En la unua parto de sia studaĵo Bitlibra revolucio akad. Sergio Pokrovskij konstatas, ke ĉiam pli da homoj legas librojn per elektronikaj aranĝaĵoj. Prezentinte la nunan konfuzon terminologian, la Siberia akademiano proponas kelkajn terminojn, poste prezentas la avantaĝojn de la bitlibroj kaj parolas pri ekranoj tralumaj kaj reflektaj. Lia akademia kolego, prof. Michel Duc Goninaz, publikigis la unuan parton de sia studo, kies titolo Kelkaj rimarkoj pri la t. n. “akuzativo” verŝajne ne bezonas plian klarigon, same kiel la titolo de la artikolo de la Finnlanda akademiano, prof. Jouko Lindstedt Se Esperanto estas tiel facila, kial oftas eraroj en tekstoj? Ĉu vi scivolas: kial? Legu la martan Ondon.

Cetere, se temas pri la Akademio, en ĉi tiu Ondo oni povas legi raporton pri la elekto de triono de la Akademio, kaj vidi la tutan liston de la 45 membroj de la plej malnova Esperanto-institucio en la mondo.

La kvara granda marta materialo estas intervjuo kun Povilas Jegorovas, la ĉefa organizanto de la 52aj Baltiaj Esperanto-Tagoj, kiu respondas demandojn pri la preparado de ĉi tiu plej longtradicia internacia Esperanto-renkontiĝo en Eŭropo, pri la kongresurbo Birštonas, kaj eĉ pri lokaj veteroj, prezoj kaj manĝaĵoj.

Kompreneble, la tradicia primovada rubriko “Eventoj” ne malaperis, ĝi nur reduktiĝis al kvar paĝoj, kaj en ĝi oni povas legi pri eksteraj konferencoj, kiuj okazos en Nitro samtempe kun la 101a UK, pri la vintra sesio de la Interlingvistikaj Studoj ĉe la Poznana universitato Adam Miczkiewicz, pri la rekorde amasa turista renkontiĝo Poludnica en Slovakio, pri la vintra Moskva Esperanto-renkontiĝo kaj aliaj esperantista aktivaĵoj okazintaj kaj okazontaj.

En la rubriko “Tribuno” estas, interalie, komentario de Dafydd ab Iago pri la malklara estonteco de EU kaj du artikoletoj de Peter Baláž: KD Esperanto senpage havebla rete kaj KAEST 2016 invitas. Efektive, ĉi-jara kongreslando Slovakio neeviteble aperas pli ofte en 2016, kaj ĉi-foje la kovropaĝon ornamas foto de la ĉefa placo de Nitro, sur kiu estas planata muzika festivalo Esperanta-slovaka, vendrede, la 29an de julio 2016, kiel adiaŭa vespero de la 101a Universala Kongreso de Esperanto.

En la kultura sekcio la legantoj trovos la novelon La lupino de Julian Modest, recenzon de Paŭlo Moĵajevo pri la disko Superbazaro de Martin Wiese & La Talpoj, prezenton de la 24a Beletra Almanako kaj kelkajn kultur-temajn artikoletojn. En la sama sekcio enestas ankaŭ malgaja anonco pri la forpaso de la Siberia Esperanto-verkisto kaj eminenta rakontisto Viktor Sapoĵnikov kaj lia lasta babilado-recenzo.

En la rubriko “Nia Trezoro” Zlatko Tišljar rakontas la historion de la Internacia Instituto por Oficialigo de Esperanto. Ne povas manki en la marta kajero la tradicia rubriko “Mozaiko” kun nova konkurstasko, ŝercoj kaj “Spritaj splitoj kaj preskeraroj” de István Ertl.

Daŭras la abonkampanjo por 2016. La Ondo de Esperanto estas abonebla en la tradicia papera formo kontraŭ 42 eŭroj por la tuta jaro kaj kontraŭ 21 eŭroj por jarduono. Ni proponas rabatojn por ekssovetiaj, orient-eŭropaj, afrikaj, sud-amerikaj kaj kelkaj aziaj landoj.
La elektronika jarabono kostas nur 15 eŭrojn.

Legu pli pri la aboneblo kaj pagmanieroj.

En la dua duono de marto, ni eksperimente publikigos la martan kajeron laŭ la bitlibra normo “ePub”, destinita por elektronikaj librolegiloj.

La red.

1. Antaŭ 450 jaroj (1565) estis fondita Rio-de-Ĵanejro.

Antaŭ 200 jaroj (1815) Napoleono revenis al Francio el sia ekzilo en Elba.

2. Antaŭ 50 jaroj (1965) la usona aerarmeo komencis konstantan bombadon de D. R. Vjetnamio.

5. Antaŭ 200 jaroj mortis Franz Anton Mesmer (1734-1815), germana medicinisto, kreinto de la animala magnetisto, nun konata kiel mesmerismo.

Antaŭ 75 jaroj mortis Cai Yuanpei (1868-1940), ĉina edukisto kaj revoluciulo, subtenanto de Esperanto.

6. Antaŭ 200 jaroj naskiĝis Pjotr Jerŝov (1815-69), rusa poeto kaj prozisto.

7. Antaŭ 250 jaroj naskiĝis Joseph Nicéphore Niépce (1765-1833), franca pioniro de fotografado.

8. Internacia tago de virinoj.

Antaŭ 150 jaroj naskiĝis Leo Belmont (Leopold Blumental, 1865-1941), pollanda judo, ĵurnalisto, verkisto kaj esperantisto.

9. Antaŭ 125 jaroj naskiĝis Vjaĉeslav Molotov (Skrjabin, 1890-1986), ĉefministro (1930-41) de USSR, popolkomisaro /ministro pri eksteraj aferoj (1939-49, 1953-56).

10. Antaŭ 600 jaroj naskiĝis Bazilo II la Blinda (1415-62), granda princo moskva (1425-62).

Antaŭ 75 jaroj naskiĝis Chuck Norris (Carlos Ray Norris Jr., 1940-), usona aktoro kaj luktartisto.

Antaŭ 75 jaroj mortis Miĥail Bulgakov (1891-1940), rusa sovetia verkisto kaj dramaturgo.

11. Antaŭ 25 jaroj (1990) la Supera Soveto de Litova SSR deklaris la sendependiĝon de Litovio.

12. Antaŭ 75 jaroj (1940) en Moskvo estis subskribita pactrakto inter USSR kaj Finnnlando, per kiu finiĝis la “norda milito”.

Antaŭ 75 jaroj naskiĝis Mauri Antero Numminen (1940-) finna muzikisto kaj komponisto.

15. Antaŭ 25 jaroj (1990) la Kongreso de popolaj deputitoj elektis la unuan (kaj solan) prezidenton de USSR – Miĥail Gorbaĉov.

Antaŭ 150 jaroj naskiĝis Carlos Gagini (1865-1925), kostarika filologo kaj esperantisto.

16. Antaŭ 25 jaroj mortis Neil Salvesen (1944-90), angla esperantisto, direktoro de la Centra Oficejo de UEA (1987-90).

18. Antaŭ 50 jaroj (1965) la sovetunia kosmonaŭto Aleksej Leonov forlasis la spacŝipon Vosĥod-2 kaj faris la unuan promenon en la kosma spaco.

Antaŭ 325 jaroj en Kenigsbergo naskiĝis Christian Goldbach (1690-1764), germana matematikisto, aŭtoro de la ĝis nun ne pruvita “konjekto de Goldbach”.

19. Antaŭ 75 jaroj naskiĝis Carlo Minnaja (1940-), itala matematikisto kaj denaska esperantisto.

20. Ekvinokso.

Antaŭ 200 jaroj (1815) Napoleono triumfe revenis al Parizo.

Antaŭ 100 jaroj naskiĝis Svjatoslav Riĥter (1915-97), virtuoza sovetunia pianisto.

Antaŭ 20 jaroj mortis Lev Jaŝin (1929-90), sovetunia futbalisto, la plej bona golisto en la historio de futbalo, la sola golisto kiu ricevis la Oran Pilkon (1963).

22. Antaŭ 100 jaroj (1915) post kvarmonata sieĝado la ruslanda armeo konkeris la aŭstrian-hungarian fortreson Przemyśl (nun en Pollando).

Antaŭ 100 jaroj naskiĝis Georgij Ĵĵonov (1915-2005), populara sovetunia kaj ruslanda aktoro.

25. Antaŭ 50 jaroj naskiĝis Stefka Kostadinova (1965-), bulgara atletino, kies mondrekordo pri altsaltado (209 cm) starigita en 1987 ĝis nun ne estas superita.

27. Antaŭ 25 jaroj (1990) en Londono ekfunkciis muzeo de Ŝerloko Holmso (Bakerstrato 221b).

Antaŭ 400 jaroj mortis Marguerite de Valois (1553-1615), edzino (1572-99) de Henriko IV de Francio, konata kiel reĝino Margot.

Antaŭ 100 jaroj mortis Sifo (Liu Shifu, 1884-1915), ĉina anarkiisto, verkisto kaj esperantisto.

30. Antaŭ 75 jaroj (1940) Nankino iĝis ĉefurbo de la marioneta ĉina registaro de Wang Jingwei.

31. Antaŭ 75 jaroj (1940) Karela-Finna SSR iĝis la 12a respubliko de USSR (ĝis 1956).

Antaŭ 100 jaroj naskiĝis Yokoi Shoichi (1915-97), japana kaporalo kiu malgraŭ la kapitulaco de Japanio militis ĝis 1972 en la insulo Guam.

Antaŭ 675 jaroj mortis Ivano I (1283-1340), princo moskva (1325-40), vladimira (1328-40) kaj novgoroda (1328-37), kromnomita Kalita (= burso).

Ĉi tiu listo aperis en la marta kajero de La Ondo de Esperanto (2015).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2015, №3.
Rete: La Balta Ondo http://sezonoj.ru/2015/03/marto2015/

3. Antaŭ 775 jaroj pereis Vladimiro Rurikido (1187-1239), kieva grandprinco (1223-36).

6. Antaŭ 50 jaroj (1964) la usona boksa mondĉampiono Cassius Clay aliĝis al la Nacio de Islamo kaj akceptis la nomon Muhammad Ali.

7. Antaŭ 25 jaroj (1989) Irano rompis diplomatiajn rilatojn kun Britio pro la skandalo pri la Satanaj versoj de Salman Rushdie.

8. Internacia virina tago.
Antaŭ 75 jaroj naskiĝis Lidija Skoblikova (1939-), sovetunia sketistino, la sola sesfoja (du en 1960, kvar en 1964) olimpika ĉampiono en la historio de sketado.

9. Antaŭ 200 jaroj naskiĝis la ukraina poeto Taras Ŝevĉenko (1814-61).

11. Antaŭ 500 jaroj mortis Donato Bramante (1444-1514), konstruinto de la baziliko de S-ta Petro en Romo.
Antaŭ 450 jaroj (1564) aperis Apostolo (Agoj kaj Epistoloj de Apostoloj), la plej malnova presita ruslingva libro kun ekzakta eldondato.
Antaŭ 75 jaroj naskiĝis John Wells (1939-), brita lingvisto kaj esperantisto, prezidanto de UEA (1989-95), prezidanto de la Akademio de Esperanto (2007-13).

12. Antaŭ 75 jaroj naskiĝis Arkadij Zvezdin (1939-80), konata kiel Arkadij Severnyj (la Norda), la plej konata plenumanto de la sencenzuraj kanzonoj en Sovetunio.

13. Antaŭ 25 jaroj (1989) Timothy Berners-Lee inventis interreton.

14. Tago de libro en la rusortodoksa eklezio.
Antaŭ 75 jaroj (1939) Slovakio deklaris sian sendependiĝon de Ĉeĥoslovakio.

15. Antaŭ 75 jaroj (1939) Germanio okupis Ĉeĥoslovakion.

16. Antaŭ 175 jaroj naskiĝis Sully-Prudhomme (René François Armand Prudhomme, 1839-1907), franca poeto kaj eseisto, la unua nobelpremiito pri literaturo (1901).

18. Antaŭ 700 jaroj estis ŝtiparumita la lasta templana grandmajstro Jacques de Molay (?-1314).
Antaŭ 175 jaroj (1839) Ĉinio malpermesis al britaj kaj alilandaj kompanioj vendi opion en Ĉinio; tio kaŭzis la unuan opian militon.

20. Ekvinokso.
Internacia tago de franclingvanoj.
Antaŭ 775 jaroj mortis Hermann von Salza (ĉ. 1165-1239), grandmajstro de la Teŭtona ordeno (1210-39).
Antaŭ 375 jaroj naskiĝis Ivan Mazepa (1639-1709), hetmano de la ukrainaj kozakoj (1687-1708).

21. Internacia tago de poezio. Antaŭ 175 jaroj naskiĝis la rusa komponisto Modest Musorgskij (1839-81).
Antaŭ 125 jaroj naskiĝis Aleksandr Vertinskij (1889-1957), rusa kaj sovetia filmaktoro, komponisto, poeto, kabaredisto kaj kantisto.

23. Antaŭ 75 jaroj (1939) Litovio kaj Germanio interkonsentis pri transdono de Memellando al Germanio. Samtage Hungario per aeratako komencis militon kontraŭ Slovakio.

25. Antaŭ 100 jaroj naskiĝis Frédéric Mistral (1830-1914), provenca poeto kaj vortaristo, nobelpremiito pri literaturo (1904).

27. Internacia tago de teatro.

28. Antaŭ 1650 jaroj (364) imperiestro Valenteniano dividis la Romian imperion, lia frato Valento ekregis la orientan parton de la imperio.

30. Antaŭ 100 jaroj naskiĝis Juan Régulo Pérez (1914-93), kanaria esperantisto, eldoninta preskaŭ cent Esperanto-librojn en la serio Stafeto.

31. Antaŭ 200 jaroj (1814) la koalicia armeo sub la gvido de la ruslanda imperiestro Aleksandro la 1a solene venis en la kapitulaciintan Parizon.
Antaŭ 125 jaroj (1889) en Parizo ekfunkciis Eiffel-Turo.
Antaŭ 100 jaroj naskiĝis Octavio Paz (1914-98), meksika verkisto kaj diplomato, nobelpremiito pri literaturo (1990).
Antaŭ 75 jaroj naskiĝis Zviad Gamsaĥurdia (1939-93), la unua prezidento de Kartvelio (1991-92).
Antaŭ 50 jaroj (1964) rezulte de ŝtatrenverso en Brazilo ekregis reĝimo de generalo Castello Branco.

Ĉi tiu artikolo aperis en la marta kajero de La Ondo de Esperanto (2014).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2014, №3.
Rete: La Balta Ondo http://sezonoj.ru/2014/03/marto-2/