Zamenhof-ekspozicio en Vilno

Vilno

Okaze de la centa datreveno de la morto de Ludoviko Zamenhof la Ministerio de Eksteraj Aferoj de Pollando mendis ĉe Centro de Interkultura Edukado ekspozicion pri la vivo kaj kreado de Ludoviko Zamenhof “Zamenhof – La kreinto de Esperanto” por ekspozicii ĝin en diversaj landoj. En Litovio ĝin ricevis la Pola Instituto en Vilno, kiu adaptis ĝin al la litova lingvo (ĉiuj informoj estas en Esperanto kaj la litova). La Pola Instituto kontaktis Litovan Esperanto-Asocion (LEA) kaj Litovian UNESCO-komisionon por kunlabore efektivigi tiun projekton. LEA ĉefe okupiĝis pri informado pri la ekspozicio kaj pri ĝia reklamado en diversaj medioj, ĉefe en amaskomukiloj de Litovio (en la litova, pola kaj rusa lingvoj). Estis decidite okazigi la ekspozicion en galerio de Litovia UNESCO-komisiono en Vilno. Kiel konate, la datreveno estas solenata sub aŭspicio de UNESCO.

JegorovasLa 9an de aŭgusto 2017 okazis la solena inaŭguro de la ekspozicio kun ĉeesto de pli ol 60 personoj, el ili duono estis esperantistoj. Dum la solena inaŭguro parolis la gvidantino de la kulturaj programoj de Litovia UNESCO-komisiono Milda Valančiauskienė, direktoro de la Pola instituto, konsilanto de la Pollanda ambasadejo en Vilno Marcin Łapczyński kaj prezidanto de LEA Povilas Jegorovas. En la inaŭguro partoprenis ankaŭ konsilanto de la ministro pri edukado kaj scienco de Litovio prof. Eugenijus Butkus, ambasadoro pri specialaj taskoj el la ministerio pri eksterlandaj aferoj de Litovio Dainius Junevičius, ĝenerala sekretario de Litovia UNESCO-komisiono Asta Junevičienė, profesoro de la Universitato Vytautas la Granda (Kaŭno) Andžejus Pukšto, profesoro de la Jura Universitato Mykolas Riomeris (Vilno) Alvydas Baležentis, ĵurnalistoj kaj fotistoj. Ĉiuj venintoj estis regalitaj per vino.

La ekspozicio konsistas el 18 profesie aranĝitaj paneloj, kiuj informriĉe rakontas pri diversaj aspektoj de la vivo de la kreinto de Esperanto (La biografia skizo, La familio de Zamenhof, La nepo de Zamenhof, Zamenhof kaj Bjalistoko, Zamenhof en Varsovio, La naskiĝo de Esperanto, La morto de Zamenhof, Zamenhof-Esperanto-objektoj, Famo de Zamenhofa kreaĵo, Heredaĵo de Esperanto, Monda literaturo en Esperanto, La meritaj esperantistoj, Internaciaj Esperanto-organizaĵoj, La eduka sistemo de Esperanto, Lernu Esperanton per…). Krome, estis ekspoziciataj ĉiuj ses libroj pri Ludoviko Zamenhof, eldonitaj en Litovio en la litova lingvo.

La ekspozicio daŭros ĝis la 19a de septembro, poste de la 25a de septembro ĝis mezo de novembro ĝi estos ekspoziciata en la ĉefa regiona biblioteko de Kaŭno. La posta loko de la ekspozicio estos la urbodomo de Kaŭno, tie ĝi lokiĝos ĝis la jarfino. Januare-februare 2018 ĝi funkcios en la Universitato Vytautas la Granda. En marto 2018 ĝi iros al Panevėžys por esti ekspoziciata en la regiona biblioteko de Panevėžys. Sekvos aliaj urboj de Litovio. Ni planas eksponi ĝin en ĉiuj 60 distriktaj urboj de Litovio kaj tio daŭros ĉirkaŭ kvin jarojn.

La 7an de septembro en la ekspozicia salono de UNESCO en Vilnio ankoraŭ dum la funkciado de ĉi tiu ekspozicio okazos “metiejo de Esperanto”, en kiu du grupoj (lernantoj kaj ĝenerala publiko) baze konatiĝos kun Esperanto kiel lingvo kaj ekscios pri la nuna situacio de la Esperanto-movado en la mondo kaj en Litovio.

Tiu-ĉi ekspozicio estas bona ekzemplo kaj rezulto de modela kunlaboro inter Pollandaj kaj Litoviaj institucioj.

VilnoLEA lerte uzis la okazon por informi pri Esperanto tra la tuta Litovio antaŭ la ekspozicio, dum la inaŭgura tago kaj post la inaŭguro. Ampleksan gazetaran komunikon pri la ekspozicio aŭ pli vastan materialon pri Ludoviko Zamenhof kaj pri Esperanto anticipe aperigis la tutlanda gazeto Lietuvos aidas (papera kaj reta versioj), la Vilna semajna gazeto Sostinė (ankaŭ rete kaj papere), la dusemajna gazeto de Litoviaj sciencistoj Mokslo Lietuva (rete kaj papere), la retejo de Litoviaj sciencistoj, novaĵretejoj www.alkas.lt, www.etaplius.lt, www.lrytas.lt, retejo de la Litovia Ĵurnalista Asocio, retejo de la Litovia Nacia Novaĵagentejo ELTA. Kompreneble, informoj kelkfoje aperis en la retejoj kaj Facebook-paĝoj de la Pola Instituto, Litovia UNESCO-komisiono kaj LEA. Gazetaran komunikon pri la ekspozicio al siaj abonantoj dissendis ankaŭ la novaĵagentejo BNS (Baltic News Service). Materialo pri la ekspozicio aperis ankaŭ en kelkaj amaskomunikiloj de Pollando. La gazetara komuniko pri la ekspozicio estis sendita al pli ol 250 gazetoj, revuoj, novaĵagentejoj, novaĵretejoj, televidoj, radioj, diversaj organizaĵoj, apartaj gravuloj k. a.

Ankaŭ multaj informoj pri la ekspozicio kaj Esperanto aperis dum la inaŭgura tago. La Litovia nacia radio matene la 9an de aŭgusto kelkfoje ĉiuhore informis pri la malfermota ekspozicio kaj pri Esperanto. La unua vicprezidanto de LEA Audrys Antanaitis sufiĉe longe parolis pri Esperanto dum la taga programo de la Litovia nacia televido Laba diena, Lietuva (Bonan tagon, Litovio). La prezidanto de LEA Povilas Jegorovas kaj la direktoro de la Pola Instituto en Vilno Marcin Łapczyński estis intervjuitaj por la ĉiutaga ĉefa vespera novaĵprogramo Panorama de la Litovia nacia televido. Povilas Jegorovas estis intervjuita ankaŭ de la novaĵretejo www.alfa.lt, de la pollingva programo de la Litovia nacia radio, de la redakcio pri kulturo de la Litovia nacia radio, kaj de la pollingva gazeto Tygodnik Wilensczyzny.

La informa agado daŭros.

Povilas Jegorovas

Fotoj de Martynas Aleksa
Pliaj fotoj estas ĉi tie

Ĝi estas artikolo el la postkongresa, aŭgusta-septembra numero de La Ondo de Esperanto (2017).
Ĉe represo bonvolu nepre indiki la fonton:
Papere: La Ondo de Esperanto, 2017, №8–9.
Rete: La Balta Ondo http://sezonoj.ru/2017/08/litovio-21

Ondo

Klaku la supran bildeton por vidi la abonmanierojn

  1. Komentoj mankas

Vi devas registriĝi por komenti.