Post la incendio: Restaĵoj de drumo kaj de bas- kaj gitar-amplifiloj.

La septembra incendio estis granda frapo por Vinilkosmo, por EUROKKA, por la Studio de La Trappe, kaj por la tri bandoj kiuj perdis sian tutan instrumentaron.

Sed ŝajne tio ne sufiĉis… Sekvis traktado kun asekurkompanioj. La ejoj de Vinilkosmo estis asekuritaj de la kompanio AXA, kaj la materialo (sonmaterialo de la studio, sonsistemo kaj instrumentoj) estas asekurita tra EUROKKA de MAIF (asekurkompanio por asocioj kaj edukaj funkciuloj). Ni petis al AXA la rekonstruon de la ekzercejo №7 kaj de la stokejo, kaj al MAIF repagon de la perdita son- kaj instrumenta materialo.

La du asekurkompanioj sendis ekspertizistojn. La ekspertizado daŭris unu monaton, kaj la 17an de oktobro 2011 okazis kunveno surloke kun ĉiuj (sep!) ekspertizistoj, la muzikistoj de la tri bandoj, Tribulet (la soninĝeniero kaj respondeculo de la Studio de la Trappe), kaj Floréal Martorell (mi mem) kiel reprezentanto de EUROKKA kaj Vinilkosmo.

Kelkajn tagojn post ĉi tiu kunveno AXA informis, ke ĝi rompas nian kontrakton kaj ne plu asekuros la ejojn de Vinilkosmo ekde la 30a de novembro 2011, ĉar ili taksas tion tro riska. Sed la ejoj funkcias jam dum 30 jaroj kaj ĝis septembro 2011 neniam okazis akcidento, kaj la asekurkompanio, kiu akurate prenis monon, ĝis nun neniam devis repagi.

Pro la raporto de AXA pri la incendio, ĉiuj asekurkompanioj, kiujn mi kontaktis, rifuzis asekuri nin. Ni kontaktis advokaton kaj jurkonsiliston, sed neniel eblas devigi asekuriston asekuri entreprenon, kaj neasekurita entrepreno estas kondamnita al fermo. Pro ĉi tiu minaco mi esploris aliajn eblecojn kaj turnis min al MAIF (kiu ankoraŭ ne repagis la materialon). En decembro MAIF respondis, ke ili ne pretas asekuri Vinilkosmon, sed ili studos la eblecon asekuri la ejojn nome de la asocio EUROKKA. Nova kunveno estis fiksita por januaro 2012.

Antaŭ tiu kunveno, mi kontaktis asekurkompanion, ĉe kiu mia amiko sukcesis asekuri sian spektaklejon, kiam ĉiuj rifuzis fari tion. Sed tiu kompanio taksas nin kvazaŭ publikan teatron kaj aplikas drastajn postulojn kaj kontrolon, inkluzive de aldono de du kromaj sekurecaj seruroj por ĉiuj el niaj 23 pordoj, segado de la arboj proksimaj de la ejoj, forigo de ĉio brulebla k. s. Tiuj laboroj kostos multe, kaj krom tio la prezo de la asekuro estos trioble pli alta ol ni pagis ĝis nun.

En januaro MAIF klarigis, ke ili pretas asekuri la ejojn, sed antaŭ tio oni devos fari multajn kontraktojn inter la diversaj partneroj (EUROKKA, mia frato al kiu apartenas la ejoj, Vinilkosmo, la Studio de la Trappe, kaj ĉiuj bandoj ekzercantaj). Mi devis trovi jurkonsiliston por helpi la preparadon de tiuj dokumentoj.

Intertempe AXA konsentis pagi 27 mil eŭroj por rekonstruo de la ekzercejo kaj stokejo, kvankam la konstruentrepreno petas 36 mil eŭrojn. AXA ne donos pli, kaj ni devos elturniĝi por fini la rekonstruadon. AXA antaŭpagis 18 mil eŭrojn, la ceteron ili pagos kiam la riparado estos finita. Ni tamen ŝparos 1600 eŭrojn, se ni mem kun helpo de muzikistoj plenumos kelkajn preparlaborojn.

MAIF ankoraŭ ne repagis la sonmaterialon kaj instrumentojn, kiuj estis detruitaj dum la incendio. Por la forbrulintaj diskoj estos nenia repago, kaj ni lanĉis subtenkampanjon kiu bone funkciis – danke al la subteno de esperantistoj ni kolektis 3130 eŭrojn per vendado de 565 savitaj diskoj. Tiu sumo ebligis komenci la laboron pri la planitaj projektoj de Zhou-Mack (afrik-regea muziko), Eterne Rima (hiphopo) kaj Patric (okcitanaj kantoj).

Mastrigado de la albumo “Originoj” de Zhou-Mack: Jes! Bonega rezulto de la studia laboro

Jen la aktuala situacio… Oni povas demandi: ĉu utilas pagi asekurojn, se post akcidento la asekurkompanioj forkuras kaj forĵetas vin?

Krom la perdo de valora materialo, de la konstruaĵo kaj de multege da tempo, estas risko ke Vinilkosmo devos fermi siajn ekzercejojn kaj studion, se ne eblos asekuri la ejojn kaj la aktivaĵojn pro tro altaj kostoj. Se Vinilkosmo fermos siajn ekzercejojn kaj studion, estos perdita tio, kio dum dudek jaroj ebligis eldonon de multaj albumoj. Se la ekzercejoj estos fermitaj, mi perdos mian ĉefan enspezon, devos trovi novan laboron kaj ne plu povos dediĉi multe da tempo por Vinilkosmo.

Kio povos okazi post tio?!

Flo!

Ĉi tiu artikolo aperis en la marta kajero de La Ondo de Esperanto (2012).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2012, №3.
Rete: La Balta Ondo http://sezonoj.ru/2012/02/209flo/

Ni pretigis du kategoriojn de savitaj diskoj.
1. La diskojn en ujoj (foje difektitaj). kies libretoj estis malsekigitaj sed kiujn ni sukcesis savi kaj sekigi, ni disponigas je duonprezo (50%) de la publika prezo kun imposto + sendokostoj
2. La diskojn en ujoj (foje duonrompitaj) aŭ en plastaj kovertoj, sen libretoj, ni disponigas por 5 eŭroj + sendokostoj

1. savitaj diskoj kun difektitaj libretoj
Referenco / Albumtitolo / Artistoj / KD-Kvanto / Prezoj (50%)
VKKD018 JoMo kaj Liberecanoj – JoMo – 28 KD: 6,50€
VKKD020 …sed estas ne. – Persone – 11 KD: 6,50€
VKKD022 Por la mondo – Merlin – 11 KD: 6,50€
VKKD023 Ŝako – La Porkoj – 47 KD: 6,50€
VKKD024 Masko – Kajto – 40 KD: 6,50€
VKKD026 Kia viv’ – Kore – 30 KD: 6,50€
VKKD044 JoMo friponas ! – JoMo – 46 KD: 7€
VKKD053 Elektronika Kompilo – 58 KD: 9€
VKKD070 Civilizacio – Strika Tango – 103 KD: 8,50€
VKKD073 Mi estas – Ĵak Le Puil – 46 KD: 9€
VKKD075 Rebela sono – Dolchamar – 8 KD: 7€
VKKD082 jOmO salvumas – JoMo – 105 KD: 9€
VKKD086 Supernova – Supernova – 11 KD: 7€
VKKD088 Tielas vivo – Kore – 20 KD: 9€
VKKD090 Invito por vojaĝo – Jacques Yvart – 142 KD: 9€
VKKD092 Eksplodigos vian domon – La Perdita Generacio – 70 KD: 7€
VKKD093 Fek al Esperanto – La Pafklik – 7 KD: 8€
VKKD023 Ŝako – La Porkoj – 47 KD: 6,50€

2. Savitaj diskoj sen libretoj je 5 €:
Referencoj / Albumtitoloj / Artistoj / Kvantoj
VKKD020 …sed estas ne. – Persone – 91 KD
VKKD022 Por la mondo – Merlin – 30 KD
VKKD026 Kia viv’ – Kore – 28 KD
VKKD027 Lingvo Intermonda – Dolcxamar – 6 KD
VKKD053 Elektronika Kompilo – 42 KD
VKKD070 Civilizacio – Strika Tango – 1 KD
VKKD074 Plaĉas al mi – Kaj Tiel Plu – 10 KD
VKKD075 Rebela sono – Dolchamar – 25 KD
VKKD082 jOmO slavumas – JoMo – 33 KD
VKKD086 Supernova – Supernova – 10 KD
VKKD088 Tielas vivo – Kore – 93 KD
VKKD090 Invito por vojaĝo – Jacques Yvart – 73 KD
VKKD092 Eksplodigos vian domon – La Perdita Generacio – 65 KD
VKKD093 Fek al Esperanto – La Pafklik – 11 KD

Kalkulu kaj aldonu la sendokostojn:
Por Francio: ĝis 2 KDoj = 3,15 €, ĝis 5 KDoj 4,84 €
Por Eŭropa Unio: ĝis 2 KDoj = 4,30 ĝis 4 Kdoj 6,50 €, ĝis 5 Kdoj 10,00 €
Por Novzelando, Aŭstralio, Kanado, Usono: ĝis 2 Kdoj = 5,90 €, ĝis 4 KDoj 7,70 €, ĝis 5 Kdoj 11,50 €
Por aliaj mondpartoj: ĝis 2 KDoj = 12€, ĝis 4 Kdoj 15,80€, ĝis 5 Kdoj 16,80€

Elektu la diskojn sendu retmesaĝon al vinilkosmo@gmail.com kun via poŝta adreso kaj via mendo kun via kalkulo. Post nia konfirmo al vi laŭ la disponebleco de la diskoj menditaj, vi konfirmos vian subtenan pagon kaj ni sendos la diskojn …

Pagmanieroj:
1. Pago per ĉeko (nur por francoj!) al Vinilkosmo, 2 Bis Chemin du canal, FR-31450 Donneville
2. Pago per bankĝiro al Vinilkosmo
Poŝtkonto CCP
IBAN: FR52 2004 1010 1606 7085 7J03 728
BIC /Swift: PSSTFRPPTOU
La banque Postale FR-31900 Toulouse Chèques (konfirmi al ni vian subtenan pagon)
3/ Tra la UEA konto de Vinilkosmo. kodo: vini-j (sendu al ni kopie vian ĝirilon senditan al UEA kiel konfirmilon)
4) Per kreditkarto tra Paypal https://www.paypal.fr/fr al Vinilkosmo-konto ĉe payment@vinilkosmo.com

Specialaj dankoj
Ni volas dankegi ĉiujn kiuj sendis al ni kuraĝigajn kaj subtenajn mesaĝojn. Tio donis al ni la forton por daŭrigi la laboron en tiom malfacilaj kondiĉoj…
Ni ankaŭ volas aparte danki la homojn kiuj helpis fizike por savi la diskojn:
— la fajrobrigadistoj sen kiuj ĉio estintus forbruligita.
— Marion, Christophe, Françoise, Christian Mony, Sylvie R, Marie Odile, Sylvie B, Nevik kaj Xavier kiuj mane helpis por purigi, selekti, malfermi la ujojn, sekigi libretojn kaj reordigi ĉiujn diskojn.
Kaj kompreneble grandan dankon al ĉiuj, kiuj subtenos nin mendante tiujn savitajn diskojn…

Nun ni laboras en la urĝo kaj nur jarfine okaze de la inventaro ni povos fari precizan bilancon kaj tiam ankaŭ scios la precizan kvanton da diskoj fordetruitaj.

Plej muzike salutas

Flo!
(Floréal Martorell)

Flo skribis:

«La ekzercejo 7, kie ekzercis tri rokaj bandoj, kaj la stokejo de Vinilkosmo / EUROKKA (kie estis la sonsistemo, materialo por la studio, kaj la plej granda parto de la stoko de la K-diskoj de Vinilkosmo) estis detruitaj pro incendio.

« Unu el la bandoj ekzercis tie ĝis la 22a horo, kaj verŝajne la incendio komenciĝis post ilia foriro. Iom post la noktomezo malŝaltiĝis la elektro, kaj tiam mi ekserĉis la kialon. Subite mi kaj mia frato konstatis la fajron, sed la tegmento jam brulis, kaj ne eblis ion fari. Ni tuj vokis la fajro-brigadon, kiu venis post 15 minutoj kaj laboris ĝis la 4a kaj duono.

« Eble cigaredo estis malbone aŭ ili ne malŝaltis la elektron forirante – mi ne scias, la asekurkompanio faros enketon.

« Estas vera katastrofo por Vinilkosmo kaj EUROKKA kaj por la Studio de La Trappe, ĉar ni perdis grandan parton de nia sonmaterialo kaj la diskostokon… La fajro-brigadistoj provis savi kion ili povis, kelkaj centoj da diskoj estis savitaj, sed mi ne scias en kia stato estas tiuj kiuj saviĝis .. mi devos ĉion kontroli ĉar ili varmiĝis kaj poste malsekiĝis pro la amaso da akvo… la tuta sonmaterialo estas detruita.

« La fajro-brigadistoj faris ĉion, por ke la apuda registrejo kaj ripozejo ne ekbrulo. Feliĉe, ili sukcesis kaj la studio estis savita, sed la perdita materialo kruele mankos… Ekzemple mi, ne plu povos sonreĝisori por koncertoj, kiel mi faris en Festo kaj aliloke, forbrulis ankaŭ la nova materialo, kiun mi aĉetis por lasta FESTO en Greziljono.

Feliĉe neniu persono estis vundita.»

La redakcio de La Ondo kunsentas kun Flo kaj esperas, ke li sukcesos rapide restarigi Vinilkosmon, kiu laboras por la tuta esperantista komunumo.

La retejo de Vinilkosmo

Intervjuo kun Flo en La Ondo de Esperanto (2003)

Ĉe represo bonvolu referenci al La Balta Ondo
http://sezonoj.ru/2011/09/flo/