj aziaj landoj.

La elektronika jarabono por la tuta jaro kostas nur 15 eŭrojn.

Legu pli pri la abonkondiĉoj:
http://esperanto-ondo.ru/Lo-abon.htm

2. Antaŭ 200 jaroj naskiĝis Georgo Buleo (George Boole, 1815-64), angla matematikisto kaj filozofo, unu el la fondintoj de matematika logiko.

Antaŭ 50 jaroj naskiĝis Shahrukh Khan (1965-), barata aktoro kaj filmproduktanto, nomata “Reĝo de Bollywood”.

Antaŭ 50 jaroj la usona kvakero Norman Morrison (1933-65) bruligis sin ĉe Pentagono proteste kontraŭ la usona milito en Vjetnamio.

4. Tago de Nacia Unueco en Ruslando.

5. Antaŭ 400 jaroj naskiĝis Ibrahim I (1615-48), otomana sultano (1640-48).

7. Antaŭ 350 jaroj (1665) estis fondita The London Gazette (dum tri unuaj monatoj The Oxford Gazette), la plej malnova inter la seninterrompe aperantaj ĵurnaloj.

9. Antaŭ 75 jaroj mortis Arthur Neville Chamberlain (1869-1940), brita konservativa politikisto, ĉefministro de Britio (1937-40), unu el la iniciatintoj de la Munĥena Interkonsento (1938).

11. Antaŭ 25 jaroj mortis Jannis Ritsos (1909-90), greka verkisto kaj politikisto, aktivulo de la kontraŭfaŝista rezistado dum la 2a mondmilito.

12. Antaŭ 125 jaroj naskiĝis hungaria judino Lily Kronberger (1890-1974), kvarfoja mondĉampiono pri arta sketado (1908-11).

14. Antaŭ 1450 jaroj mortis Justiniano la Granda (483-565), imperiestro de (Orienta) Romia Imperio (527-65).

Antaŭ 175 jaroj naskiĝis Claude Monet (1840-1926), franca pentristo, unu el la fondintoj de impresionismo.

Antaŭ 75 jaroj (1940) germania aerarmeo grave damaĝis la anglan urbon Coventry;

Antaŭ 75 jaroj finiĝis vizito de la sovetunia ĉefministro Vjaĉeslav Molotov en Berlino – USSR rifuzis subteni la Triregnan Pakton de Germanio, Italio kaj Japanio.

16. Internacia tago de toleremo.

Antaŭ 75 jaroj (1940) en Varsovio estis establita geto kun pli ol 440 mil judoj.

Antaŭ 50 jaroj (1965) en USSR estis lanĉita “Venera-3”, la unua Tera kosmoŝipo atinginta alian planedon.

17. Internacia studenta tago.

Antaŭ 225 jaroj naskiĝis August Ferdinand Möbius (1790-1868), germana matematikisto kaj astronomo, demonstrinta ekziston de unuranda surfaco (la rubando de Möbius).

19. Antaŭ 825 jaroj (1190) en Sirio estis fondita hospitalo kaj ties gardistaro, poste transformiĝinta al Teŭtona Ordeno de S-ta Maria en Jerusalemo, kiu en la 13a jc fondis kruckavaliran ŝtaton en Prusujo.

Antaŭ 50 jaroj (1965) laŭ iniciato de USSR la Ĝenerala Asembleo de UN rezoluciis pri nedisvastigo de nukleaj armiloj.

20. Antaŭ 75 jaroj (1940) Hungario aliĝis al la Triregna Pakto.

Antaŭ 50 jaroj mortis Emil Pfeffer (1891-1965), aŭstria-hungaria judo, juristo kaj esperantisto, aŭtoro de la lernolibra serio “Tagblatt-Biblioteko”, tradukanto kaj redaktoro, en 1938 migrinta al Urugvajo.

22. Antaŭ 125 jaroj naskiĝis Charles de Gaulle (1890-1970), franca generalo kaj politikisto, antifaŝisto, gvidanto de Libera Francio (1940-43), ĉefo de la provizora registaro de Francio (1944-46), fondinto kaj la unua prezidanto de la Kvina Respubliko (1959-69).

Antaŭ 50 jaroj naskiĝis Björk Guðmundsdóttir (1965-), populara islanda kantistino.

23. Antaŭ 75 jaroj (1940) Rumanio aliĝis al la Triregna Pakto.

24. Antaŭ 75 jaroj (1940) Slovakio aliĝis al la Triregna Pakto.

25. Antaŭ 100 jaroj naskiĝis Augusto José Ramón Pinochet Ugarte (1915-2006), ĉilia generalo, kiu dum 1973-90 regis Ĉilion post puĉo kontraŭ la registaro de Salvador Allende.

26. Antaŭ 50 jaroj (1965) Francio lanĉis sian unuan sateliton “Asterix”.

27. Antaŭ 75 jaroj en Sanfrancisko naskiĝis Bruce Lee (Lee Jun Fan, 1940-73), aktoro kaj luktartisto.

Antaŭ 75 jaroj anoj de la Legia Movado mortigis la rumanian verkiston kaj eksĉefministron Nicolae Iorga (1871-1940)

28. Antaŭ 100 jaroj naskiĝis Konstantin Simonov (1915-79), rusa sovetunia verkisto kaj sociaganto.

Ĉi tiu listo aperis en la novembra kajero de La Ondo de Esperanto (2015).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2015, №11.
Rete: La Balta Ondo http://sezonoj.ru/2015/11/novembro-3

2. Antaŭ 100 jaroj (1914) Ruslando deklaris militon al la Otomana Imperio.

Antaŭ 50 jaroj (1964) en Sauda Arabio estis detronigita Saudo la 4a; la reĝecon prenis lia frato Fajslaj.

4. Tago de Nacia Unueco en Ruslando.

5. Antaŭ 25 jaroj en Novjorko mortis Vladimir Horovic (1903-89), juda pianisto, formigrinta el Sovetunio en 1925.

6. Antaŭ 200 jaroj naskiĝis Antoine-Joseph “Adolphe” Sax (1814-94), inventinta saksofonon kaj arkokornon.

8. Antaŭ 150 jaroj naskiĝis Vera Komisarĵevskaja (1864-1910), la plej konata rusa aktorino en la komenco de la 20a jc.

9. Antaŭ 25 jaroj (1989) Deng Xiaoping forlasis sian lastan oficialan postenon en Ĉinio.

Antaŭ 25 jaroj (1989) GDR malfermis la trapasejojn en la Berlina Muro.

10. Antaŭ 150 jaroj (1864) la aŭstria ĉefduko Maximilian Ferdinand Joseph von Habsburg-Lothringen iĝis imperiestro Maksimiliano de Meksiko.

Antaŭ 75 jaroj naskiĝis Russell Charles Means (1939-2012), aktivulo de la indiana movado en Usono.

11. Antaŭ 150 jaroj naskiĝis Maurice Leblanc (1864-1941), franca verkisto, aŭtoro de krimlibroj pri Arsène Lupin.

Antaŭ 75 jaroj naskiĝis Klavdija Bojarskiĥ (1939-2009), sovetunia skiistino, trifoja ĉampiono en la 9a Vintra Olimpiko (Insbruko, 1964).

12. Antaŭ 25 jaroj mortis Dolores Ibèrruri (1895-1989), kromnomita La Pasionaria, ĝenerala sekretario (1932-60) kaj prezidanto (1960-89) de la Komunista Partio de Hispanio.

14. Antaŭ 125 jaroj naskiĝis Jawaharlal Nehru (1889-1964), la unua ĉefministro de Barato.

15. Antaŭ 125 (1889) jaroj Brazilo estis proklamita respubliko.

16. Antaŭ 125 jaroj naskiĝis Cecil Charles Goldsmith (1889-1972), angla esperantisto, administranto de Brita Esperanto-Asocio, sekretario de The Esperanto Publishing, ĝenerala sekretario (= direktoro) de IEL (1936-47) kaj UEA (1947-1955).

17. Internacia Studenta Tago.

Antaŭ 25 jaroj en Ĉeĥoslovakio komenciĝis la Velura Revolucio.

18. Antaŭ 125 jaroj naskiĝis Stanisław Kosior (1889-1939), la unua sekretario de CK de la Ukrainia Komunista Partio (1934-38) konsiderata kiel la ĉefa organizanto de la Granda Malsato en Ukrainio.

Antaŭ 100 jaroj naskiĝis Haguroyama Masaji (1914-69), japana sumoisto, la 36a jokozuno.

19. Antaŭ 175 jaroj naskiĝis Emil Škoda (1839-1900), ĉeĥa inĝeniero kaj entreprenisto, fondinto de la fabriko Škoda en Plzeń.

20. Monda Infana Tago.

Antaŭ 125 jaroj naskiĝis Edwin Powell Hubble (1889-1953), usona kosmologo kaj astronomo, kies nomon havas la kosmoteleskopo Hubble.

21. Antaŭ 50 jaroj en Novjorko estis konstruita la pendoponto Verrazano-Narrows, kiu ĝis 1981 estis la plej longa pendoponto en la mondo.

22. Antaŭ 25 jaroj (1989) estis murdita la 13a libana prezidento René Moawad.

24. Antaŭ 375 jaroj (1639) Jeremiah Horrocks unuafoje en la mondo observis pasadon de Venuso antaŭ Suno.

26. Antaŭ 75 jaroj naskiĝis Tina Turner (aŭtente: Anna Mae Bullock, 1939-), usona kantistino, aktorino kaj dancistino, okfoja laŭreato de la premio Grammy.

27. Antaŭ 25 jaroj (1989) la drogmafia organizo de Pablo Escobar eksplodigis aviadilon Boeing 727.

29. Antaŭ 700 jaroj mortis Filipo la 4a de Francio (1268-1314), kromnomita Filipo la Bela.

Antaŭ 150 jaroj (1864) en Usono okazis la masakro de Sand Creek, en kiu pli ol cent indianoj estis murditaj.

30. Antaŭ 75 jaroj (1939) Sovetunio atakis Finnlandon, komenciĝis la Vintra Milito.

Antaŭ 25 jaroj (1989) en Berlino teroristoj el la Ruĝarmea Frakcio murdis la prezidanton de Deutsche Bank financiston Alfred Herrhausen.

Antaŭ 125 jaroj naskiĝis Mieczysław Sygnarski (1889-1979), pola instruisto kaj esperantisto, aŭtoro de kelkaj lerniloj de Esperanto.

Ĉi tiu listo aperis en la novembra kajero de La Ondo de Esperanto (2014).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2014, №11.
Rete: La Balta Ondo http://sezonoj.ru/2014/11/novembro-2/

Antaŭ 125 jaroj mortis Nikolaj Prĵevaljskij (1839-1888), rusa vojaĝanto kaj natursciencisto.

2. Antaŭ 75 jaroj (1938) la Viena Arbitracio donis al Hungario parton de la suda Slovakio kaj la sudon de la Karpata Rutenio.

3. Antaŭ 100 jaroj naskiĝis Catherine Schulze (1913-1999), usona esperantistino kaj mecenato de Esperanto (NASK, ESF).

Antaŭ 25 jaroj mortis Jiří Kořínek (1906-1988), ĉeĥa esperantisto kaj tradukanto.

4. Tago de Nacia Unueco en Ruslando.

5. Antaŭ 875 jaroj (1138) la dujara Lý Anh Tông (1136-1175) iĝis imperiestro de Vjetnamio.

Antaŭ 75 jaroj (1938) en Usono naskiĝis Joe Dassin (1938-1980), franca kantisto kaj komponisto.

7. Antaŭ 125 jaroj naskiĝis Nestor Maĥno (1888-1934), ukrainia anarkiista revoluciulo.

Antaŭ 100 jaroj naskiĝis Albert Camus (1913-1960), franca verkisto kaj filozofo, nobelpremiito pri literaturo (1957).

9. Antaŭ 75 jaroj taĉmentoj de SA kaj grupoj de civiluloj aranĝis en Germanio kaj Aŭstrio kontraŭjudan pogromon, kiu enhistoriiĝis kiel “Kristala nokto” aŭ “Nokto de rompitaj vitrinoj”.

Antaŭ 125 jaroj naskiĝis Jean Monnet (1888-1979), unu el la ideologoj kaj fondintoj de la Eŭropa Unio, ofte nomata “La patro de Eŭropo”.

10. Antaŭ 125 jaroj (1888) Jack la Buĉisto murdis sian lastan viktimon, la londonan putinon Mary Jane Kelly (1863-1888).

Antaŭ 75 jaroj mortis Mustafa Kemal Atatürk (1881-1938), konstituinto kaj la unua prezidento de la laika Turka Respubliko.

13. Antaŭ 200 jaroj naskiĝis Petar II Petrović-Njegoš (1813-1851), reganto kaj metropolito de Montenegro (1830-1851), filozofo kaj poeto.

Antaŭ 100 jaroj naskiĝis Lon Nol (1913-1985), prezidento de Kamboĝo (1972-1975).

14. Antaŭ 50 jaroj (1963) pro erupcio de subakva vulkano sude de Islando formiĝis la insulo Surtsey.

15. Antaŭ 25 jaroj (1988) la Nacia Konsilio de Palestino proklamis la sendependiĝon de Palestino.

Antaŭ 275 jaroj naskiĝis Friedrich Wilhelm Herschel (1738-1822), germandevena brita astronomo, malkovrinto de Urano kaj de infraruĝa radiado, aŭtoro de 24 simfonioj.

16. Antaŭ 75 jaroj (1938) la svisa kemiisto Albert Hofmann sintezis D-Lizergan Acidan Dietilamidon (LCD).

Antaŭ 25 jaroj (1988) Benazir Bhutto (1953-2007) estis elektita ĉefministro de Pakistano kaj iĝis la unua gvidantino de moderna islama ŝtato.

17. Internacia Studenta Tago.

19. Antaŭ 125 jaroj naskiĝis José Raúl Capablanca (1888-1942), kuba diplomato kaj ŝakisto, la 3a mondĉampiono pri ŝako (1921-1927).

Antaŭ 75 jaroj mortis la ruslanda filozofo Lev Ŝestov (Jehuda Lejb Ŝvarcman, 1866-1938), en 1921 migrinta al Francio.

20. Monda Infana Tago.

22. Antaŭ 100 jaroj naskiĝis la angla komponisto, pianisto kaj dirigento Edward Benjamin Britten (1913-1976).

Antaŭ 50 jaroj estis murdita la 35a prezidento de Usono John Fitzgerald Kennedy (1917-1963).

Antaŭ 50 jaroj mortis la angla verkisto Aldous Hŭley (1894-1963), aŭtoro de la romano Mirinda Nova Mondo.

24. Antaŭ 125 jaroj naskiĝis Dale Carnegie (Carnagey, 1888-1955), usona pedagogo, psikologo kaj verkisto.

Antaŭ 50 jaroj, du tagojn post la murdo de Kennedy, ties supozata murdinto Lee Harvey Oswald (1939-1963) estis pafmortigita de Jack Ruby.

25. Antaŭ 150 jaroj (1863) finiĝis la batalo ĉe Chattanooga, en kiu la usona armeo venkis la konfederacian armeon.

Antaŭ 50 jaroj mortis Aleksandr Marinesko (1913-1963), kapitano de submarino, torpedinta i. a., la germanan ŝipon Wilhelm Gustloff.

28. Antaŭ 50 jaroj estis murdita la 22-jara usona aktorino Karyn Kupcinet (1941-1963).

30. Antaŭ 25 jaroj (1988) en USSR ĉesis ĵamado de radio Libero.

Antaŭ 150 jaroj naskiĝis la filipina revoluciulo Andrés Bonifacio y de Castro (1863-1897).

Ĉi tiu listo aperis en la novembra kajero de La Ondo de Esperanto (2013).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2013, №11.
Rete: La Balta Ondo http://sezonoj.ru/2013/11/novembro/