Kaŭno: Povilas Jegorovas raportas pri la agado de LEA en 2016
(Foto: Aleksejus Karpovas)

Daŭras la multjara tradicio de litoviaj esperantistoj meze de decembro organizi la Zamenhof-Tagojn kaj kongreson de Litova Esperanto-Asocio (LEA). Ĉi-jare al Kaŭno por la du aranĝoj, okazintaj la 10-11an de decembro venis 129 esperantistoj el 15 urboj de Litovio kaj kvar gastoj el Latvio.

Komence de la 52-a kongreso de LEA ties prezidanto Povilas Jegorovas koncize raportis pri la agado de la asocio dum 2016 (BET-52, aliaj aranĝoj, instruado de Esperanto, informado pri Esperanto, internaciaj kontaktoj, eldona agado, kaj aliaj aferoj).

La ĉefa ĉi-jara laboro de la asocio estis okazigo de la tre sukcesaj 52aj Baltiaj Esperanto-Tagoj, kiuj laŭ ĉiuj aspektoj esence elstariĝis el ĉiuj pli fruaj kvante kaj kvalite kun pli ol 300 esperantistoj el preskaŭ 30 landoj. Okaze de ĉi-jara BET ni publikigis serion da historiaj artikoloj kun fotoj pri ĉiuj antaŭaj litoviaj BET-oj en la retejo La Balta Ondo tiamaniere elstarigante ĝin ne nur kiel simplan aranĝon, sed ĉefe kiel tutan fenomenon de esperantista agado en Baltiaj landoj. Estus tre bone, se ankaŭ latvoj kaj estonoj farus la samon, kaj ni havus plenan bildon pri tiu unika fenomeno en Esperantujo. Ĝenerale, la informado pri BET-52 nacie kaj internacie antaŭ ĝi, dum ĝi kaj post ĝi estis vere eksterordinara. Estis publikigitaj pli ol 200 artikoloj en naciaj kaj Esperantlingvaj eldonaĵoj. Estis bonega kunlaboro kun ŝtataj instancoj de Litovio kaj kun urbaj instancoj de Birštonas. Al la programo elstare kontribuis multaj reprezentantoj de esperantista elito el diversaj landoj. Tio ĉio estis rezulto de preskaŭ trijara tre zorga laboro de litoviaj kaj alilandaj esperantistoj.

Okazis ankaŭ ĉiuj aliaj tradiciaj aranĝoj de litoviaj esperantistoj (ĵurnalista kaj katolika renkontiĝoj, “Rideto” en Šiauliai k. a.).

Instruado de Esperanto okazas en la universitato de Vilno (Gediminas Degėsys), universitato de Šiauliai (Zenonas Sabalys), gimnazio de Mažeikiai (Gražina Opulskienė), gimnazio de Darius kaj Girėnas en Kaŭno (Aida Čižikaitė) kaj aloloke.

Sufiĉe aktiva estis la informado pri Esperanto en litoviaj amaskomunikiloj – radioj, televidoj, retgazetoj, paperaj gazetoj k. a.

Bone evoluas internaciaj kontaktoj de litoviaj esperantistoj. Pli ol dudeko da litovianoj partoprenis la 101an UK en Nitra. Gražina Opulskienė instruis en Finnlando. Estas intensaj kunlaboraj kontaktoj kun la Kaliningradaj Esperanto-establoj: “La Ondo de Esperanto”, “La Balta Ondo”, eldonejo “Sezonoj” kaj “Radio Esperanto”. Ekestis utila kunlaboro kun la litovia membro de la Eŭropa Komisiono Vytenis Andriukaitis.

Pli modesta estis la eldona agado. Tamen en Panevėžys estis reeldonita lernolibro de Esperanto de Juozas Lazauskas, Emilija Rapka el Vilno eldonis poezian libreton, Angelė Straleckienė el Marijampolė eldonis sian libreton “Mirindaj momentoj”. Okaze de BET-52 aperis plenkolora broŝuro pri Birštonas en Esperanto.

Dum la jaro estis multaj kontaktoj kun diversaj ŝtataj funkciuloj pri esperantista agado. La prezidanto de LEA Povilas Jegorovas kelkfoje renkontiĝis kun la unua vicprezidanto de la Litovia parlamento Vydas Gedvilas, trifoje renkontiĝis kun vicprezidanto de la Litovia parlamento Gediminas Kirkilas, kaj unufoje kun alia vicprezidanto de la parlamento Algirdas Sysas, kvinfoje renkontiĝis kun la unua vickancieliero de la Litovia registaro Rimantas Vaitkus kaj kun aliaj gravaj personoj.

Fine de la kongreso Povilas Jegorovas enmanigis dankfoliojn al 16 litoviaj esperantistoj, kiuj en 2016 festis siajn jubileojn.

En la diskuto pri la esperantista agado partoprenis Vilius Šidlauskas (Panevėžys), Palmira Lukoševičienė (Panevėžys ), Audrys Antanaitis (Vilno), Vida Kulikauskienė (Panevėžys), Algimantas Piliponis (Vilno), Marijus Dilba (Vilno).

Posttagmeze komenciĝis la Zamenhof-Tagoj-2016. Ĝia ĉefa programero estis prelego de Vytautas Šilas “Renaskiĝo de litovia Esperanto-movado en la poststalina Litovio. La jaro 1956”. Sekvis informoj kun demonstrado de bildoj de Taesok Choe pri Koreio kaj pri la 102a Universala Kongreso de Esperanto, okazonta venontjare en Seulo. La vespero finiĝis per koncerto de koruso el Panevėžys “Godos” sub la gvido de Jelena Urbutienė, kiu kantis en la litova lingvo kaj en Esperanto.

La sekvan tagon okazis interŝanĝo de informoj kaj opinioj pri esperantista agado en Litovio kaj najbaraj landoj.

Dum la du aranĝoj funkciis riĉa libroservo, eblis aboni Esperanto-gazetojn kaj aliĝi al la 102a UK en Seulo, al la 53aj Baltiaj Esperanto-Tagoj en Liepaja (Latvio). Al BET-53 aliĝis 49 litoviaj esperantistoj, al UK en Seulo aliĝis kvar personoj.

Povilas Jegorovas

Ĝi estas artikolo el la januara kajero de La Ondo de Esperanto (2017).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2017, №1.
Rete: La Balta Ondo http://sezonoj.ru/2016/12/litovio-19

Al la 37a BET aliĝis pli ol tricent personoj
(Foto: Gražvydas Jurgelevičius)

La Litova Agrikultura Universitato apud Kaunas jam kelkfoje disponigis siajn ejojn por kunvenoj de esperantistoj. Ĉi-jare de la 7a ĝis la 15a de julio ĉi tie okazis la 37aj Baltiaj Esperanto-Tagoj. Por pasigi semajnon en amika etoso, por praktiki la lingvon, por konatiĝi kun la urbo kaj Litovio, kolektiĝis 303 samideanoj el 18 landoj. Post kelkjara interrompo ni denove ekvidis esperantistojn el Rusio, Ukrainio, Belorusio, inter ili estis veteranoj de iamaj BEToj kaj SEJToj – M. Bronŝtejn, A. Gonĉarov, A. Belov, M. Lineckij – kiuj pliriĉigis la programon per siaj kontribuaĵoj.

La programo de BEToj fariĝis jam tradicia kaj iomete similas al tiu de Universalaj Kongresoj: prelegoj en Somera Universitato, diversnivelaj kursoj de la lingvo internacia, seminarioj por E-instruistoj kaj aktivuloj, ekskursoj, distraj vesperoj. Krome okazis diservoj en la universitata kapelo, dum kiu Esperante kantis infana koruso gvidata de L. Katilienė. Interesiĝantoj povis konatiĝi kun la litova lingvo, ĝia historio kaj literaturo.

En la Somera Universitato prelegis M. Bronŝtejn (“Postnikov kaj Zamenhof – aventuristo kaj idealisto”, “Josif Brodskij – poeto de la jarcento”, “A.Puŝkin – vivo, poezio, tradukoj”). A. Gonĉarov (“Fascina riĉiĝo de E-pensokosmo”, “Biokampo de la homoj kaj ties influo al la ĉirkaŭaĵo”, “Instruado de Esperanto en la moderna tempo”, “E-kluboj – degenero aŭ nova vidpunkto”, “E-movado el la vidpunkto de la sistemteorio”), J. Petrovskaja (“Popola verkisto Jakub Kolas”), N. Caragea (“Fama infanlibro – interesa aŭtoro”), V. Banaitis (“Idealismo sur la sojlo de Eŭropa Unio”), J. Parzyszek (“Ŝapiro – gvidanto de Esperanto-movado en Bjalistoko”, “La bazaj reguloj de merkato. Ĉu ni apliku ilin en E-agado”), E. Karczewska (“Esperanto-mono kaj medaloj”), L. Filipova (“Ĉeĥio kaj ĉeĥa E-movado”), K. Tove Thuro (“Ĉu reklamo aŭ informado pri Esperanto”, “Signifo de la laboro de Martinus al la homaro kaj mondpaco”), Z. Garbaravičienė (“Ajurveda”), V. Batijevski (“Mineralo ŝungito por la sano”), I. Enghart (“Praktika mikologio – mirindaĵo de Indonezio”), V. Matuzevičienė (“Pri sana vivmaniero”), S. Staišiūnaitė (“Yumeiho- terapio”), W. Posthuma (“La organizo de Lingva Festivalo”).

Precipe necesas mencii varian, abundan kaj profesinivelan artan programon, kiu estis merito de Aida Čižikaitė: ŝi sukcesis venigi sur scenejon konatajn kolektivojn. Post la oficiala inaŭguro la Ĉambra orkestro de Kaunas, gvidata de la fama dirigento Pavel Berman, majstre plenumis Seksteton por kordaj instrumentoj de P. I. Ĉajkovskij (Opus 40), konsistantan el kvar partoj.

Ĉambra orkestro de Kauno, gvidata de Pavel Berman (Foto: Gražvydas Jurgelevičius)

Por la BETanoj koncertis virina ensemblo “Elegija” kaj infana dancgrupo “Sūkurys”, blovorkestro “Ąžuolynas”, koruso de Vytautas-preĝejo kaj grupo de popolaj dancistoj “Ainiai”, folklora ensemblo “Žaisa”, grupo “Asorti” el Visaginas, infana estrado “DND”; pupteatro prezentis esperantlingve spektaklon “La ora ovo”. En la programo partoprenis ankaŭ polaj kaj ukrainaj esperantistoj. Post la fermo aktorino B. Prekevičiūtė deklamis tradukojn de litova poezio, kantis solistino O. Matusevičiūtė.

Por la partoprenantoj estis organizitaj senpagaj ekskursoj tra la urbo Kaunas kaj al fama arkitektura ensemblo de Pažaislis-monaĥejo. Dum la tuttaga ekskurso estis vizitita Parko de Grūtas kaj urbeto Veisiejai, kie en 1885 loĝis L.Zamenhof.

Albinas Pečelis

Fonto: Litova Stelo, 2001, №4.

La 37an fojon en Baltio

Reprezentantoj de baltiaj Esperanto-Asocioj en la inaŭguro: Biruta Rozenfelde (Latvio), Povilas Jegorovas (Litovio) kaj August Kilk (Estonio) (Foto: Gražvydas Jurgelevičius)

Tradiciaj Baltiaj Esperanto-Tagoj (BET-37) okazis la 7–15an de julio en Litovio. Por pasigi unu semajnon en amika etoso kaj praktiki nian lingvon venis 303 esperantistoj el 18 landoj. En ĉirkaŭaĵo de Kaunas ili povis ne nur ĝui la belan veteron, sed ankaŭ partopreni abundan programon de la aranĝo.

Dum la solena inaŭguro de BET-37 post enkondukaj vortoj de la prezidanto de Litova E-Asocio Povilas Jegorovas, estis tralegitaj salutmesaĝoj de Valdas Adamkus, prezidento de Litovio, kaj de L. C. Zaleski-Zamenhof. Salutis ankaŭ reprezentantoj de landoj, kaj poste sekvis la koncerto de la Ĉambra Orkestro de Kaunas, gvidata de Pavel Berman.

Ĉiumatene dezirantoj komune kuradis kaj naĝis en la apuda artefarita lageto. Post la matenmanĝo eksterlandanoj povis konatiĝi kun la litova lingvo. Por lernemuloj funkciis paroligaj kaj perfektiga kursoj.

La somera universitato estis riĉa je diverstemaj prelegoj. Gastoj kaj lokaj esperantistoj prelegis pri la E-movado, literaturo, sana vivmaniero ktp. Se iu trovis prelegojn neinteresaj, li/ŝi povis spekti videofilmojn, viziti la libroservon aŭ “krokodilejon”, kie troviĝis gaja kolekto da krokodiloj kaj aliaj ekspoziciaĵoj.

Ĉiuvespere okazis prezentado de popolaj metioj (ceramiko, ligna skulptoarto, teksaĵoj ktp.), diversaj koncertoj, instruado de balaj dancoj kaj diskotekoj. La pupteatro speciale por BET-37 preparis spektaklon en Esperanto laŭ litova popola fabelo La Ora Ovo.

Dikredantoj povis partopreni en loka kapelo la katolikan meson kaj la ekumenan Diservon. La infanoj havis proprajn programerojn. La etoson varmigis aŭkcio kaj diversaj ludoj, kiujn prezentis gastoj el Ukrainio, Ruslando kaj Germanio. Ĉiutage aperis informilo BETago.

Dezirantoj ekskursi vizitis la malnovan urboparton de Kaunas kaj monaĥejon Pažaislis, kaj ili havis tuttagan ekskurson al la parko Grétas apud Druskininkai, kie estas kolektitaj kaj starigitaj 70 diversaj monumentoj de sovetaj “idoloj”. Survoje oni vizitis urbeton Veisiejai, kie Ludoviko Zamenhof loĝis kaj kie estas monumento al li.

BET-37 finiĝis, sed al la Organiza Komitato daŭre venas kaj kritiko kaj dankvortoj. La unua helpas rimarki erarojn kaj mankojn en nia laboro, kaj la dua ĝojigas niajn korojn.

Rita Valčiukaitė

Fonto: La Ondo de Esperanto, №2001, 8-9.

La 37a BET en Kaunas

Oni kantas la himnon de Esperanto en la inaŭguro (Foto: Gražvydas Jurgelevičius)

Tradiciaj Baltiaj Esperanto-Tagoj, ĉi-jare en litova urbo Kaunas, okazis ekde la 7a ĝis la 15a de julio 2001. Entute 303 partoprenantoj el 18 landoj venis en belan urbon Kaunas por studi, praktiki kaj perfektigi sian lingvoscion. Organiza komitato estis preta plenumi ĉiujn niajn dezirojn kaj respondi ĉiujn demandojn. Tamen unu mian peton (mi petis loĝi kun iu, kiu parolas Esperante) oni ne plenumis. Tiu ĉi evento iom ĝenis min.

La programo estis alloga kaj bunta. Ni povis lerni la lingvon en la kursoj por komencantoj; perfektigan kaj paroligan kurson gvidis fama verkisto kaj tradukisto Trevor Steele el Aŭstralio, prelegoj en Somera Universitato estis variaj. La prelegon, kiun mi preparis pri Ĉeĥio kaj E-movado ĉe ni, aŭskultis deko da interesatoj. Mi kun niaj geamikoj respondis ĉiujn demandojn, sed ŝokis nin malĝusta informo de iu germana esperantistino, laŭ kiu ĉe ni aperas neniu E-gazeto. Ŝi ricevis eĉ kelkajn. Ni vidis filmojn en Esperanto, ni povis eklerni danci kaj spekti multajn vesperajn programojn en alta nivelo. Por infanoj kaj junularo okazis aparta programo. Ni povis ĝui senpagan ekskurson al malnova parto de la urbo kaj al monaĥejo Pažaislis.

La tuttaga ekskurso, kiu okazis merkrede, celis al suda Litovio, kie muĝas la plej grandaj pinaroj kaj fluas ĉarmaj riveroj, inter ili ankaŭ Nemunas. Dum la ekskurso ni vizitis unikan parkon de sovetaj skulptaĵoj (renversitaj idoloj). Kvankam mi komence ne volis partopreni la ekskurson, mi partoprenis kaj mi ekvidis veran historion en unu loko. Mi povis eksenti etoson de la koncentrejoj “Gulag:. En kuracloko Druskininkai ni enŝipiĝis kaj ŝipveturis laŭ la rivero Nemunas. En Liškiava ni elŝipiĝis, surgrimpis kastelmonteton, kaj vizitis la plej belan barokan preĝejon en Litovio. Poste la buso veturigis nin al urbeto Veisiejai, kie loĝis L. L. Zamenhof kaj kie okazis antaŭ tri jaroj BET. En tiu ĉi malgranda urbeto troviĝas du monumentoj de Zamenhof. Post bongusta tagmanĝo ni revenis al Kaunas.

Ĉiutage aperadis bulteno “BETago”, kie ni povis legi la programon por venonta tago, tamen kelkaj programeroj estis lastmomente translokigitaj aŭ nuligitaj, pri kio ni eksciis nur veninte surloken. Distrajn paĝojn de “BETagoj” plenigis partoprenantoj mem. Ekspozicioj, ĉambro kun krokodiloj, eĉ unu viva, kaj ĉiutage alia ekspozicio de partoprenantoj pri ĉiutaga vivo en E-kluboj, donacetoj kaj aliaj tre plaĉis al ni.

Meznokta piroteknika artfajraĵo finis kaj kronis nian renkontiĝon. Ĝis la revido venontjare en Riga, kie okazos sekvanta BET, kaj samtempe la urbo festos sian 800-jaran jubileon. La dato verŝajne estos la komenco aŭ mezo de julio.

Libuše Filipova (Ĉeĥio)

Fonto: Litova Stelo, 2001, №4.

BET – re-kaj-re-alloga

Saluton, valora BET, saluton, altestimata Litovio, saluton, karaj revidataj geamikoj malnovaj, estonoj, latvoj kaj litovoj! Muzikis tiuj vortoj en mia koro, dum la trajno proksimiĝis al la celo. La politikaj muroj-landlimoj apartigis nin, kaj eksuferis la samideanaj ligoj: vakuo en E-aranĝoj, ĉu Rusiaj, ĉu BET-aj. Sed ĉi-jare ne nur mi, sed hazarde ankoraŭ dek kvar rusianoj venis ĉe Kaunas al rememora BET, ĉi-foje la 37a.

Kun bedaŭro mi konstatis, ke multaj veteranaj geesperantistoj ĉebaltiaj ne jam estas inter ni. Eternan pacon kaj rememorojn al ili! Ankaŭ mi, iama studento de unuaj BET-oj, jam trafis la veteranajn vicojn. Ne multis ni, eksstudentoj bet-aj, ĉi-foje: Biruta Rozenfelde (iam Kondrate), Inita Tamošiūnienė (iam Gudanec), Vytautas Šilas, August Kilk kaj Miša Bronštejn kun mi. Fortiĝis ni… De tiuj paĝoj mi alvokas aliajn bet-anojn: revenu ni ĉiuj al BET-38, 39 k. a.! Kiom ni vivos neniu scias, uzu ni dume nian surteran interkomunikadon-amikadon ne nur nacilingvan, sed ankaŭ E-lingvan.

La ĉi-jaran BET-on mi prezentos de du vidpunktoj, la organiza kaj la programa. La organiza flanko plene dependis de la gastiganta lando kaj ĝi estis tute brila. Eble nur ne ĉiam lerta estis la kunordigo de la Somera Universitato. Ekzemple en unu el ĉiutagaj informiloj oni invitis al mia prelego, titolante ĝin: ”Biokampo de E-movado en la moderna tempo”. Fakte estis miksaĵo de titoloj el du miaj prelegoj: “Biokampo de la homo kaj ties influo al la ĉirkaŭo” kaj “Instruado de Esperanto en la moderna tempo”.

La programo de BET iĝis iom alia ol en la iamaj, de mi vizititaj, en la 60-70-aj jaroj. Nun pliriĉiĝis la distra kaj ĝenerala parto kaj malkreskis la primovada kaj multnacikolora partoj. Estis inde malpli da vere E-lingvaj koncertoj, sed elkreskis la nacilingva enmeto. Estis ege riĉa oferto de Litovia arto. Ni vidis kaj aŭdis: ĉambran orkestron el Kaunas (brila muzikado), la ensemblon “Elegija” kun infana dancgrupo “Sūkurys”, folkloran ensemblon “Žaisa”, koruson de Vytautas preĝejo kun popola dancensemblo “Ainiai”, blovorkestron “Ąžuolynas” kun gimnastika dancgrupo, pupteatran spektaklon “La Ora Ovo” (litova popolfabelo). Kelktage funkciis la ekspozicio de popolaj metioj.

Ne mankis pluraj interesaj ekskursoj, unu tuttaga al la parko de komunismaj idoloj (en Grūtas) kaj Veisiejai, kie loĝis L.Zamenhof. Sufiĉe riĉis ankaŭ E-parto de la programo. Laboris diversnivelaj E-kursoj. En la Somera Universitato oni aŭdis ĉ. 20 diversfakajn prelegojn. Plej ĝuindaj estis tiuj de M. Bronŝtejn. “A. Puŝkin – vivo, poezio, tradukoj” kaj “Josif Brodskij – poeto de la jarcento”. Interesaj por mi estis la prelego de V. Matuzevičienė “Pri sana vivmaniero” kaj kelkaj aliaj.

Dank’ al M. Lineckij oni gustumis la ŝerc-humuran konkurson “Klubo de gajaj kaj spritaj”, iam famega en SEJToj. Ankaŭ interesa estis kvizo fare de pola grupo. Sed la kromprograma E-lingva interkomunikado de diversnacianoj, novaj kaj malnovaj geamikoj ( kaj ni estis pli ol 300 el 18 landoj) – jen estas la vera trezoro de BET-oj, kiu ĉiam logas re-kaj re-partopreni. Vera komunikfrandaĵo por mi estis la Aŭstralia verkisto Trevor Steele. Mi eĉ intervjuis lin por la revuo “La Gazeto”, kie oni legos baldaŭ liajn interesajn pensojn. Same mi ĝuis la konversaciojn kun Nora Caragea el Germanio. Soile Lingman el Svedio, Miĥail Lineckij el Ukrainio kaj pluraj aliaj interesaj personoj. Se aldoni la bongustan manĝon kun atentema servistaro, kaj feriajn loĝkondiĉojn mi konkludas BET-37 neforgesebla kaj neforgesinda. Dankon al la Organiza Komitato, el kiu la leonan parton de la klopodoj surprenis la prezidanto Povilas Jegorovas kaj la sekretariino ĉarma Rita Valčiukaitė! Bonege funkciis la informado sub la prizorgo de Petras Čeliauskas kaj Jevgenij Gaus.

Mi ŝatus, se en E-aranĝoj aperus io nova. Ĉi-foje por BET-38 mi proponas organizi iuvespere feston ĉe la vespermanĝaj tabloj por 3-4 horoj. Aŭ organizi apartan teovesperon ĉirkaŭtablan. Anticipe oni formu la tablorondojn ĉu pri apartaj movadaj temoj, ĉu interkonatiĝaj aŭ malnovamikaj kompanioj. Apude povas esti dancplaceto. Nome io tia intimiga mankis en BET-37.

Ĝis revido en BET-38!

Anatolo Gonĉarov (Sankt-Peterburgo)

Fonto: Litova Stelo, 2001, №5

Statistiko pri la partoprenantoj

Inter la Litoviaj partoprenantoj estis pluraj gejunuloj (Foto: Gražvydas Jurgelevičius)

En BET -37 partoprenis entute 303 personoj el 18 landoj: Aŭstralio 1, Belorusio 6, Brazilo 2, Britio 1, Ĉeĥio 5, Danio 2, Estonio 2, Finnlando 13, Germanio 4, Hispanio 2, Latvio 13, Litovio 158, Nederlando 2, Norvegio 1, Pollando 64, Rusio 15, Svedio 6, Ukrainio 6.

Fonto: Litova Stelo, 2001, №4.

SALUTMESAĜO
de la Prezidento de Litova Respubliko
Valdas Adamkus

Estimataj Baltlandaj esperantistoj,

Elkore mi salutas ĉiujn zorgantojn pri lingvo Esperanto en Baltiaj landoj, ĉiujn partoprenantojn kaj gastojn de 37aj Baltiaj Esperanto-Tagoj.

Vi estas komunumo, kiu strebas al pli bona interkompreniĝo, pli proksima komunikiĝo kaj pli granda sincereco pere de via propra kaj krea vojo. Lingvo Esperanto ekde ĝia apero fariĝis rimedo unuiganta homojn, kaj tio estas la plej taŭga komprenigo de humanismaj ideoj de Doktoro Zamenhof. Estas agrable, ke la ligoj de Baltiaj landoj kun tiu lingvo esprimiĝas ne nur per historia memoro, sed ankaŭ per via nuntempa agado, per via aktiva kaj krea vivo.

Mi tiel komprenas celon de la agado, kiu kunigas vin, la samon mi deziras al via forumo kaj al ĉiuj anoj de la komunumo de Baltiaj esperantistoj.

Valdas Adamkus
Prezidento de Litova Respubliko
Vilnius, la 8an de julio 2001

SALUTMESAĜO
de nepo de L.Zamenhof

Saluton al vi, Geamikoj, partoprenantaj en la 37aj (jam!) Baltiaj Esperanto-Tagoj, kunvenintaj en la lokoj karaj al memoro de miaj Antaŭuloj, en la lokoj mejloŝtonaj de la historio, eĉ de la prahistorio de la Lingvo Internacia, en la lokoj proksimaj al mi mem, al mia koro. Kvankam milmejle de vi distanca, mi tamen kunestas spirite kun vi, spirite ĉeestas viajn debatojn, al la Eŭropa lingvojaro dediĉatajn al la temo iĝanta ĉiutage pli aktuala, en la perspektivo de larĝiĝanta Eŭropo. Mi forte esperas, ke la konkludoj, kronontaj la semajnon de fruktodonaj diskutoj, trovos meritotan eĥon ene de lingva politiko de la Eŭropa Unio, celante protekton, dank‘ al Lingvo Neŭtrala, de ekvilibra komunikado inter nacioj diversampleksaj.

Mi tutkore deziras plenan sukceson al la Organizantoj kaj al la Partoprenantoj de la Baltiaj Esperanto-Tagoj.

L. C. Zaleski-Zamenhof

SALUTMESAĜO DE UEA

Karaj gesamideanoj,

Mi kore salutas ĉiujn partoprenantojn de la 37aj Baltiaj Esperanto-Tagoj kaj deziras al vi agrablan kaj memorindan semajnon! La vicorda numero de la ĉi-jara BET atestas pri vivanta tradicio, kiu dum sia historio kunvenigis nenombreblan kvanton da parolantoj de la Internacia Lingvo, donante al ili eblecon praktiki la lingvon kaj tiel kontribui al la vivanteco de la lingvo mem.

Mi ĝojas, ke la 37a BET estas dediĉita al la Eŭropa Jaro de Lingvoj. La temaro de tiu ĉi jaro estas aparte proksima al ni esperantistoj, ĉar ni dediĉas al ĝi ne nur tiun ĉi jaron, sed la Esperanto-movado kontribuas al ĝiaj celoj jam ekde la momento de sia naskiĝo. Nia idealo estas konservo kaj defendo de ĉiuj lingvoj, precipe de malgrandaj kaj minacataj, ĉar ili estas la fundamento de sia kulturo kaj ĉiu el ili, eĉ se kiel ajn malgranda laŭ sia parolantaro, estas nemalhavebla ero de la komuna heredaĵo de la homaro kaj de la tutmonda kultura mozaiko.

En la monda skalo la nuna jaro estas proklamita de Unuiĝintaj Nacioj kiel la Jaro de Dialogo inter Civilizoj. Al tiu temo Universala Esperanto-Asocio dediĉas la ĉi-jaran Universalan Kongreson, kiu baldaŭ komenciĝos en Zagrebo, Kroatio. Mi deziras aparte elstarigi, ke estis ĝuste la gastiganta lando de la 37a BET, Litovio, laŭ kies iniciato Unesko faris sian decidon doni centran atenton al tiu jaro. Pro siaj proksimaj ligoj kun Unesko UEA siavice baptis la kongresan temon de la Zagreba UK laŭ la temo de la jaro.

Mi deziras plenan sukceson al BET – vivanta ekzemplo pri dialogo inter homoj el diversaj landoj, lingvoj kaj kulturoj!

Osmo Buller
ĝenerala direktoro de UEA

La supran materialon kompilis kaj redaktis Povilas Jegorovas kaj Aleksander Korĵenkov. Reagoj de partoprenintoj estas bonvenaj.

Pliaj informoj pri BET-52 kaj pri BEToj ĝenerale estas legeblaj en speciala rubriko de nia retejo.

Ĉe represo bonvolu indiki la fonton:
La Balta Ondo: http://sezonoj.ru/2016/04/bet-39/

Koncerto de la Esperanta koruso el Panevėžys

La 31a BET, okazinta la 8-16an de julio 1995 apud Kaŭno kun 203 partoprenantoj, estis negranda kompare kun la tri antaŭaj Litoviaj BEToj (358 partoprenantoj en BET-20, 1983; 472 partoprenantoj en BET-23, 1986; 608 partoprenantoj en BET-26, 1989) kaj kun la 65a Kongreso de SAT (452 partoprenantoj, 1992), kaj ĝi unuafoje ne havis gravan programkontribuon de esperantistoj el Ruslando kaj Ukrainio. Sed danke al la Litoviaj kaj alilandaj instruistoj, prelegantoj kaj artistoj la programo estis ne malpli riĉa kaj interesa ol antaŭe. La suba arikolo el Litova Stelo koncize prezentas la 31an BET. La artikolon akompanas la rezolucio, akceptita fine de BET-31

BET-31 pasis sukcese

Ducent tri samideanoj el dek ses landoj kunvenis por pasigi kelkajn tagojn en Esperanta medio. La tradicia, jam 31a BET okazis de la 8a ĝis la 16a de julio en Girionys, en Arbarista Lernejo, situanta surborde de Kaunasa maro, 17 km sudoriente de la urbo. Plej multe da homoj venis el Litovio (153) kaj Latvio (26); po tri el Estonio, Ĉinio, Germanio, Pollando; po du el Brazilo kaj Rusio; po unu el Belorusio, Britio, Ĉeĥio, Danio, Italio, Norvegio, Svedio, Svislando. Dek ok estis geknaboj ĝis 10-jara aĝo.

La programo de BET-oj jam fariĝis tradicia. En Somera Universitato prelegis: Kirsten-Tove Thuro (Danio) pri “La nova mondbildo de Martinus”; Margarete Bettmann (Germanio) – “Tempa trakto”, pri spuro de utera periodo sur homa spino; Telesforas Lukoševičius (Litovio) pri litova Esperanta literaturo; Povilas Stašys (Litovio) pri “Kolektado kaj Esperanto”; Valdas Banaitis (Litovio) parolis pri “Fremdlingva edukado kaj Eŭropa regiona integriĝo”. Paroligajn kaj perfektigajn kursojn gvidis Aristophio Alves (Brazilo) kaj Aldis Bušs (Latvio). Organizi ludojn kun infanoj afable konsentis Monika Bilnik (Pollando). Dezirantoj povis konatiĝi kun la historio kaj karaktero de la litova lingvo (gvidis Petras Čeliauskas). Krome kunvenadis kaj siajn problemojn pridiskutis instruistoj de Esperanto, tradukistoj, klubestroj kaj aktivuloj, medicinistoj. Ĉiutage aperadis dupaĝa informilo “BETulo” (red. P.Čeliauskas). Estis organizitaj ekspozicietoj de pentraĵoj kaj man-faritaĵoj (A. Šidlauskienė, I. Jaloveckytė, B. Šernienė, O. Jarušaitienė), funkciis libroservo (V.Tumėnas), estis vendataj insignoj kaj aliaj esperantaĵoj.

Dimanĉe en Kaunasa preĝejo de karmelanoj okazis Sankta Meso en Esperanto. Merkrede la partoprenantoj povis ekskursi tra Kaunas kaj al muzeo de popola vivmaniero (skanseno) en Rumšiškės, kiun ili atingis per ŝipo. Okazis ankaŭ ekskurso tra la loka parko, kiu okupas 210 hektarojn, kaj en ĝi kreskas ĉ. 350 specioj da arboj.

Vespere okazadis artaj prezentiĝoj: kantis konata litova kantisto Valentinas Čepkus, Esperanta koruso el Panevėžys gvidata de Monika Vasiliauskienė. Komponisto Mieczyslaw Litwinski kaj aktorino Gabija Vileniškienė prezentis sintezan vesperon de muziko kaj poezio. Kaunasaj E-kluboj montris spektakleton “Kreo de homo”.

Rezolucio
akceptita la 15an de julio 1995

La 8–16an de julio en Girionys (Litovio) okazis 31-aj Baltaj Esperanto-Tagoj, en kiuj partoprenis 203 esperantistoj el 16 landoj. Estis pridiskutitaj lingvaj problemoj en Baltaj landoj rilate integriĝon en Eŭropan Komunumon. Ĉar, post disfalo de Sovetunio, la rusa ne povas plu plenumi rolon de komuna lingvo, akre staras problemo de lingva komunikado inter Baltaj popoloj: litova, latva kaj estona. Lingva problemo estas aktuala ankaŭ en la tuta Eŭropo. Tial BET-31 akceptas jenan rezolucion:

1. Lingva komunikado inter Baltaj popoloj povas baziĝi nur sur neŭtrala fundamento, tial ni proponas la internacian lingvon Esperanto.

2. Por kunordigi la agadon de Esperanto-Asocioj de Litovio, Latvio kaj Estonio necesas organizi regulajn renkontiĝojn de gvidantoj de tiuj asocioj dum vicaj BET.

3. Organizi komune kunordigitan instruadon de Esperanto laŭ rekomendoj de rezolucioj de UNESCO. Por tio plioftigi interrilatojn inter diversgradaj lernejaj instruistoj en Baltaj landoj, interŝanĝi E-instruistojn, pli vaste uzi tradician informadon antaŭ BET-oj.

4. Kunigi intelektajn fortojn kaj materiajn-financajn rimedojn por komuna eldonado de la plej necesa Esperanta literaturo.

5. Starigi rilatojn kun E-Asocioj de aliaj landoj ĉirkaŭ Balta maro celante kunordigi Esperanto-agadon en la kadro de Eŭropa integriĝo. Pridiskuti tiujn problemojn dum la 80-a Universala Kongreso en Tampereo.

6. Ellabori je la nomo de Baltaj Esperanto-Asocioj komunan alvokon al diversaj ŝtataj organizoj de Litovio, Latvio, Estonio pri enkonduko de la internacia lingvo en diversgradajn lernejojn.

7. Konatigi kun ĉi tiu rezolucio oficialajn instancojn de Baltaj ŝtatoj.

Fonto: Litova Stelo, 1995, №5, p 1-2.

La supran materialon kompilis kaj redaktis Povilas Jegorovas kaj Aleksander Korĵenkov. Reagoj de partoprenintoj estas bonvenaj.

Pliaj informoj pri BET-52 kaj pri BEToj ĝenerale estas legeblaj en speciala rubriko de nia retejo.

Ĉe represo bonvolu indiki la fonton:
La Balta Ondo: http://sezonoj.ru/2016/03/bet-34/

Fragmento el la komuna foto (Sendis Gražina Opulskienė)

Laŭ la kutima land-ordo de la Baltiaj Esperanto-Tagoj, post la 28a BET, okazinta en 1991 en Tartu (Estonio), la 29a BET devus okazi en Litovio. Tamen ankoraŭ en 1990 Litova Esperanto-Asocio (LEA) ricevis de SAT proponon gastigi en 1992 la 65an Kongreson de SAT. Estus ege malfacile aŭ tute neeble okazigi en Litovio du grandajn internaciajn aranĝojn en la sama jaro. LEA do decidis kunigi tiujn du aranĝojn kaj en la programo de la 65a kongreso de SAT konservi laŭeble ĉiujn tradiciajn programerojn de BET. Kaj tio estis realigita. Ankaŭ la partoprenantaro de la 65a kongreso de SAT estis esence BETa. Tial oni povas konkludi, ke reale la tradicio de BEToj daŭris kaj ne estis rompita, kvankam la 29a BET okazis nur en 1993 en Priekuli (Latvio). Pro tio la 65a kongreso de SAT ĉiam aperas en la statistiko de BEToj kaj ankaŭ en nia serio pri la Litoviaj BEToj.

65a Kongreso de SAT

Okazis en urbeto de Litova Agrikultura Akademio apud urbo Kaunas la 5an-15an de aŭgusto 1992. La Akademio disponigis al kongresanoj sufiĉe da vastaj aŭditorioj, apude situantajn studentajn hejmojn por loĝado, studentajn manĝejojn kun relative bonaj pladoj por relative malalta prezo. Ŝatantoj de komforto loĝis en hoteloj de Kaunas.

Al la Kongreso aliĝis 617 personoj, venis 452, 165 personojn detenis diversaj kaŭzoj, pleje verŝajne psikologiaj – la timo de supozata nestabila situacio en la lando, antaŭnelonge akirinta sendependecon, ankoraŭ kun multaj garnizonoj de la soveta armeo. Certe, la timon spertis pleje okcidentanoj. Tamen, kiuj venis, estis ĝojigitaj per malaltaj por ili prezoj: “Per tri markoj aŭ dek frankoj oni povis en restoracion inviti kaj duope bone kaj abunde festeni”,– skribis pri siaj impresoj en Kaunas la kongresano Vilhelmo Lutermano (supozeble Wilhelm Luthermann el Germanio) en la septembra (9a) numero de “Sennaciulo”. Certe neniu ian malagrablaĵon spertis pro la supozata nestabileco.

En la solena malfermo, la Kongreson salutas nia rusa peranto, kamarado Leo Vulfoviĉ (Sennaciulo, 1992, №10)

Kontraŭe, al kongresanoj el najbaraj landoj, precipe el la tute antaŭnelonge estintaj kun Litovio en la sama kaldrono, nomita Sovetunio, la prezoj kaj baroj estis pli malfacile venkeblaj. Ekzemple, el Ukrainio (verŝajne ankaŭ el aliaj ekssovetiaj respublikoj) oni ne rajtis sendi perpoŝte aliĝkotizon. Ĝin oni “kontrabandis” helpe de personoj, veturantaj al Litovio, eĉ ne esperantistoj. Malgraŭ tio el Ukrainio venis 57 personoj, el Rusia Federacio 109, Tatarstano 2, Kazaĥstano 1, Belorusio 12, Latvio 14, Estonio 7. Certe, la plej facila aliĝo estis por litovoj, tamen da ili (registritaj) estis relative malmulte – nur 100. El okcidentanoj rekordis francoj – da ili per aŭtobuso kaj aliaj rimedoj venis 38. Laŭvice ni menciu Svedion – 10, Germanion – 8, Nederlandon – 8. Interesan bunton prezentas aliaj landoj, “sendintaj” nur po 1 ĝis 5 delegitojn: Aŭstralio, Aŭstrio, Belgio, Brazilo, Britio, Bulgario, Ĉeĥio-Slovakio, Ĉinio, Hindio, Hispanio, Hungario, Kroatio, Portugalio, Svislando, Usono. Entute estis reprezentitaj 28 landoj el 4 kontinentoj.

La ĉiutaga kongresa gazeto “Kongresvoĉo”, redaktata de Petras Čeliauskas donis precizan laŭprocentan statistikon de la kongresanoj laŭ sekso (virinoj, kiel ĉie, dominis), laŭ aĝo (superis 25-50-jaruloj), laŭ profesio (superis oficistoj}. Bedaŭrinde, mankas sciigoj, kian profesion okupis membroj de SAT. Tiun demandon iom nebule tuŝas ankaŭ la estimata Vilhelmo: “la plej granda parto de la alvenintoj ne venis pro SAT kaj ties celoj, sed simple por renkontiĝi en Esperanta etoso”. Li bedaŭras ankaŭ malabundan partoprenon en ĝeneralaj kunvenoj de SAT. Da ili laŭ la programo estis kvin, krom kunsidoj de diversaj sekcioj: pacista, naturista, amikeca reto, sindikatista, liberecana, liberpensula, landa komitato. Kunvenoj kaj prelegoj de vegetaranoj, medicinistoj, diplomatoj, literaturistoj, historiistoj, politikistoj, etnistoj kaj iuj aliaj okazis supozeble ekster programo de SAT mem. Preskaŭ ĉiutage okazis prelegoj pri ekologio, inter ili tiaj specifaj kiel “Vera kaj falsa ekologio” de Gilbert R. Ledon el Brazilo, “Ekologia pasportado de transporto” de Tatjana Bočkova el Moskvo.

El la ĉiuvesperaj koncertoj kaj teatraĵoj ni emfazu tiun de revivigita centjara Sankt-Peterburga societo “Espero”, kies violonistino 12-jara Tatjana Koĵevatova estis tondre aplaŭdata. Ŝi estas invitita por perfektiĝi al muzika lernejo en Strasburg, Germanio. El la sama rusa urbo nin ravis solisto Dĵalil Begiŝev per italaj kantoj kaj la ensemblo “Prima” per religiaj kantoj sub gvidado de esperantistino Jelena Petrenko. Precipe litovojn surprizis interpreto de poezio de Eduardas Mieželaitis en teatra prezentado “Virino – kvar bildoj” de polo Jerzy Fornal kaj en “Ponto” de kroatino Vida Jerman. Pupteatro el Ternopil prezentis “Bonan tagon, tigro”, grupo el Slavjansk (ambaŭ el Ukrainio) – “Historio kun metranpaĵo” (la francdevena vorto „metranpaĵo“, transprenita el la rusa lingvo, signifas laboriston de presejo, en Esperanto – enpaĝigisto, paĝopreparisto. A.V.). Litovoj ne nur prezentis siajn kantojn, eĉ instruis ilin. Estis instruata ankaŭ la litova lingvo. Komuna diversnacia koncerto de kongresanoj okazis lastan ĵaŭdon, la 13an de aŭgusto.

Slavjanskanoj tuj post la koncerto (Sennaciulo, 1992, №10)

La kongresanoj konatiĝis ne nur kun Kaunas – la ĉefurbo de Esperanto en Litovio, sed ĝuis tuttagajn ekskursojn ankaŭ al la politika nuntempa ĉefurbo Vilnius kaj la antikva ĉefurbo Trakai, al la subĉiela etnografia muzeo Rumšiškės kun aŭtentikaj vilaĝoj el diversaj regionoj de Litovio, la perŝipan sur la rivero Nemunas al la Kurŝa Terlango.

Ĉiutage funkciis perfektigaj kaj paroligaj kursoj, okazis kelkaj prelegoj pri metodiko de instruado.

La malfermo estis multe pli impona ol la fermo. Dum la inaŭgura himno staris en la prezido (atentu la foton) administranto de Kaunas-a distrikto Povilas Vengeliauskas, prezidanto de Kaunas-a distrikto Vidmantas Vitkauskas, urbestro de Kaunas esperantisto Arimantas Račkauskas, la ĉefa organizanto de la Kongreso, vicprezidanto de Litova Esperanto-Asocio Povilas Jegorovas, vicprezidanto de Supera Konsilio de Litova Respubliko Kazimieras Motieka, prezidanto de LEA Algimantas Laurynas Skūpas, ĝenerala sekretario de SAT Kreŝimir Barković, membroj de la Plenumkomitato de SAT: Guy Cavalier, Jacques Bannier.

En la Deklaracio plene presita en “Kongresvoĉo” №11 kaj en “Sennaciulo” №9, la Kongreso alvokas ĉiujn landojn observi homrajtojn sendepende de nacieco kaj al solidareco kun laboruloj de ekssocialismaj landoj, trafintaj en malbonajn kondiĉojn dum transiro al merkatekonomio.

La Kongreso estis vaste kaj detale lumigita en televizio, radio kaj gazetaro de Litovio, precipe dank’ al la energia organizanto de la Kongreso Povilas Jegorovas. La Redakcion [de Litova Stelo] atingis 14 gazetoj kun priskriboj de la kongreso, inter ili tiel prestiĝaj kaj popularaj kiel la ŝtata “Lietuvos aidas” , la ĉefurbaj “Respublika”, “Vakarinės Naujienos”, “Gimtasis Kraštas”, ne menciante tiujn de Kaunas mem. Longajn raportojn presis ankaŭ gazetoj de relative malproksimaj lokoj, ekz. en Klaipėda, Pasvalys.

Adomas Vaitilavičius

Fonto: Litova Stelo, 1992, №4, p. 5-8.

La supran materialon kompilis kaj redaktis Povilas Jegorovas kaj Aleksander Korĵenkov. Reagoj de partoprenintoj estas bonvenaj.

Pliaj informoj pri BET-52 kaj pri BEToj ĝenerale estas legeblaj en speciala rubriko de nia retejo.

Ĉe represo bonvolu indiki la fonton:
La Balta Ondo: http://sezonoj.ru/2016/02/bet-31/

Enkonduko de la ĉeforganizinto

La 26a BET, okazinta en aŭgusto 1989 en Noreikiškės apud Kaŭno, per kelkaj siaj trajtoj estis tre grava, tial ĝi bezonas apartan enkondukon. Unue, ĝi estis la lasta BET dum la sovetia periodo en Litovio. Due, ĝi estis la plej granda en la historio de BET-oj – ĝin partoprenis 608 esperantistoj. Trie, ĝi estis vere internacia, ĉar krom sovetianoj ĝin partoprenis esperantistoj el Bulgario, GDR, FRG, Ĉeĥoslovakio, Pollando, Hungario kaj Belgio. Post la disfalo de Sovetunio la partoprenantaro de BET-oj draste falis pro aperintaj limoj, bezonataj vizoj, signifa altiĝo de prezoj k. s. Nur post kelkaj jaroj la kvanto de esperantistoj dum BET-oj rekreskis.

La jaro 1989 estis tre maltrankvila jaro plena da multaj gravegaj kaj skuaj historiaj politikaj eventoj en tiutempaj baltiaj respublikoj de Sovetunio. Proksimiĝis sendependiĝo de Litovio. Ĉiutage kreskis kaj forte evoluis naciliberiga movado en Litovio. Proksimiĝis disfalo de Sovetunio. Tia situacio, kompreneble, ne povis ne tuŝi esperantistojn. Fine de 1988 en la 24a restariga kongreso de Litova Esperanto-Asocio estis likvidita Litovia filio de ASE (Asocio de sovetiaj esperantistoj) kaj estis restarigita la memstara Litova Esperanto-Asocio funkciinta inter 1919 kaj 1940. Tiamanere Litova Esperanto-Asocio rompis la subiĝajn rilatojn kun ASE kaj komencis kunlaborajn rilatojn kun ASE kiel kun egalrajta asocio de najbara lando. En la 74a Universala Kongreso de Esperanto en Brighton (Britio) somere de 1989 la komitato de UEA kuraĝe akceptis kiel aliĝintajn landajn asociojn Litovan Esperanto-Asocion kaj Latvian Esperanto-Asocion, kvankam tiutempe Litovio kaj Latvio ankoraŭ ne estis sendependaj landoj.

Eventuale pro tio pri la 26a BET, malgraŭ ĝia elstareco, ni ne trovis multajn publikaĵojn en la tiutempa gazetaro. Ni trovis nur unu mallongan artikoleton en loka litova gazeto kaj iom pli longan artikolon en latva porjunulara gazeto. Horizonto de Soveta Litovio ne plu aperadis, ankaŭ Litovio hodiaŭ, kiu estis sovetieca propagandilo, ĉesis ekzisti. Litova stelo ankoraŭ ne estis restarigita. Pro la streĉitaj rilatoj inter ASE kaj Litova Esperanto-Asocio jam ne eblis kaj ne estis deziro uzi la tribunon de „Informa bulteno de ASE“. Sendube, devis aperi eble eĉ multaj publikaĵoj pri BET-26 en loka gazetaro de tiutempa vastega Sovetunio, sed nun trovi ilin estas tre malfacila kaj temporaba afero.

Povilas Jegorovas

Esperantistoj en Noreikiškės

Ĉirkaŭ 600 esperantistoj el 11 sovetuniaj respublikoj kaj ankaŭ el GDR, Ĉeĥoslovakio, Hungario, Pollando, Bulgario, Belgio, FRG renkontiĝis en la 26a Baltia tendaro. En diversaj sekcioj kaj seminarioj estis traktitaj aktualaj demandoj de la movado, oni parolis pri medicinaj kaj ideologiaj, sciencaj kaj teknikaj, sociaj demandoj. Ankaŭ estis enhavoriĉa kultura programo. Koncertis koruso de bulgaraj esperantistoj, spektaklon en Esperanto ludis pupteatro de Panevėžys. Dum la tendaro estis eldonata bulteno, en kiu kune kun esperantistaj problemoj estis prezentita la socia vivo de nia respubliko.

T. Ž.

Fonto: Tėviškės žinios (Distrikta gazeto de Kaunas), 29 aŭg 1989, №104.

Tradukis el la litova lingvo Povilas Jegorovas

Esperantista forumo en Kaŭnas

Ekde la 11a ĝis la 20a de aŭgusto en Kaŭno okazis BET-26 (Baltia Esperanto-Tendaro). La unuan fojon ĝin partoprenis 60 eksterlandaj esperantistoj el sep landoj. La partoprenantoj venis el 131 urboj de USSR kaj el 28 eksterlandaj urboj.

De la tribuno sonis opinio, ke tiajn forumojn oni ne plu konsideru tendaroj, sed kongresoj. Do – ne BET, sed BEK? Por la vasta komunumo de esperantistoj pordojn gastame malfermis Litovia Agrikultura Akademio, kiu disponigis al la organizantoj de la aranĝo studentajn komunloĝejojn, manĝejojn, bufedojn, salonojn, ankaŭ teknikon por demonstrado, aŭdioaparataron kaj eĉ busojn por veturigi partoprenantojn al manĝejoj kaj ekskursoj. Ambicie! Nun ni devas pensi, kiel tian aranĝon realigi ĉe ni. Antaŭ du jaroj ni sukcese aranĝis ĝin surbaze de la teknikumo en Saulaine kun 406 partoprenantoj. Sekvontjare denove estos nia vico… Ĉu al simila ago pretas nia LAA aŭ alia altlernejo? Eble teknikumo, novkonstruita mezlernejo kaj Baltia eksperimenta stacio de maŝinoj en Priekuļi? Sed eble ankoraŭ iu alia en alia loko? Karaj mastroj, vian komplezemon volonte akceptus Latvia Esperanto-Asocio! Ĝi fondiĝis surbaze de la Latvia Filio de la Asocio de Sovetiaj Esperantistoj kaj fine de la pasinta jaro iĝis sendependa unuo. Ankaŭ la Esperanto-asocioj de Litovio kaj Estonio fine de la pasinta jaro deklaris sian suverenecon. Tial kun daŭraj aplaŭdoj estis akceptita informo de P. Jegorovas – delegito de la Universala Kongreso de Esperanto – ke la Litovia kaj Latvia asocioj estas akceptitaj kiel membroj de la Universala Esperanto Asocio.

Dum ĉiuj tagoj de la tendaro okazis intensa laboro en sekcioj. En la grupo de komencantoj grandan amon kaj respekton akiris la Pollanda esperantistino Ewa Bondar, kiu montris elstaran talenton, instruante laŭ tiel nomata Cseh-metodo. Sukcese laboris grupoj de paroliga perfektigo, sekcio de tradukantoj kaj Somera Universitato. Lecionojn prezentis altnivelaj instruistoj, profesoroj kaj kandidatoj de sciencoj. La unuan fojon por la plejmulto de la partoprenantoj estis ebleco partopreni Diservon en Esperanto. Elĉerpajn respondojn al ĉiuj demandoj dum speciale organizita renkontiĝo donis E. Klumbys – reprezentanto de la estraro de “Sajūdis”, deputito de la Supera Soveto de USSR.

La lingvo Esperanto estas kaj restas fenomeno. Esperantistoj ĝin lernas ĉeeste kaj koresponde. Unufoje semajne ili kolektiĝas en siaj kluboj. Ĉiumonate okazas iu granda aranĝo, internaciaj korespondadoj kaj turismaj interŝanĝoj. Nun eblas aboni periodaĵojn kaj dum lastaj tri jaroj akiri literaturon en Esperanto. Tio ligas kaj tenas kune la entuziasmulojn. Ĉi-aŭtune rekomenciĝos ĉeestaj kaj korespondaj kursoj. Se vi ekinteresiĝas – sekvu reklamon!

Jāzeps Šlars

Tradukis el la latva Margarita Želve

Fonto: Padomju Jaunatne, 12 sep 1989.

Fotoj

Povilas Jegorovas – la ĉeforganizinto de la plej amasa BET.

De maldekstre Petras Čeliauskas (Švėkšna, Litovio), Rima Skudžinskienė (Raseiniai, Litovio), Dmitrij Cibulevskij (Harkovo, Ukrainio), Jerzy Uśpieński (Varsovio).

Esperanto-kurso en Noreikiškės.

Parolas Michael Cwik el Bruselo.

Esperanto-koruso el Bulgario.

Koncertas latvaj esperantistoj.

Kantas partoprenantoj de la unua BET (1959), de maldekstre: Laanest Lembe (Estonio), Zenonas Sabalys (Litovio), Biruta Rozenfelde (Latvio).

La fotoj estas prenitaj el la fotokolekto de la latva esperantisto Aleksandrs Strautmanis (1912-1995). La kolekto estas gardata en la Esperanto-domo en Kaŭno. La fotojn elektis kaj komentis Povilas Jegorovas.

La supran materialon kompilis kaj redaktis Povilas Jegorovas kaj Aleksander Korĵenkov. Reagoj de partoprenintoj estas bonvenaj.

Pliaj informoj pri BET-52 kaj pri BEToj ĝenerale estas legeblaj en speciala rubriko de nia retejo.

Ĉe represo bonvolu indiki la fonton:
La Balta Ondo: http://sezonoj.ru/2016/02/bet-29/

BET-20. Grupfoto. Por pligrandigi la foton musklaku ĝin.

La organizantoj de la 52aj Baltiaj Esperanto-Tagoj, kiuj okazos la 2-10an de julio 2016 en Birštonas (Litovio), decidis aperigi en La Balta Ondo informojn pri ĉiuj BEToj, kiuj okazis en Litovio. Jam aperis en nia retejo raportoj kaj fotoj pri BET-3 (Molėtai, 1961), BET-6 (Veisiejai, 1964), BET-9 (Vilno, 1967), BET-12 (Kretinga, 1970), BET-17 (Viekšniai, 1976).

Post BET-18 en Latvio (1977) kaj BET-19 en Estonio (1978), la 20a BET devis okazi en Litovio en 1979, sed oni ne permesis organizadon de BET en 1979, 1980, 1981 kaj 1982. BET-20 povis okazi nur la 1–10an de julio 1983 en Noreikiškės, apudurbo de Kaŭno. Ĉi-sube ni aperigas du artikolojn pri BET-20, kiuj reciproke kompletigas unu la alian.

La 20a tendaro de esperantistoj de Baltaj landoj

De la 1a ĝis la 10a de julio 1983 en Noreikiškės [Norejkiŝkes] apud Kaŭno okazis la 20a tendaro de esperantistoj de Baltaj respublikoj. La devizo de la tendaro estis “Por paco kaj amikeco inter popoloj!” Ĝin organizis Litovia filio de Asocio de Sovetiaj Esperantistoj (ASE), celante ne nur profundigon de la lingvoscio, sed ankaŭ plifortigon de la ideologia kaj politika rolo de Esperanto. Tia direkto de la tendaro konvenas al nia tempo, kiam la Esperanto-movado akiris novajn formojn kaj novan enhavon.

La tendaron partoprenis 307 reprezentantoj de 13 nacioj el 10 sovetiaj respublikoj. La organiza komitato de la tendaro (vicprezidanto de Litovia filio de ASE P. Jegorovas, membro de Klaipėda Esperanto-klubo V. Baniulaitis, prezidanto de Kaŭna Esperanto-klubo E. Laiconas kaj aliaj) faris grandan laboron. La organizan komitaton efike helpis la Respublika Konsilantaro de Sindikatoj, Litova Societo de Amikeco kaj Kulturaj Rilatoj kun Eksterlando, Centra Komitato de Lenina Komunista Junularunio (Komsomolo) de Litovio, Rektora Administracio de Litova Agrikultura Akademio (kiu gastame akceptis partoprenintojn de la tendaro) – ili ĉiuj aktive aliĝis al plena efektivigo de la planita programo.

La ceremonion de la malfermo de la tendaro partoprenis la prezidanto de Litova Societo de Amikeco kaj Kulturaj Rilatoj kun Eksterlando R. Petrauskas, provizora rektoro de Litova Agrikultura Akademio P. Bėčius, membro de la estraro de ASE kaj funkciulo de Komitato de Junularaj Organizaĵoj de Sovetunio V. Verigin, funkciuloj de Litova Societo de Amikeco kaj Kulturaj Rilatoj kun Eksterlando, reprezentantoj de Leningrada, Ukrainia, Latvia kaj Estonia filioj de ASE, prezidantoj de urbaj Esperanto-kluboj el Kujbiŝevo, Odeso, Tbiliso kaj aliaj.

Konforme al la programo de la tendaro estis organizitaj kelkaj amasaj politikaj aranĝoj. Unuavice estas notinda la pacdefenda mitingo la 6an de julio, kiun ĉeestis ĉiuj partoprenantoj de la tendaro. Inter la parolintoj menciindas: docento V. Ĥromov (Talino), inĝeniero V. Titov (Leningrado), instruistinoj E. Anosova (Seversk, Donecka regiono), T. Vasjanina (Ĉuvaŝio), M. Vaŝĉinina (Strij, Lvova regiono), Leningrada poeto M. Denisov, membro de estraro de ASE J. Ojalo (Talino), kamarado M. Cuckiridze (Tbiliso). La mitingo finiĝis per komuna voĉdono uzante specialajn bultenojn “Mi voĉdonas por paco” kaj certe estis ideologie kaj politike altnivela.

En la tendaro estis aranĝita vespero dediĉita al la 30-jariĝo de la Mondpaca Esperantista Movado (MEM). Dum la vespero membro de la Internacia Komitato de MEM, prezidanto de Litovia filio de ASE docento de Vilna Ŝtata Universitato L. Skūpas prelegis pri la historio, taskoj kaj rezultoj de la movado. Ankaŭ interese pasis renkontiĝo kun partoprenintoj de la Granda Patria Milito: ili prezentis siajn rememorojn, aparte pri la Leningrada blokado, substrekante la gravecon de gardado kaj plifortigo de paco. Fine de la renkontiĝo estis prezentitaj du filmoj sonigitaj en Esperanto: “Viva Lenin” kaj “La tutpopola heroaĵo”. Ankaŭ menciindas la kvizo “Kion Vi scias pri la Soveta Litovio?” kiun partoprenis 90 personoj. En la komplika kvizo venkis V. Titov kaj J. Ojalo.

Al la tendaranoj estis prezentitaj diversaj prelegoj. Membro de la societo “Scio” A. Gulbinskienė prezentis prelegon “Karl Marx kaj la hodiaŭa mondo”, membro de la sama societo I. Korotkov prezentis prelegon “Batalo de la Komunista Partio de Soveta Unio kaj de la Sovetia Registaro por paco kaj senarmigo”, J. Ŝitov el Lvovo – prelegon “Historia graveco de la 2a Kongreso de Ruslanda Socialdemokrata Laborista Partio”, V. Verigin – prelegon “La internacia jaro de komunikado”.

Dum la tendaro funkciis somera universitato. En la tri fakoj de la universitato (lingvistika, literatura kaj sciencteknika) estis prezentitaj 40 prelegoj: 13 lingvistikaj, 9 literaturesploraj, 13 sciencteknikaj kaj 5 pri ĝeneralaj sciencaj temoj. La prelegojn ĉeestis ĉirkaŭ 160 aŭskultantoj. Inter la plej interesaj prelegoj menciindas “Pri la semantika signifo de refleksiva verbo en franca kaj litova lingvoj kaj en Esperanto” (L. Skūpas), “Idiomaĵoj en Esperanto” (G. Noreikaitė), “Modernismo de franca teatro de la dudeka jarcento” (N. Korĵenevskaja, Ufa), “Pri litovaj kuracaj herboj” (A. Inokaitienė).

Por la partoprenantoj estis aranĝitaj kursoj por perfektigo de Esperanto-scioj. Entute laboris ok grupoj, kiujn gvidis spertaj pedagogoj (doc. A. Kerner, V. Cvetkova kaj aliaj). 66 instruistoj partoprenis du seminariojn, kie estis diskutataj problemoj de metodoj de la lingvoinstruado kaj priparolita la neceso de eldono de lernolibroj kaj aliaj instrumaterialoj, pri atestado de instruistoj ktp.

Tre gravaj estis tri seminarioj por estraranoj de Esperanto-kluboj. Prezidantino de Ukrainia filio de ASE E. Majburova tre interese rakontis pri la agado de Esperanto-kluboj de la respubliko. E. Majburova substrekis gravecon de ideologia laboro en la kluboj lige kun la efektivigo de la rezolucioj de la junia (1983) plenkunsido de la Centra Komitato de la Komunista Partio de Soveta Unio; ŝi kritikis la klubojn, kiuj praktikas nur distran aŭ turisman agadon, rakontis pri la respublika seminario de klubprezidantoj kaj la seminario por Esperanto-instruistoj. J. Ojalo rakontis pri la agado de estoniaj kluboj, pri la lerneja konkurso ktp. Partoprenantoj de la seminarioj eksciis pri agado de la Esperanto-kluboj en Vilno, Kaŭno, Kujbiŝevo kaj kelkaj aliaj urboj, pri la sabataj ordigoj de la teritorio, kiujn aranĝis moskvaj Esperanto-volontuloj, pri partopreno de leningradaj esperantistoj en marŝo por la paco, pri ciklo de publikaj prelegoj “Rolo de Esperanto en la batalo por paco” prezentita en Kujbiŝevo, pri la internacia ekspozicio de infanaj desegnaĵoj kiun aranĝis Esperanto-klubo de Pasvalys (Litovio). Estis interesaj raportoj pri internacia edukado (Kuršėnai, Lvovo, Panevežys, Samarkando k. a.), pri temaj vesperaranĝoj dediĉitaj al diversaj landoj, pri internaciaj rilatoj, pri la ĝemeliĝoj de Esperanto-kluboj de diversaj landoj: Minska Esperanto-klubo kun Potsdama Esperanto-klubo (GDR), Kieva Esperanto-klubo kun Kioto Esperanto-klubo (Japanio), Klaipėda Esperanto-klubo kun Debrecena Esperanto-klubo (Hungara Popola Respubliko) ktp.

Estis aranĝitaj tri seminarioj por tradukistoj. Ilin gvidis verkistino N. Andrianova (Ukrainio) kaj instruisto P. Čeliauskas (Litovio). La partoprenantoj diskutis la malfacilaĵojn de tradukado, la problemon de eldono de literaturo en Esperanto en sovetiaj respublikoj (krom Estonio, kie la eldonado estis sufiĉe bone organizita).

Ankaŭ la kultura programo estis sufiĉe riĉenhava. Ĉiuvespere okazis koncertoj. Estis aranĝitaj konkursoj de politika kanto kaj arta legado. Interesaj programoj estis prezentitaj dum vesperoj de Ruslando, Ukrainio, Litovio. Precipe menciindas la alta nivelo de Lvova amatora grupo (Ukrainio) kaj de la grupo el Klajpeda Esperanto-klubo (Litovio). Tre interesa estis la teatraĵo “La ŝlosilo de abismo“ (de Krzysztów Gruszczińsky) en Esperanto kiun prezentis amatora grupo el Paneveĵisa Esperanto-klubo (ĝin reĝisoris profesia aktoro de Paneveĵisa drama teatro). Post la koncertoj estis bruligataj lignofajroj de amikeco, la junularo kantis kaj dancis. Dum ekskurso en Kaŭno la tendaranoj vizitis la muzeon de la 9a fortikaĵo – la estinta koncentrejo, kie hitleranoj mortigis milojn da senkulpaj homoj.

La ceremonion de la fermo ĉeestis sekretario de la respublika konsilantaro de sindikatoj R. Baltrušaitis. La plej aktivaj esperantistoj (lokaj kaj gastantaj) ricevis memordonacetojn. La tendaro pruvis la neceson de tiaj renkontiĝoj en estonteco. Ili ne nur prezentas eblecon por profundigi la lingvoscion, sed ankaŭ estas lernejoj de ideologia-politika kaj organiza agado, helpas eduki sovetiajn esperantistojn en la spirito de sovetia patriotismo kaj proleta internaciismo, kontribuas al aktivigo de la agado de Esperanto-kluboj.

La stafeto de la tendaro estis transdonita al esperantistoj de Latvia SSR.

L. Skūpas
membro de la Internacia Komitato de MEM
prezidanto de Litovia filio de ASE

Fonto: Informa bulteno de ASE (Moskvo), 1983, №8-9.
Tradukis el la rusa Inita Tamošiūnienė

La 20a kunflugo

La 1–10an de julio 1983 en la urbeto de la Litovia Agrikultura Akademio en Kaŭna distrikto okazis la 20a tradicia Balta kunflugo – tendaro de esperantistoj. Ĝia devizo – “Por kunlaboro inter popoloj, por paco, por amikeco”. La aranĝo estis dediĉita al celebrado de la Internacia Jaro de Komunikado.

En la malfermo parolis respondeca funkciulo de Komitato de Junularaj Organizaĵoj de USSR V. Verigin, la prezidanto de Litovia Societo de Amikeco kaj Kulturaj Ligoj kun Eksterlandoj R. Petrauskas, la prezidanto de Litovia Filio en Asocio de Sovetiaj Esperantistoj L.-A. Skūpas, vicrektoro de Litovia Agrikultura Akademio P. Bėčius, reprezentantoj de esperantistaj organizaĵoj el Latvio, Estonio, Ukrainio, Kartvelio kaj aliaj respublikoj.

Al la jubilea kunflugo venis 307 partoprenantoj el 10 Sovetuniaj respublikoj.

Okazis mitingo por paco kaj senarmiĝo, la monumento de V.Lenin en Kaunas estis omaĝita per floroj. Okazis renkontiĝo kun veteranoj de la Granda Patria Milito, kunveno dediĉita al la 30-jara jubileo de MEM, sportaj aranĝoj, vesperoj de poezio kaj amatora arto, ekskursoj al la 9a fortikaĵo en Kaŭno, vizitindaj lokoj de revolucia pasinteco , aliaj vidindaĵoj, muzeoj.

La laboro de la somera universitato pasis en tri sekcioj: lingvistika, literatura, sciencpopulara. Oni aŭskultis 40 lekciojn: 13 pri lingvistikaj temoj, 9 – literaturaj, 13 – sciencaj kaj teknikaj temoj. El la pli interesaj ni menciu: “La semantika signifo de refleksivaj verboj en la lingvoj franca, litova kaj Esperanto” (doc. L. A. Skūpas) , “Problemo de frazeologismoj en Esperanto” ( G. Noreikaitė), “La modernismo de franca teatro en la 20a jarcento” (N. Korĵenevskaja el Ufa), “La kuracaj herboj de Litovio” (farmaciistino A. Inokaitienė).

Funkciis 8 grupoj por perfektiĝo en la lingvokono. Instruis spertaj pedagogoj esperantistoj – doc. A. Kerner, V.Cvetkova kaj aliaj. Estis organizitaj du seminarioj por instruistoj, kiujn partoprenis 66 personoj.

Pasis viglaj diskutoj pri enhavo kaj formo de la agado de Esperanto-kluboj. Kun granda atento estis auskultitaj opinioj de prezidantino de Ukrainia Filio de ASE J. Majburova, verkistino el Kiiv N. Andrianova, prezidanto de Tallinna Esperanto-klubo J. Ojalo, doc. V. Hromov el Tallinn, instruistino T. Vasjanina el Ĉuvaŝio, M. Cuckiridze el Tbilisi, instruistino M. Vaŝĉiŝina el Lviv, instruisto P. Čeliauskas el la distrikto Šilutė.

En la preparo kaj efektivigo de la kunflugo precipe multe laboris la vicprezidanto de Litovia filio de ASE P. Jegorovas, membro de Klaipėda Esperanto-klubo V. Baniulaitis, prezidanto de Kaŭna E-klubo E. Laiconas, ankaŭ gastoj el Riga T. Bercis, V. Titov el Leningrad. La kunflugo kontribuis al fortigo de la ligoj kaj kunlaborado de sovetiaj esperantistoj por gardo de la paco en la tuta mondo.

L. A. Skūpas

Fonto: Horizonto de Soveta Litovio, 1983, №7.

Fotoj pri BET-20

En la solena inaŭguro. Parolas Talis Bercis (Rigo), en la prezidio plej madekstre estas Jekaterina Majburova (Kievo).

Pli ol 300 personoj partoprenis.

Grupo el Armenio.

Parolas Vjaĉeslav Ĥromov (Talino), sidas Laurynas Algimantas Skūpas (Vilno) kaj Povilas Jegorovas.

Viktoras Baniulaitis kaj Povilas Jegorovas.

En la solena fermo: Povilas Jegorovas enmanigas dankfolion al Jaan Ojalo (Talino).

Povilas Jegorovas parolas en la solena fermo. En la prezidio de maldekstre: Telesforas Lukoševičius (Panevėžys), Viktoras Baniulaitis (Klaipėda), Adomas Vaitilavičius (Vilno), Jekaterina Majburova (Kievo), Romualdas Baltrušaitis (Vilno), Laurynas Algimantas Skūpas (Vilno), Nadija Andrianova (Kievo).

La fotoj estas prenitaj el la fotokolekto de la latva esperantisto Aleksandrs Strautmanis (1912-1995). La kolekto estas gardata en la Esperanto-domo en Kaŭno. La fotojn elektis kaj komentis Povilas Jegorovas.

La supran materialon kompilis kaj redaktis Povilas Jegorovas kaj Aleksander Korĵenkov. Reagoj de partoprenintoj estas bonvenaj.

Pliaj informoj pri BET-52 kaj pri BEToj ĝenerale estas legeblaj en speciala rubriko de nia retejo.

Ĉe represo bonvolu indiki la fonton:
La Balta Ondo: http://sezonoj.ru/2016/01/bet-25/

Povilas Jegorovas kaj Audrys Antanaitis (Foto: Antanas Grincevičius)

Dum pli ol kvindek jaroj daŭras la tradicio meze de decembro okazigi Zamenhof-Tagojn en Kaŭno. Ekde la restarigo de Litova Esperanto-Asocio (LEA) en 1988 samtempe kaj samurbe ĉiujare estas organizata ankaŭ jarkongreso de LEA. La 12-13an de decembro 2015 al Kaŭno por la du samtempaj tradiciaj aranĝoj venis 111 esperantistoj el 13 urboj de Litovio kaj gastoj el Latvio.

La 51a kongreso de LEA komenciĝis per enkondukaj vortoj de la prezidanto de LEA Povilas Jegorovas. Sekvis minuto da silento omaĝe al la forpasinta eminenta esperantisto, Honora Membro de UEA Antanas Mekys. La prezidanto de LEA en sia jarraporto ĉirkaŭrigardis la jaran agadon de litoviaj esperantistoj. Li substrekis, ke la jaro estis stabile sukcesa kaj estis atingitaj moderaj rezultoj en ĉiuj ĉefaj agaddirektoj (informado kaj popularigo de Esperanto, internaciaj kontaktoj, eldona agado, instruado de Esperanto, esperantistaj aranĝoj, aliaj tradiciaj agadoj).

La ĉefa daŭra laboro estis la tre zorga prepariĝo al la sekvontjaraj 52aj Baltiaj Esperanto-Tagoj en Birštonas.

En litovia gazetaro, radioj, televidoj estis multaj artikoloj, elsendoj, diversaj okazaj kontribuoj. Tre vaste publike estis menciita la vivo kaj agado de unu el la plej famaj litovaj esperantistoj Antanas Poška lige kun la atribuo al li de la honordoktora titolo de la universitato de Kalkato (Hindio). Pri li estis aparta elsendo de la litovia ŝtata televido, estis speciala ekspozicio pri li kaj speciala aranĝo en biblioteko de la Litovia scienca akademio, per aparta aranĝo tiu fakto estis menciita en la Litovia edukologia universitato , multaj publikaĵoj en la gazetaro k. s. Publika prelego “Ideala lingvo. Ideala mondo. Esperanto en Litovio” estis organizita de Litovia nacia biblioteko kadre de la tutrespublikaj aranĝoj en la semajno de juda kultura heredaĵo en Litovio.

En la internaciaj kontaktoj estas menciinda multnombra partopreno de litoviaj esperantistoj (40 personoj) en la 100a Universala Kongreso de Esperanto en Lillo, kontaktoj kun la membro de Eŭropa komisiono Vytenis Povilas Andriukaitis, eksterlandaj koncertoj de la litovia ensemblo Asorti (Visaginas), partopreno en BET-51 en Tallinn kaj en multaj aliaj internaciaj kaj landaj Esperanto-aranĝoj (SES en Slovakio, Itala kongreso de Esperanto, ARKONES en Pollando, Malferma Tago en Roterdamo k. a.). Tre bona kaj fruktodona estas la kunlaboro kun La Ondo de Esperanto (Kaliningrado, Ruslando). Audrys Antanaitis estis elektita vicprezidanto de TEĴA.

En la eldonado menciindas apero de nova Esperanto-litova vortaro de Gediminas Degėsys, nova eldono de la instrua libreto de Danutė Vidrinskienė Lernu diligente, apero de konversacia libreto litova-itala-Esperanta de Aldona Judickytė. En Panevėžys estis reeldonita lernolibro de Adolfas Klimas Esperanto kalbos vadovėlis. LEA kunlabore kun la eldonejo Sezonoj (Kaliningrado) reeldonis la Kongresajn Paroladojn de Zamenhof.

En la instruado oni devas mencii la instruadon de Esperanto en la Vilna universitato (Gediminas Degėsys), en la gimnazio de Mažeikiai (Gražina Opulskienė), en la universitato de Šiauliai (Zenonas Sabalys , en unu el la gimnazioj de Kaŭno (Aida Čižikaitė) k. a. Okazis tradiciaj esperantistaj renkontiĝoj: printempe Rideto en Šiauliai, Boatado de Juneco, ĵurnalista tendareto en Aukštadvaris, katolika esperantista renkontiĝo en Žagarė.

La Esperanto-klubo de Jurbarkas Horizonto eldonas samtitolan retan gazeton, la Esperanto-klubo de Panevėžys eldonas la retan gazeton Revulo. Antanas Grincevičius verkas artikolojn por la Esperanta Vikipedio. Li ankaŭ eldonas la retgazeton Barelo, Snaiguolė Malych en la Poznana universitato (Pollando) faris sociologian esploron pri konsisto de litoviaj esperantistoj k. a. Konstante funkcias la retejo de LEA www.esperanto.lt (pri ĝi zorgas Taesok Choe) kaj Yahoo-grupo.

Daŭre estas flegataj bonaj kontaktoj de LEA kun oficialaj instancoj de Litovio. En novembro okazis renkontiĝo de la prezidanto de LEA Povilas Jegorovas kun la vicprezidanto de Litovia parlamento Gediminas Kirkilas.

Fine de sia parolado prezidanto de Litova Esperanto-Asocio Povilas Jegorovas enmanigis dankfoliojn al 20 litoviaj esperantistoj, kiuj en 2015 festis diversajn jubileojn.

En la diskuto partoprenis Audrys Antanaitis (Vilno), Algimantas Piliponis (Vilno), Zenonas Sabalys (Šiauliai), Vida Kulikauskienė (Panevėžys), Marijus Dilba (Vilno), Stasys Raulynaitis (Jurbarkas ), Ramūnas Narbutas (Kaŭno), Biruta Rozenfelde (Rigo).

La sabatan posttagmezon okazis la Zamenhof-Tagoj-2015, dediĉitaj al la 156a datreveno de Ludoviko Zamenhof. La ĉefa programero estis la prelego de Vytautas Šilas pri la unua litova esperantisto, la aŭtoro de la unua lernolibro de Esperanto por litovoj, la unua prezidanto de LEA, la unua redaktoro de Litova stelo, prelato, literaturisto, matematikisto, sciencisto Aleksandras Dambrauskas (Adomas Jakštas) okaze de lia 155a naskiĝdatreveno. Gražina Opulskienė rakontis pri la 10a Somera Esperanto-Studado en Slovakio kaj pri la 82a Itala kongreso de Esperanto. La vespero finiĝis per impona koncerto de studentoj-laŭreatoj de la internaciaj konkursoj de la Muzika akademio de la universitato Vytautas La Granda (Kaŭno), gvidataj de profesorino Sabina Martinaitytė.

Dimanĉe okazis diskuto pri kluba agado, kiun gvidis la prezidanto de la Vilna junulara Esperanto-klubo Juneco Marijus Dilba.

Dum ambaŭ aranĝoj funkciis riĉa libroservo, oni abonis Esperanto-gazetojn kaj revuojn, aliĝis al la venontjaraj UK kaj BET: al BET-52 (Birštonas) aliĝis 30 personoj, al la 101a UK en Nitro aliĝis 15 personoj.

Povilas Jegorovas

Ĝi estas artikolo el la februara kajero de La Ondo de Esperanto (2016).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2016, №2.
Rete: La Balta Ondo http://sezonoj.ru/2016/01/litovio-14

Ŝipekskurso de Birštonas ĝis Kaŭno (duontaga)

La ŝipekskurso komenciĝos en Birštonas, kaj post kvar horoj vi atingos la urbon Kaŭno (Litove: Kaunas). Dum la ŝipado vi ĝuos pitoreskajn pejzaĝojn de Nemano (Litove: Nemunas) kaj la “artefaritan maron” de Kaŭno. Al Birštonas vi revenos per buso.

Gustumado de litova mieltrinkaĵo (duontaga)

Vi veturos al la malgranda urbeto Stakliškės, kie oni produktas la tradician litovan medon “Midus”. Dum la ekskurso vi vizitos muzeon de medo, ekscios la historion de la deveno de “Midus” kaj la historion de la produktado. Post la vizito de la muzeo vin atendos gustumado de “Midus”.

Bienpalacoj de la etnografia regiono Sūduva (tuttaga)

Dum la tuttaga ekskurso vi vizitos la plej belajn bienpalacojn de la etnografia regiono Sūduva. Komence de la ekskurso vi haltos ĉe la preĝejo de Zapyškis apud Nemano. La preĝejo estis konstruita en la 16a jarcento laŭ malfrua gotika stilo.

Poste vi vojaĝos apud Nemano kaj grimpos sur la kastelmonton de Altoniškis, de kiu malfermiĝas pitoreska pejzaĝo al la valo de Nemano.
La bienpalaco de Gelgaudiškis estis konstruita laŭ la klasika stilo komence de la 19a jarcento. Nuntempe la palaco estas riparita. La palacon ĉirkaŭas malnova parko, kiu estas unu el plej grandaj en Litovio. Dum la vizitado de la palaco vin atendos teatra ekskurso kun nobeloj, ĉasistoj kaj servutuloj de tiu epoko.

En Sudargas ĉe Nemano troviĝas la plej impresa loko de la regiono – kvin kastelmontoj, kiuj memorigas batalojn inter litovoj kaj kruckavaliroj. Ĉi tie estis starigita kastelo de duko Sudargas. La kastelon kruckavaliroj forbruligis en 1317.

La bienpalacon de Zypliai fondis en la 19 jarcento Jonas Bortkovskis, nobelo el la gubernio de Polock. Nun la palaco estas la plej vizitata kultura objekto en la distrikto de Šakiai. La centra palaco estas riparita. En 2012 ĉi tie estis fondita artgalerio kaj muzeo de la etnografia regiono de Zanavykai.

La bienpalaco de Paežeriai, situanta ĉe lago, estas unu el plej bonaj konserviĝintaj en Litovio. Hodiaŭ en la palaco troviĝas kultura centro de la regiono Sūduva kaj la muzeo de la distrikto de Vilkaviškis. En la centro de la bienpalaca ensemblo troviĝas eleganta duetaĝa palaco, kiu estis konstruita en la fino de la 18a jarcento laŭ projekto de Martynas Knakfusas.

La tagmanĝo okazos en la urbo Marijampolė. Post la tagmanĝo okazos mallonga ekskurso tra la urbo. Vi vizitos malgrandan bazilikon de sankta ĉefanĝelo Mikaelo, monaĥejon, fervojan stacidomon, kaj la tombon de gvardia kapitano Andrej Armand. En 1944 li estis vundita dum batalo proksime de Vilkaviškis kaj mortis en hospitalo de Marijampolė. Kelkaj rakontas, ke li estas filo de Inessa Armand kaj Vladimir Lenin (kvankam Lenin kaj Armand konatiĝis en 1909, sed Andrej Armand naskiĝis en 1903).

Antanas Visockas

Pliaj informoj pri BET-52 kaj pri BEToj ĝenerale estas legeblaj en speciala rubriko de nia retejo.

Ĉe represo bonvolu indiki la fonton:
La Balta Ondo: http://sezonoj.ru/2015/12/bet-22/

Raporton pri la agado dum 2014 faris la prezidanto de LEA Povilas Jegorovas. Li listigis kaj karakterizis la ĉefajn asociajn aktivaĵojn dum la jaro. Fine de sia parolado la prezidanto de LEA enmanigis gratuldiplomojn al deko da esperantistoj, kiuj en 2014 festis siajn jubileojn. Pluraj personoj partoprenis en la posta diskutado.

Post la tagmanĝa paŭzo (ĉiuj ricevis senpagan tagmanĝon) komenciĝis la tradiciaj “Zamenhof-Tagoj – 2014″. Vytautas Šilas festprelegis. Pri la 99a UK en Bonaero rakontis Palmyra Lukoševičienė. La festo finiĝis per koncerto de Milda Kazakevičiutė (violono) kaj Laimonas Salijus (akordeono).

Funkciis riĉa libroservo, oni povis aboni Esperanto-gazetojn (la plej populara estis La Ondo de Esperantol), kotizi al LEA kaj UEA, aliĝi al BET-51 en Tallinn (aliĝis pli ol 10 personoj) kaj al la 100a UK en Lillo (aliĝis 25).

Povilas Jegorovas

Ĉi tiu artikolo aperis en la februara kajero de La Ondo de Esperanto (2015).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2015, №2.
Rete: La Balta Ondo http://sezonoj.ru/2015/01/litovio-6/

Noktumado en la kutima komunloĝejo de la universitato Aleksandras Stulginskis kaj/aŭ hoteloj. Manĝado en la kafejo de la Instrua centro aŭ en apudaj kafejoj kaj restoracioj. Ĉiuj partoprenantoj ricevos senpagan tagmanĝon sabate (la 13an de decembro ) en la kafejo de la Instrua centro. Pagu la noktadon kaj manĝadon surloke. La noktadon en la komunloĝejo por ĉiuj litovaj esperantistoj pagos Litova Esperanto-Asocio.

En la programo:

• Solena malfermo
• Prelegoj pri diversaj temoj
• Impresoj pri la 99a UK en Bonaero
• Impresoj pri aliaj someraj internaciaj Esperanto-aranĝoj
• Junulara forumo
• Fakaj kunvenoj
• Kunveno de instruistoj
• Libera tribuno
• Koncerto de partoprenantoj kaj amika vespero
• Solena fermo

Dum la Zamenhof-Tagoj oni povos aboni Esperanto-gazetojn, aĉeti librojn kaj esperantaĵojn, aliĝi al la 100a Universala Kongreso de Esperanto en Lillo (Francio) kaj al la 51a BET en Estonio.

Estas invitataj reprezentantoj de ĉiuj najbaraj kaj pli foraj naciaj kaj internaciaj Esperanto-Asocioj, aktivuloj de Esperanto-movado el aliaj landoj.

Malfermo je la 16a horo sabate.
Fermo je la 12.30 horo dimanĉe.

Antaŭ la Zamenhof-tagoj ekde la 12a horo sabate okazos kongreso de Litova Esperanto-Asocio. Registrado ĉe la enirejo.

Oni povas veni jam vendrede vespere ekloĝi en hoteloj kaj komunloĝejoj. Vendrede de la 17a ĝis la 22a horo en la kongresejo oni deĵoros kaj direktos venintojn por noktado, informos pri ĉiuj aktualaĵoj.

Kotizo ne ekzistas.

La kvanto da partoprenantoj ne estas limigita. Tamen ĝis la 9a de decembro inkluzive bonvolu informi la organizantojn pri la datoj de via alveno kaj forveturo kaj la preferatan noktumejon (komunloĝejo aŭ hotelo).

Poŝta adreso: Litova Esperanto-Asocio p. k. 167, LT-44002 Kaunas, Litovio
Retadreso: irenaa@takas.lt
Poŝtelefono: +370-686-69875
Telefakso: +370-37-228616

Pliaj informoj estos legeblaj en la retejo de LEA.

Bonvenon al Kaŭno!