La intervjuon kun la Esperantisto de la Jaro 2015 sekvas la primovada sekcio Eventoj kun artikoloj pri la esperantistaj kunvenoj okaze de la Zamenhofa Tago kaj pri la jarŝanĝaj renkontiĝoj: Junulara Esperanto-Semajno en Hungario, Novjara Renkontiĝo en Saabrücken, Novojarsko-2016 en Siberio kaj Luminesk’ en Nideggen. Inter multaj aliaj tekstoj en Eventoj estas resuma revuo pri la pasintjara agado en la Esperanto-urbo Herzberg kaj artikolo pri la 10a Lingva Festivalo en Moskvo, kiu kun milo da partoprenantoj estis la plej amasa Esperanto-evento en Ruslando en la 2015a jaro. Kvar fotoj el ĉi tiu festivalo, organizita de Irina Gonĉarova kaj ŝiaj kunlaborantoj, ornamas la kovropaĝon de la februara Ondo.

En la sekcio Tribuno estas legeblaj, interalie, respondoj de la prezidanto de LKK de ĉi-jara UK en Nitro, Petro Baláž al la demando Kial veni al Nitro? kaj la deklaro Adiaŭ de Christer Kiselman, kiu tute surprize anoncis sian demision el la prezida posteno en Akademio de Esperanto. Oni trovas en Tribuno ankaŭ artikolon de José Antonio del Barrio pri Siberio, kiu – jen plia surprizo en la februara Ondo! – troviĝas ne en Azio, sed en … Ekstremadura regiono de Hispanio.

En la rubriko Nia Trezoro ĉi-jare dediĉita al la diversspecaj Esperantaj centroj, Halina Gorecka rakontas la historion de la nelonga, sed ege interesa funkciado de la Esperanto-domo en la Nederlanda urbo Arnhemo.

La kultura sekcio en februaro okupas ok plenajn paĝojn, kaj ĝi proponas, interalie, la tradician revuon de la redaktoro de La Ondo Aleksander Korĵenkov pri la Esperanto-libroproduktado en la pasinta jaro, kiu ĉi-foje estas pli detala ol kutime – ja ĝia titolo 25 jaroj da eldonado diras, ke ĝi prezentas la statistikon de nia libroeldonado dum la lasta kvaronjarcento. La konata Pollanda ĵurnalisto Roman Dobrzyński eseas pri la epopeo de Adam Mickiewicz Sinjoro Tadeo kaj ties Esperanta traduko farita de Antoni Grabowski. Ilia samgentano Walter Żelazny recenzas la sociologian verkon UEA en konscio de esperantistoj kunverkitan de Zbigniew Galor kaj Jukka Pietiläinen.

En la februara Ondo, kiel ĉiam, enestas ankaŭ pluraj etaj informoj pri kulturaj kaj movadaj temoj, nova konkurstasko kaj plia ĉiumonata kolekto de amuzaj tajperaroj, kiujn plukas la akr-okula István Ertl kaj liaj helpantoj.

Daŭras la abonkampanjo por 2016. La Ondo de Esperanto estas abonebla en la tradicia papera formo kontraŭ 42 eŭroj por la tuta jaro kaj kontraŭ 21 eŭroj por jarduono. Ni proponas rabatojn por ekssovetiaj, orient-eŭropaj, afrikaj, sud-amerikaj kaj kelkaj aziaj landoj.
La elektronika jarabono kostas nur 15 eŭrojn.

La redakcio planas produkti la sekvan, martan kajeron ne nur en la jam kutima dosierformo pdf, sed ankaŭ en la formo epub, destinita por elektronikaj legiloj.

2. Antaŭ 175 jaroj naskiĝis François-Alphonse Forel (1841-1912), svisa sciencisto, la fondinto de limnologio.

Antaŭ 100 jaroj naskiĝis Ngô Xuân Diêu (1916-85), vjetnama poeto kaj novelisto.

3. Antaŭ 50 jaroj (1966) la sovetunia spacŝipo “Luno 9” unuafoje en la historio surluniĝis kaj sendis fotojn de la Luno al la Tero.

4. Antaŭ 50 jaroj (1966) 133 personoj mortis pro kraŝo de Boeing 727-81 ĉe Tokio; tiutempe ĝi estis la plej multviktima avia katastrofo.

7. Antaŭ 50 jaroj naskiĝis Kristin Otto (1966-), orientgermania naĝistino, sepfoja mondĉampiono, la sola virino kiu gajnis ses orajn medalojn en unu olimpiko (Seulo, 1988).

8. Antaŭ 50 jaroj naskiĝis Hristo Stoiĉkov (1966-), la plej fama bulgara futbalisto, laŭreato de la “Ora Pilko” (1994).

9. Antaŭ 575 jaroj naskiĝis Aliŝer Navoi (1441-1501), centrazia tjurka filozofo, politikisto kaj poeto en la ĉagataja kaj farsia.

10. Antaŭ 125 jaroj mortis Sofja Kovalevskaja (Korvin-Krukovskaja, 1850-91), ruslanda matematikistino, la unua profesorino en Ruslando.

11. Antaŭ 1375 jaroj mortis Heraklio I (575-641), imperiestro de (Orient)Romia Imperio (610-641).

12. Antaŭ 475 jaroj (1541) hispana konkeristo Pedro de Valdivia fondis la urbon Santiago de Ĉilio.

13. Antaŭ 775 jaroj (1241) ĉe Tursko Wielkie la mongola trupo de Bajdar venkis la armeon de vojevodo Włodzimierz.

Antaŭ 250 jaroj naskiĝis Thomas Malthus (1766-1834), angla pastro, demografo kaj ekonomikisto, laŭ kies teorio, la kresko de la loĝantaro malsatigos la homaron.

14. Antaŭ 100 jaroj naskiĝis Masaki Kobayashi (1916-96), japana filmreĝisoro kaj scenaristo, konata pro siaj dramaj filmoj pri milito kaj sociaj problemoj.

16. Antaŭ 100 jaroj la ruslanda kaŭkaza armeo de gen. Judeniĉ venkis la 3an otomanan armeon kaj prenis la urbon Erzerum.

Antaŭ 75 jaroj naskiĝis Kim Ĝong-il (1941-2011), filo de Kim Il-sung, gvidanto (en pluraj postenoj samtempe) de Korea Popoldemokratia Respubliko ekde 1994 ĝis 2011.

18. Antaŭ 500 jaroj naskiĝis Maria I Tudoro (1516-58), reĝino de Anglio (1553-58), ricevinta la kromnomon “Sanga Maria” pro amasa ekzekutado de protestantoj.

20. Antaŭ 50 jaroj naskiĝis Cynthia “Cindy” Ann Crawford (1966-), usona modelo kaj aktorino.

21. Internacia Tago de la gepatra lingvo.

Antaŭ 100 jaroj (1916) komenciĝis la dekmonata batalo ĉe Verdun.

Antaŭ 25 jaroj mortis Nutan Samarth Bahl (1936-91), unu el la plej famaj hindaj aktorinoj.

23. Tago de Defendanto de la Patrujo en Ruslando, Belarusio kaj kelkaj ekssovetiaj landoj.

Antaŭ 250 jaroj mortis Stanislao I Leszczyński (1677-1766), dufoja reĝo de Pollando kaj Litovio (1704-09, 1733-34), duko de Loreno (1738-66).

Antaŭ 125 jaroj naskiĝis Georgij Deŝkin (1891-1976), rusa esperantista poeto.

25. Antaŭ 175 jaroj naskiĝis Pierre-Auguste Renoir (1841-1919), franca impresionisma skulptisto kaj pentristo.

Antaŭ 150 jaroj naskiĝis Benedetto Croce (1866-1952), itala filozofo, historiisto kaj politikisto, prezidanto de PEN Internacia (1949-52).

Antaŭ 150 jaroj naskiĝis Achille “Aĥilo” Tellini (1866-1938), itala sciencisto kaj esperantisto, aŭtoro de la plena Esperanto-itala vortaro (1931).

26. Antaŭ 600 jaroj naskiĝis Kristoforo la Bavara (1416-48), reĝo de Danlando (1440-48), Svedio (1441-48) kaj Norvegio (1442-48) kadre de la Kalmara Unio.

Antaŭ 50 jaroj mortis Vinayak Damodar Savarkar (1883-1966), hinda verkisto kaj politikisto, kreinto de la naciisma ideologio Hindutva.

28. Antaŭ 25 jaroj (1991) per venko de la Usona koalicio kontraŭ Irako finiĝis la Golfa Milito.

Antaŭ 150 jaroj naskiĝis Vjaĉelav Ivanov (1866-1949), rusa simbolisma poeto, tradukisto, dramaturgo kaj filozofo.

Ĉi tiu artikolo aperis en la februara kajero de La Ondo de Esperanto (2016).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2016, №2.
Rete: La Balta Ondo http://sezonoj.ru/2016/01/februaro-2

2. Antaŭ 25 jaroj mortis Paul Ariste (1905-90), estona lingvisto, poligloto kaj esperantisto.

4. Antaŭ 75 jaroj estis ekzekutita Nikolaj Jeĵov (1895-1940), popolkomisaro pri internaj aferoj de USSR (1936-38), unu el la organizantoj de la Granda Purigo (1937-38).

Antaŭ 25 jaroj mortis Henrik Seppik (1905-90), estona esperantisto, aŭtoro de la populara lernolibro La tuta Esperanto.

5. Antaŭ 175 jaroj naskiĝis Hiram Stevens Maxim (1840-1916), usona-brita inĝeniero kaj inventisto, aŭtoro de la fama mitralo Maxim.

Antaŭ 50 jaroj naskiĝis la plej fama rumana futbalisto Gheorghe Hagi (1965-).

6. Antaŭ 1425 jaroj (590) Bahram Ĉobin detronigis la ŝaĥon Hörmüz IV de la Sasanida Regno.

Antaŭ 175 jaroj (1840) en Waitangi estis subskribita pactrakto inter Britio kaj maoriaj tribestroj – Nov-Zelando iĝis kolonio de Britio.

Antaŭ 350 jaroj naskiĝis Anna Stuart (1665-1714), la unua reĝino de Britio.

Antaŭ 100 jaroj naskiĝis Adomas Vaitilavičius (1915-96), litova esperantisto, redaktoro de Litova Stelo (1991-94).

8. Antaŭ 750 jaroj mortis Hulagu (1218-65), nepo de Ĝingis-Ĥano, mongola armeestro kaj reganto, fondinto de la Ilĥana Regno.

9. Antaŭ 150 jaroj en Kenigsbergo naskiĝis Erich Dagobert von Drygalski (1865-1949), germana geografo, vojaĝanto kaj esploristo de Arktiko.

Antaŭ 75 jaroj naskiĝis John Maxwell Coetzee (1940-), sudafrika verkisto, nobelpremiito pri literaturo (2003).

10. Antaŭ 125 jaroj naskiĝis Boris Pasternak (1890-1960), ruslanda kaj sovetunia verkisto, nobelpremiito pri literaturo (1958).

12. Antaŭ 150 jaroj (1865) Dmitrij Mendelejev defendis la disertacion Pri kombiniĝo de alkoholo kaj akvo, kiu netigis la recepton de la rusa vodko.

13. Antaŭ 100 jaroj naskiĝis Aung San (1915-47), gvidanto de la sendependiĝa movado en Birmo.

14. Tago de S-ta Valenteno ĉe okcidentaj kristanoj.

15. Antaŭ 75 jaroj la Sovetunia armeo trarompis la Mannerheim-linion en Finnlando.

17. Antaŭ 1575 jaroj mortis Mesrop Maŝtoc (362-440), armena monaĥo, teologo kaj lingvisto, tradukinto de Biblio, fondinto de la armena alfabeto.

18. Antaŭ 50 jaroj (1965) Gambio sendependiĝis de Britio.

19. Antaŭ 100 jaroj naskiĝis Arthur Baur (1915-2010), svisa esperantisto, aŭtoro de pluraj verkoj, multjara Esperanto-parolisto ĉe Svisa Radio Internacia.

Antaŭ 75 jaroj naskiĝis Saparmyrát Nyýazow (1940-2006), la ĉefsekretario de CK de Turkmenia komunista partio (1985-91) kaj dumviva prezidento de Turkmenio (1990-2006), konata kiel Türkmenbaşy (ĉefo de turkmenoj).

20. Antaŭ 150 jaroj (1865) per venko de Brazilo finĝis la Urugvaja milito.

21. Internacia Tago de la denaska lingvo

22. Antaŭ 175 jaroj naskiĝis Ferdinand August Bebel (1840-1913), unu el gvidantoj de la germana kaj internacia laboristaj movadoj.

23. Tago de Defendanto de l’ Patrujo en Ruslando, Belarusio kaj kelkaj ekssovetiaj landoj.

24. Antaŭ 200 jaroj mortis Robert Fulton (1765-1815), usona inĝeniero, kreinto de unu el la plej fruaj vaporŝipoj.

25. Antaŭ 300 jaroj mortis Liaozhai (aŭtente: Pu Songling, 1640-1715), ĉina verkisto, aŭtoro de mirrakontoj legataj ĝis nun (ankaŭ en Esperanto).

26. Antaŭ 275 jaroĵ naskiĝis Giambattista Bodoni (1740-1813), itala eldonisto kaj tipografo, kreinto de popularaj tiparoj.

Antaŭ 200 jaroj (1815) Napoleono I eskapis el la insulo Elba.

28. Antaŭ 100 jaroj naskiĝis Samuel Joel “Zero” Mostel (1915-77), usona aktoro, metita en la Holivudan nigran liston dum la kontraŭmaldekstrula kampanjo de Joseph McCarthy.

Ĉi tiu listo aperis en la februara kajero de La Ondo de Esperanto (2015).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2015, №2.
Rete: La Balta Ondo http://sezonoj.ru/2015/02/februaro/

2. Antaŭ 425 jaroj (1589) estis establita la ofico de Patriarko Moskva kaj Tutruslanda. La unua patriarko iĝis Iov (Ivan, 1525-1607).
Antaŭ 25 jaroj mortis Ondrej Nepela (1951-89), slovaka artsketisto, trifoja mondĉampiono, ĉampiono de la 11a Vintra Olimpiko (Sapporo, 1972).

3. Antaŭ 1000 jaroj Haraldo II (ĉ. 994-1018) iĝis reĝo de Danlando.

5. Antaŭ 25 jaroj (1989) ekfunkciis la televida kanalo Eurosport.
Antaŭ 100 jaroj naskiĝis William Seward Burroughs (1914-97), usona verkisto.

6. Antaŭ 350 jaroj naskiĝis Mustafo II (1664-1703), sultano de la Otomana (Osmanida) imperio (1695-1703).

7. Komenciĝos la 22a Vintra Olimpiko en Soĉi.

8. Antaŭ 150 jaroj naskiĝis Samuel Meyer (1864-1921), franca esperantisto kaj tradukanto.

9. Antaŭ 50 jaroj (1964) en Insbruko (Aŭstrio) finiĝis la 9a Vintra Olimpiko, en kiu Sovetunio ricevis 11 orajn medalojn, Aŭstrio restis la dua kun 4 oraj medaloj.

Antaŭ 25 jaroj mortis Tezuka Osamu (1928-89), japana aŭtoro de animeoj kaj mangaoj.

10. Antaŭ 75 jaroj mortis papo Pio la 10a (1857-1939).

12. Antaŭ 75 jaroj naskiĝis Raymond “Ray” Manzarek (1939-2013), usona muzikisto, kunfondinto kaj klavisto de The Doors.

13. Antaŭ 275 jaroj (1739) la persa armeo de Nadir Ŝaĥ apud Delhio venkis la armeon de la Mogola imperio de Grandaj Mogoloj.
Antaŭ 100 jaroj mortis Alphonse Bertillon (1853-1914), franca juristo, inventinta sian metodon de antropologia identigado de krimuloj.

14. Tago de S-ta Valenteno ĉe okcidentaj kristanoj.
Antaŭ 200 jaroj la Napoleona armeo ĉe Vauchamps venkis la koalician armeon.
Antaŭ 1000 jaroj Henriko II (973-1024) estis kronita kiel imperiestro de la Sankta Romia Imperio.

15. Antaŭ 25 jaroj (1989) la sovetuniaj trupoj forlasis Afganion.
Antaŭ 450 jaroj naskiĝis Galileo Galilei (1564-1642), itala fizikisto, matematikisto, astronomo kaj filozofo.

16. Antaŭ 75 jaroj naskiĝis Czesław Niemen (Czesław Wydrzycki; 1939-2004), pola kantisto kaj komponisto.
Antaŭ 50 jaroj naskiĝis la brazila futbalisto Bebeto (José Roberto Gama de Oliveira, 1964-), mondĉampiono (1994).

17. Antaŭ 1650 jaroj mortis la romia imperiestro Joviano (330-364).

18. Antaŭ 100 jaroj naskiĝis Jaan Ojalo (1914-2004), estona esperantisto, prezidanto de EAE (1992-95).
Antaŭ 450 jaroj mortis Mikelanĝelo (1475-1564), itala skulptisto, pentristo, arkitekto kaj poeto.

21. Internacia tago de la denaska lingvo.

22. Antaŭ 300 jaroj (1714) en Peterburgo ekfunkciis botanika ĝardeno.

23. Tago de Defendanto de l’ Patrujo en Ruslando, Belarusio, Ukrainio kaj kelkaj ekssovetiaj landoj.
Antaŭ 550 jaroj mortis Zhu Qizhen (1427-64), imperiestro de Ĉinio (1435-49, 1457-64).

25. Antaŭ 100 jaroj mortis John Tenniel (1820-1914), angla pentristo kaj karikaturisto, la klasika ilustrinto de la libroj de Lewis Carroll pri Alico.

26. Antaŭ 1650 jaroj (364) Valentiniano I (321-375) iĝis romia imperistro.

27. Antaŭ 150 jaroj naskiĝis Eemil Nestor Setälä (1864-1935), finna politikisto kaj filologo, kiu en novembro 1917 prezidis la finnlandan senaton, kiu proklamis la sendependiĝon de Finnlando. Lia filo Vilho Setälä estis aktiva esperantisto.

Ĉi tiu listo aperis en la februara kajero de La Ondo de Esperanto (2014).
Ĉe represo bonvolu nepre indiki la fonton paperan (se en presaĵo) aŭ retan (se en retejo):
Papere: La Ondo de Esperanto, 2014, №2.
Rete: La Balta Ondo http://sezonoj.ru/2014/02/februaro2014/